قصة فوضت أمري لنسيان فصل ثاني من قصة البائسة

فصل الأول قصة البائسة https://9isaskamila.blogspot.com/2019/02/blog-post_4.html فصل ثاني قصة فوضت أمري لنسيان. انا جيت حيد من الطريق ..وصلت بالجزء الثاني من البائسة ..القصة اللي بكات الجميع ..جيتكم بجزء اكثر تشويق فيه اسرار جديدة ..مغاديش تتوقعوها ..غادي تخليكم تفكرو ويضركم راسكم ههه كالعادة ..شدو بلايصكم بانتظام ..ممنوع التعليق خارج الرد .. #فوضت_أمري_للنسيان #البائسة #دودي_العيساتي الحلقة 1 تأليف دودي العيساتي انتشرت قضية رقية على نطاق واسع.. وعادل العامري طاح .. وبانت قضايا جديدة عليه كتدينو.. كما يقول المثل .. الى طاح الثور كترو الجناوة.. بزاف اللي بغاوها فيهم .. كلشي ولى كيهضر على رقية.. وكيفاش قتلها عادل.. والقصة ديال انور وفرح.. اما باهم العامري.، فبعد شلله مابقات عندو قيمة ولا كلمة.. طاح النجم ديالهم اللي كان مخليينهم ساطعين.. في سماء الاغنياء.. دابا مابقا حد يذكرهم الا بالشر.. الا بأنهم كانو طغاة.. وانتقم منهم الله على يد اضعف خلقه.. في المحكمة: حكمت المحكمة حضوريا على المتهم عادل العامري.. وذلك لارتكابه عدة جنح وجنايات.. ابرزها قتل المسماة قيد حياتها رقية المنتصر بالسجن لمدة 17 عاما .. تعالت الصراخات فالمحكمة ومن بين الحاضرين كان انور.. وكان ساكت وكيشوف فخوه اللي غايقضي عمره فالسجن.. ناض ومشا للمصحة اللي فيها فرح.. بعدما دخل بقا كيشوف فيها وهي مرفوعة على الواقع تماما.. انور: حبيبة.. واش كتسمعيني.. صافي انا خديت ليك حقك.. عفاك.. جاوبيني.. ورجعيلي من جديد.. انا منقدر ندير والو بلا بيك.. فرح عفااك انا عييت.. انا.. معرفتش كيفاش درت هادشي كله.. انا خسرت عائلتي كلها على قبلك..كنت كنتمنى اني منخسركش حتى نتي.. راه غانموت.. الطبيب: باراكة عليك .. خليها ترتاح.. انور: دكتور .. واش غاتبقى هكا مدة طويلة؟ الطبيب: عدرها راه الصدمة مكانتش ساهلة.. غادي تاخد وقت باش تتعالج.. وحنا راه متبعين ليها الدوا هنا بانتظام.. انور: واش غاتبقا هكا مدة طويلة؟؟ عندها بنت.. ومحتاجاها.. الطبيب: ماشي اقل من ست شهور.. غاتبقا هنا.. والى استاجبات للعلاج.. فغادي تقدر تخرج.. وبنتها غانحتاجوها حيت غاتكون حافز ليها باش تتعلق بالحياة.. انور: يا الله .. مشا انور ورجع للدار لقا امه كتنعس فمريم.. انور: ماما.. بلا متعدبي راسك.. انا غادي نعسها.. نسيمة: على اساس نتا قادر تهز راسك باش تهتم بيها .. شوف حالتك كيولات.. سير شوف راسك فالمرايا.. هاد البنت ماجابت ليك ولينا غا الخراب.. من نهار عرفناها هي وامها.. انور: شنو كتقصدي.. نسيمة: ماقصدت والو.. الغلط كله ديال باك..لوكان سمعلي فداك الوقت وجرينا عليهم.. مكناش غانوصلو لهادشي كله.. انور: ماما شنو كتقصدي .. نسيمة: سير قاد حالتك.. الله يستر من اللي جاي.. ومتخافش.. بنتك انا غانتهلا فيها.. واخا عمري مغاننسى ان امها خرجات علينا.. ولكن غانتقا فيها الله حيت مهما كان هادي بنتنا حنا.. تأليف دودي العيساتي الحلقة 2 انور مشا لعند بنته اللي لقاها ناعسة بحال الملاك.. انور: مريم.. بنتي.. اه يا بنتي.. ياريتك تشوفي ماماك.. وتخليها ترجع لينا.. مللي غاتكبري.. انا متأكد انك الوحيدة دللي غادي تفهميني .. وغاتكوني فصفي.. دازت ايام وكل نهار انور كيمشي لعند فرح.. وهي على حالتها.. كما هي.. عايشة فحلمها.. ومحاساش باللي حواليها.. واحد النهار مشا انور لعند فرح كالعادة.. وهو يلقى معاها شي ناس.. ومن بينهم راجل كبير كان باين عليه انه شخصية مهمة.. ومعاه رجال اخرين باين انهم حرسه.. انور: شكون نتوما.. وشكون سمحليكم تدخلو عند مرتي.. واحد من الرجال: هضر بشوية.. نتا اللي شكون؟ اه باينة انك ولد العامري.. غادي نتفاهمو على استفرادك بهاد البنت وبكاع داكشي اللي درتيه ليها.. وحتى على قتلكم للالة رقية.. انور: اش هاد الهضرة.. شكون نتا باش تجبد عائلتي.. الرجل: غادي تعرف شكون حنا قريبا.. متزربش على راسك.. غادي تعرف كلشي .. انور: خرجو من عند مرتي.. برا.. برا.. الطبيب: هاد الصداع ماشي مزيان للمريضة.. واش بغيتوها تدخل فانتكاسة صحية.. من فضلكم خرجو برا.. ناض الرجل الكبير وقاد الكوستوم ديالو.. الرجل: (بهدوء) صافي خرجو.. باشارة لرجالو مشاو موراه.. وانور بقا مفاهم والو.. والتفت للطبيب.. انور: واش اي واحد جا تسمحلو يشوف مرتي؟؟؟ الطبيب: انا اسف ولكن مقدرت ندير والو.. واش معرفتيش شكون هادا؟؟ انور: لا شكون هاد الزمر ومنين خرجلي تاني.. رجالو بقاو كيهددو كأنهم عندهم مع عائلتي حساب.. الطبيب: هادا مسؤول كبير.. وكلشي كيدير بحسابه.. وفنفس الوقت رجل اعمال.. انور: وفين كيعرفنا وعلاش جاي عند مرتي.. الطبيب: معرفتش دخلت انور لعند فرح اللي كانت فعالم تاني.. بقا معاها المدة ديالو وخرج لعند الطبيب.. انور: سمعني.. الى دخلتي عندها شي حد غريب غادي نخرجها من هاد المصحة.. سمعتي.. الطبيب: عفاك مبغيتش المشاكل.. انا ماشي قد داك الراجل ونفوذه... انور: واخا.. الى جا مرة اخرى اتصل بيا واخا؟؟ الطبيب: كنواعدك.. مشا انور.. وبقا كيفكر شكون غايكون هاد الراجل.. ولاش جاي عند فرح.. وشنو باغي منها وفين كيعرف رقية ... اسئلة كلها وكتيرة كانت كتضور فراسو..ومالقاش ليها جواب.. فالدار تلاقا ولد خوه كرم.. هزه وعنقو.. كرم: عمي.. واش نتا اللي دخلتي بابا الحبس.. بقات فيه الهضرة.. وخلاها فخاطرو.. انور: شكون اللي قالك هاد الهضرة اعمو.. كرم: ماما قالت انك خرجتي على حياتنا وباللي نتا مكتبغيش بابا.. انور: اجي نشوفو مريم.. مشاو للمهد ديالها وخلى كرم يبوسها.. كرم: صغيرة بزااف.. انور: دابا تكبر وتولي تلعب معاها.. كرم: فوقاش غاتكبر.. انور: قريب.. غير نتا واعدني انك غاتتهلا فيها وتحميها.. كرم: كنواعدك.. فالاثناء كانت ثورية كتعيط وتقلب على كرم.. ثورية: كرم.. كرم... اش كدير مع هاد الراجل... جات جراتو من عندها بسرعة.. انور: بشوية على الولد هو مادار والو.. ثورية: لوكان بالصح كيهمك كون خليتي باه حداه ومكنتيش تخرج عليه.. وتحرمو منو حياتو كلها.. جراتو ومشات.. وشاف انور فبنتو.. انور: شتي ابنتي شنو درت كاع على قبلكم نتي وماماك.. انا غادي نمشي من هنا غير تولي ماماك لاباس.. نمشيو نعيشو بعييد.. مبغيت والو من الدنيا من غيركم.. تأليف دودي العيساتي فوضت امري للنسيان الحلقة 3 تأليف دودي العيساتي واحد النهار كان انور ناعس.. حتى سمع التلفون كيصوني.. انور: الو.. الطبيب: السي انور.. خاصك تجي بسرعة.. جات لجنة من المحكمة.. ومعاهم لجنة طبية بغاو يشوفو فرح.. انور: شنوو؟؟ متخليهمش يقيسوها.. انا جاي بالزربة.. ناض دغيا بدل حوايجو.. ومشا كيجري لعند المصحة... لقا الطبيب كياخد عينة من الدم ديال فرح.. انور: اش كديرو .. شكون سمحليكم تقربو لعند مرتي.. الرجل: حنا لجنة قضائية.. وبأمر من المحكمة جينا ناخدو عينة من هاد السيدة باش نديروليها تحليل الحمض النووي.. انور: مفهمت والو.. علاش هاد التحليل.. الرجل: بناءا على دعوة قدمها السيد المهدي الخضر .. كيطلب فيها اثبات ان فرح هي بنتو.. انور: شنووو.. ميمكنش.. شكون هو هاد مهدي الخضر.. الطبيب: هو داك الراجل اللي جا داك النهار.. انور: انا مغانسمحش ليكم بهادشي.. الرجل: ميمكنش تمنعنا .. حيت معانا اذن من المحكمة.. والا غادي تدخل الحبس بتهمة العرقلة ديال سير القضاء.. انور: ماشي بنتو.. ماشي بنتو.. انا مرتي معندهاش اب.. الرجل: خلينا نكملو عفاك.. ويمكنليك تستقدم محامي للمحكمة.. انور: هادشي اللي كان باقي.. الطبيب: انور.. ممكن تتحسن فرح الى عرفات ان عندها عائلة.. انور: وممكن ياخدوها مني... وانا نموت ومنتفارقش على فرح.. الطبيب: مغاياخدوهاش منك.. هي راه مرتك بموجب عقد.. ومغادي ياخدها منك حد.. انور: علاااش هادشي كيطرالي.. اكيد ذنوبي هي اللي كتخرج فيا دابا.. وكتعذبني بأغلى انسان عندي.. مللي سالاو اللجنة خدمتهم مشاو وبقا انور مع فرح وشاد فيديها وكيهضر معاها.. وهي كما هي .. لا جواب.. حتى عيا ومشا للدار .. رجع ومشا لعند بنتو.. لقا معاها كرم.. انور: ولدي.. كرم: عمي كتضحك عندي.. انور: اوو شفتي.. يعني نتا عزيز عندها.. كرم: فوقاش تكبر دغيا.. انور: قريب اولدي قريب.. بقا انور كيفكر.. شنو غايوقع الى خداو منو فرح ومريم.. اش غايوقع.. وكيفاش غادي يعيش.. طار النعاس من عينيه.. وبقا كيفكر فحلول.. تأليف دودي العيساتي فوضت امري للنسيان الحلقة 4 تأليف دودي العيساتي دازت سيمانة.. وانور كل نهار كيطل على فرح.. وكيحاول يهضر معاها وهي لا مجيب.. حتى وصل النهار اللي جا فيه نفس الرجل.. ولقا معاه انور.. انور: واش نتا مغاتفارقش على مرتي.. المهدي: الى كانت مرتك فهادي بنتي.. المحكمة حكمات والنتائج ديال التحاليل ثبتو انها بنتي.. انور: اش كتخربق.. المهدي: سمعني مزيان.. انا وصلني خبارك.. وكاع التعذيب اللي عدبتيه لبنتي.. وزواجك منها بالغصب.. غادي تتحاسب عليه.. واستغلالك ليها.. وحتى قتلكم لرقية الله يرحمها.. حتى هو مغاندزوش ليكم بالساهل.. وكلشي بالقانون.. وقريب غادي ناخد منكم بنتي وحفيدتي.. وغادي نطلقها منك بقوة القانون.. وديك الساعة.. غادي نتفاهمو.. انور: خرج من هنا ومتعاودش ترجع هنا.. واياك تعاود تجيب سيرة مرتي وبنتي على لسانك.. فهمتي المهدي: الايام بيننا.. خرج المهدي وانور بقا كيفكر وخايف.. مصيبة ونزلات على راسو.. داكشي اللي خاف منو غايطيح منو.. باس راس فرح ومشا كيجري.. هز تلفونو واتصل بالمحامي.. ومشا عندو للبيرو ديالو.. المحامي: فهمت السي انور.. وللاسف منقدرش نجزم بأنك غاتربح القضية.. حيت اولا لالة فرح ماشي فالوعي ديالها.. وهادشي للاسف نتوما السبب فيه.. وكاين مقتل السيدة رقية بسبابكم.. هادشي كله ممكن يكون فصالح السي مهدي.. حيت غايصبت بسهولة انه بقاء فرح معاكم غير صالح.. وبالتالي غادي يسهل عليه ياخدها باعتبار هو الاب البيولوجي ديالها وثانيا هو عندو ظروف ملائمة لعيشها وعلاجها.. انور: فرح ماشي صغيرة باش تتحكم فيها المحكمة وزايدون هي مرتي بعقد.. المحامي: متنساش ان فرح كتفتقد الاهلية النفسية والعقلية باش تختار مصيرها وفها الحالة كتشوف المحكمة المصلحة ديالها..وعلى حسب الظروف فعائلتك كان ليها نصيب الاسد في تعذيبها ووصولها لهادشي اللي وصلات ليه.. انور: ولكن عندنا بنت.. المحامي: حتى البنت للاسف غاتلتاحق بأمها.. وغادي تحكم المحكمة ليك تشوفها غير من حين الى اخر.. انور: مستحيل.. هادشي مستحيل.. المحامي: الحل هو تبرا فرح.. وتختار انها تعيش معاك.. انور: هاذ الشي بعيد بزاف.. الطبيب كيقول ان العلاج كيطول .. المحامي: للاسف هادشي اللي عندي.. انور: انا غانلقا حل..الموت اهون عليا من اني نبعد على فرح.. تأليف دودي العيساتي فوضت امري للنسيان الحلقة 5 تأليف دودي العيساتي مشا انور للدار.. وجمع الحوايج ديالو وديال فرح.. وديال بنتهم.. وبلا ميشوفو شي حد هدا البنت.. ودارها فالطوموبيل.. ركب ومشا.. داز على سوبر مارشي خدا بزاف ديال السخرة.. وداكشي اللي غايحتاجو فالماكلة.. سطوكاه فالطوموبيل ومشا باتجاه المصحة ..دخل دغيا.. الطبيب: السي انور.. انور: جيت ناخد فرح.. الطبيب: واش تسطيتي راه هادشي خطر عليها.. انور: انا مسؤول عليها.. عطيني الدوا اللي نعطيها وانا غانبعدها على هاد الصداع كله.. الطبيب: انور فكر مزيان هادشي راه خطر عليك.. ممكن تتشد فالحبس بسبب هادشي.. انور: انا الموت عندي اهون من انهم ياخدو مني فرح وبنتي.. لذلك انا مظطر نبعدهم من هنا.. الطبيب: واخا غادي تسنيلي على واحد الورقة.. انور: اراها وانا غادي نجمع حوايج فرح.. ونلبسها باش ناخدها.. جاب الطبيب ورقة لانور سنياها.. وشد ففرح وخرجها ركبها فالطوموبيل.. ومشاو.. بعد على الفيلاج بزااف.. وضرب مسافة طويلة .. حتى وصل للبحر.. البلاصة اللي مكيوصلها تا واحد.. وتما كان واحد الكوخ.. كان كيجيو هو وصحابو يصيفو فيه ويصيدو.. البرد كان بزاف.. دخل فيه فرح ورجع عند بنتو دخلها حتى هي... حاول اول شيء يشعل العافية باش تدفيهم فالكوخ البارد.. ونجح فعلا فأنه يشعلها.. بداو يدفاو وبدا يصاوب البيبرون لبنتو وعطاها ليها.. حتى نعسات.. اما فرح بقات غير كتشوف.. ومتحركاتش... انور: سمحيلي افرح.. انا عارف اني عدبتك فحياتك بزااف.. وكنت السبب فحزنك.. وعارف اني تصرفت بأنانية دابا.. حيت بعدتك على عائلتك الجديدة.. ولكن.. انا منقدرش نعيش بلا بيكم.. مقادرش حتى اني نفكر فالموضوع.. واش جاك الجوع .. تاكلي.. جبد الماكلة اللي شرا وبدا يوكلها.. وعطاها الدوا.. وصل الليل.. وشعل انور العافية تاني باش متطفاش ..حيت البرد زاد.. وغطا بنتو مزيان.. وغطا فرح.. وبقا كيشوف فيهم.. الليل كامل مغمضش ليه جفن.. بقا كيشوف فيهم... طلع النهار.. وجبد تلفونو وصونا للمحامي وخرج برا يهضر.. المحامي: اش داكشي درتي... انور: اش واقع.. المحامي: زدتي قضية اخرى.. الاختطاف.. وعدم الامتثال للقانون.. المحكمة حكمات بسرعة لصالح السي مهدي بعدما وصل ليهم الخبار بداكشي اللي درتي.. وراك مطلوب للعدالة.. انور: مكيهمنيش.. اهم شيء عندي هو بنتي ومرتي.. ومغادي نسمح لتا واحد فالدنيا يبعدهم عليا.. المحامي: راك كتلعب بالنار اانور.. باقي كيهضر حتى سمع صوت بنتو كتبكي.. انور: غادي نتاصل بيك منبعد خاصني نقطع.. المحامي: سمعن... طيط طيط طيط قطع انور ومشا كيجري لعندهم.. دخل وهو يتفاجأ من داكشي اللي شاف قدامو.. لقا مريم فحضن فرح.. وكتحاول ترضعها.. انور: فرح.. واش كترضعي.. بقات البنت كترضع ومريم مكتهضرش.. الفطرة هي اللي تصرفات فهاد الحالة.. بقا انور كيشوف فيهم مبهور.. حتى شبعات البنت نعسات فحضن فرح.. مشا انور هزها من عندها.. وحطها.. انور: حبيبة ديالي.. واش عارفة ان هادي بنتك.. هادي اول مرة كتهزيها بين يديك.. مجاوباتوش.. ولكن فرح نوعا ما حيت هادا تحسن ونقطة اجابية ان فرح بدات كتجاوب وكتوعى بالواقع... واول نقطة هي انها هزات بنتها.. وسمعاتها وهي كتبكي وعرفات انه خاصها تاكل.. تأليف دودي العيساتي الحلقة 6 تأليف دودي العيساتي بقا انور مع فرح وهي كتشوف ومكتهضرش.. وكل مابكات مريم كيهزها عندها وكترضعها .. دازو ايام وهما فديك البلاصة.. حتى لواحد النهار.. تجهدات الشتا بززاف.. والبرق.. فيق بنتهم وبدات تبكي... حتى بدا الما كيدخل من الكوخ.. وفزك كلشي.. هز بنتو دغيا مشا حطها فالطوموبيل.. ورجع لعند فرح ومالقاهاش.. انور: فرح.. فرح ...فرااااح كان غايحماق وهو كيقلب عليها فكل بلاصة فالكوخ.. وملقاهاش.. مشا كيجري يقلب فالنواحي والشتا فزكاتو بزاف.. مشا دغيا سد الطوموبيل على بنتو.. ورجع يقلب من جديد.. دخل بين الشجر كيغوت بسمية فرح وكيقلب.. وقلبو مقبوظ عليها.. وكيغوت بأعلى صوت.. حتى لقاها ومشا كيجري عندها لقا الحوايج ديالها كلهم فازكين بالشتا.. انور: فرح.. فرح حبيبة ديالي.. شافت فيه وهضراات.. فرح: ماما.. ماما غاتكون خافت فالشتا.. انا غانمشي عندها باش متخافش.. هي كتخاف من البرق.. انور: واخا غانمشيو نشوفوها.. غير اجي معايا.. عفاك اجي.. انا غانديك لعندها.. بقات كتكرر كلمة ماما ففمها.. وكتعاود فيها.. حتى وصلو للطوموبيل.. وطلعها فيها.. بقات كترعد هي وياه بالبرد.. حيت كاع الكاشات فزكو.. واخا شعل الشوفاج ديال الطوموبيل الا انهم بقاو كيرعدو.. ديمارا الطوموبيل.. وبقا كيصوك باغي يمشي للفيرمة ديال باه.. هروبا من الشتا.. بقا ساعات وهو كيصوك حتى وصل اخيرا.. دخل دغيا بنتو ورجع لعند فرح دخلها حتى هي.. نسيمة: ولدي واخيرا درتي عقلك.. انور: ماما خاص يسخنو مريم وفرح.. قوليلهم يوجدو ليها صوبا سخونا تشربها.. وانا غانعاونها تبدل حوايجها.. نسيمة: واخا.. ارالي البنت انا نبدل ليها.. انور: واخا.. طلع انو فرح للبيت.. وحيد ليها الحوايج الفازكين.. اما هي بقات كترعد.. هو مداهاش فراسو وانه فازك .. لبسها حوايجها ونشف ليها شعرها.. ودخلها فالكاشة باش تسخن.. عاد بدل حوايجو هو .. ولبس مزيان .. نزل عند امه.. نسيمة: البنت هاكا غاتمرض.. فين كنتو.. انور: ماشي مهم.. نسيمة: واش فخبارك باللي البوليس جاو هنا اكثر من مرة.. هادشي اللي كديرو راه خايب.. انور: متخافيش دغيا غانمشي.. بغيت غير ناخد شي حوايج.. نسيمة: ولدي دير عقلك الله يهديك.. فتلك الاثناء كانت ثورية كتسترق السمع.. ومشات لبيتها اتصلات بالبوليس وعلماتهم ان انور فالفيرمة.. تأليف دودي العيساتي الحلقة 7 تأليف دودي العيساتي رجع انور لعند فرح لقاها ناعسة .. وبقا كيدوز على شعرها.. وكيبوس جبهتها.. حتى سمع صوت الطوموبيلات دخلو للفيرمة،. ناض يشوف شكون لقا الضواو ديال طوموبيلات البوليس.. شاف ففرح.. مقدرش يهزها بسرعة خاف عليها.. وحنا راسو.. حيت مبقاش عندو حل من غير انه يستسلم.. مشا عندها وبداو الدموع كينزلو منو.. وكيبوس فيديها.. حتى دخلات امه.. نسيمة: ولدي.. البوليس بغاوك.. عفاك متدير اي مقاومة.. مبغيتش نخسر جوج ولادي فخطرة.. انور: ماما واعديني انك غادي تبقاي تشوفي فرح ومريم..ومتخلايش عليهم عفاك بدات تبكي الام ومقدراتش تصبر.. باش انور جبهة فرح.. وخرج سلم راسو للبوليس.. وفالطريق شاف ثورية .. ثورية: دابا غاتحس بمعنى انك تتفارق على عائلتك وتجلس بين اربعة الحيوط.. كما تدين تدان.. سكت ومهضرش. وخرج مشا معاهم.. الغد ليه جات لجنة.. وخدات مريم ومشاو لعند فرح وبغاو ياخدوها ولكن هي كانت خايفة.. وكتبعد منهم.. حتى دكولها ابرة وخداوها .. اما نسيمة بقات كتبكي.. ومقدراتش تصبر.. حيت عائلتها تدمرات.. ولادها بجوج دخلو الحبس وراجلها ولى مشلول.. ففيلا حلات فرح عينيها ولقات راسها فغرفة مرتبة مزيان.. من الباب دخل راجل باينة فيه لاباس عليه.. وجلس حداها وهي خايفة بزااف .. المهدي: بنتي.. مشا يحط يدو على راسها وهي تبعد.. المهدي: متخافيش... غاتكوني هنا فأمان.. فرح بنتي.. انا باباك.. فرح: فين انور.. المهدي: هاداك يستاهل الحبس.. انا غادي نحاسبو على كاع داكشي اللي دار فيك.. وكاع هاداك العداب اللي دوز عليك.. غادي نحاسبو عليه.. فرح: بغيت انور.. وبنتي.. المهدي: بنتك راها معانا.. غادي نجيبوهالك.. اشار بيدو لواحد البنت كانت موراه ومشات.. خدات البنت ورجعات.. خداتها فرح دغيا وعنقاتها.. المهدي: بنتي .. وليتي تهضري.. وتعرفي بنتك.. يعني بديتي تبراي.. شفتي.. غير بعدتي على دوك الناس وليتي لاباس.. كنواعدك.. غادي تكوني لاباس اكتر هنا.. ومن هنا الفوق.. وغادي نوريك فيهم .. غادي ننتاقمليك منهم ونشردهم..غانحاسبهم على كاع داكشي اللي دوزو عليك.. وعلى رقية الله يرحمها.. فرح: ماما 😭 المهدي: تهدني ابنتي.. تهدني عفاك.. انا غاناخدليك حقك منهم.. ناض من عندها وهي بقات كترضع بنتها.. وخايفة.. بقات هاكاك حتى نعسات البنت فيدها.. حاولات البنت تاخدها منها باش تحطها فبلاصتها.. ولكن فرح مابغاتش.. وهي تخرج .. روان: سي مهدي.. للاسف مبغاتش تاكل.. ومابغاتش تشرب الدوا.. وحتى انها مابغاتش تطلق من بنتها.. وباينة فيها خايفة بزاف.. المهدي: شنو المعمول.. انا مغانشوفش فيها كتذبل قدامي ونسكت.. بعدما لقيتها مغاديش نتخلى عليها.. غاندير المستحيل على قبلها.. روان: خاص يجي الطبيب يشوفها وكنقتارح انك تجيب الطبيب اللي تبعها اول مرة.. المهدي: انا غادي نجيب ليها الطبيب اللي بغيت انا.. ومبغيت حتى حاجة تربطنا بالعامري وولادو.. حتى لو كان طبيب.. اتصلي بالطبيب ديالنا وطلبيه يحضر فورا.. روان: امرك اسي مهدي.. اتاصلات روان بالطبيب.. اللي متعطلش حتى جا.. ودخل لعند فرح.. لقا نظراتها كلها خوف.. وبنتها فيديها.. الطبيب: السلام.، انتابهات ليه وكان باين عليها علامات الخوف.. الطبيب: متخافيش انا هنا باش نعاونك.. فرح: فيناهو انور.. الطبيب: انور؟؟ شكون انور.. فرح: رر.. راجلي.. الطبيب: يعني نتي عارفة ان انور هو راجلك.. فرح: ممم 😥 الطبيب: البنت اللي فيديك شكون.. فرح: بب بنتي.. الطبيب: وشكون باها.. فرح: اا انور.. الطبيب: كنشوف شي حاجة فوجهك.. شكون دارليك هكاك.. فرح: 😖 الطبيب: انور ياك.. فرح: لاااا.. تأليف دودي العيساتي الحلقة 8 رجعات الذاكرة بفرح الى الماضي{{{ انور: ( بهدوء) طلعي لبيتك.. فرح: وواخا.. }}} بقات ساهية وشريط الماضي كيمر فذاكرتها.. الطبيب: وشكون؟؟ {{{فرح: اقسم بالله اني كنت كنسولو غير على ماما.. اقسم بالله.. عادل: لوااه.. حبك القديم وكتسوليه غا على امك.. انور.. هادي راه استهانت بيك.. حيت وجهك مشوه.. وخانتك .. كتستغل وجهها الزين باش تأثر على الرجال.. هادي خاص تتشوه حتى هي من وجهها باش ميبقى حتى راجل يشوف فيها.. }} الطبيب: شكون ؟؟ فرح: الشيطان.. الطبيب: الشيطان ؟؟ شكون كتقصدي.. فرح: 😔 الطبيب: واخا قوليلي شكون اذاك كاع فحياتك.. من غير انور.. رجعات بيها الذاكرة من جديد {{انور: نوضي تاكلي.. فرح: لا جواب انور: كولي حيت خاصك تشربي الدوا.. واش نسيتي وعدك ليا.. باللي غادي تولدي معايا.. مازال طامع فالاولاد.. علاش ميقتلنيش ويتهنى.. علاش مصر يعدب فيا.. انور: حتى نتي مادرتي فيها ما يصلاح.. تكوني مرتي وتمشي للخداما ديالي.. طبيعي يكون هاداك هو رد فعل ديالي.. دابا مزيان انا وياك متساويين.. هكا تضمني انه لا انا نشوف غيرك رلا نتي تشوفي غيري.. حيت بجوجنا مشوهين.. وحتى واحد مغايديها فينا،. استفزاز وعذاب نفسي.. كيقصد يستفزني بهضرتو.. انور: الخيانة راه صعيبة.. ولكن دابا انا مطمأن انه مغاتخونيش.. فرح: انا مخنتكش 😡 انا سولت غا على ماما.. انور: ولكن هو مقالش هكا.. جواد قال انك كترمي عليه راسك من زمان.. وتابعاه.. وحتى العمال الاخرين شهدو بهادشي... وكاين اللي قال انه تشكلك لماماك اكثر من مرة باش تبعدي من طريقه ولكن نتي مبغيتيش.. فرح: نتا كذاب 😰 انور: الى مامتيقاش نوضي تشوفي بعينيك.. -}}}} {{انور: قولي الحقيقة .. واش مكانتش عندك حتى علاقة مع فرح.. جواد: لا اسيدي.. كنحلفليك.. راه هي من ديما كانت تابعاني وكتعرض راسها عليا.. راه كلشي فالفيرمة عارفين شحال هي قليلة اداب وممربياش.. انا اصلا مستحيل ندير شي علاقة مع وحدة مامعروف حتى اصلها شكون.. وامها استغفر الله العظيم .. كلشي عارفين اخلاقها.. انا مظلوم اسيدي وبريئ.. وطيحات عليا الباطل.. انور: سير دابا.. }} {{فرح: واش متيقو.. انور: شنو بانليك؟؟ فرح: نتا تزوجتيني عزبة.. ولو اني معنديش شرف مكناش غانوصلو لهادشي كله.. كان وجهك غايبقى وحتى وجهي انا.. وكنت غانخليك تقربلي فداك النهار.. انور: انا عارف هادشي.. فرح: مللي عارفو لاش شوهتي وجهي 😢 انور: باش حتى واحد ميكون حسن من لاخور.. انا وياك .. وباش تعرفي انه معندكش فالدنيا غيري.. انا .. جواد ولا غيرو.. باغيين غير يستغلوك ونهار كيحصلو.. كيخويو بيك.. .. فرح: عفاك .. انا عارفة ان قلبك زوين.. وماشي بحال عائلتك.. عفاك خليني نمشي من هنا.. نمشي عند ماما نقلب عليها.. انور: سمعيني افرح.. نتي مغاتخرجي من هاد الفيرمة الا لقبرك.. متحلميش انك غاتخرجي من هنا فيوم من الايام.. فرح: يعني غاتبقى تعدب فيا حياتي كاملة.. مغاتسمحليش.. انور: اه .. نهار نشوف فالمرايا ومنلقاش وجهي مشوه.. ديك الساعة يمكن نسمحليك.. }} الطبيب: هيهوو فرح.. واش كتسمعيني؟ رجعات للحاضرمن جديد.. فرح: فين انا.. وشكون داك الراجل؟؟ الطبيب: معرفتيهش؟؟ فرح: لا الطبيب: فين هو باباك.. فرح: معنديش.. الطبيب: هاداك راه باباك افرح.. فرح: كيفاش.. الطبيب: باباك هو السي مهدي.. وهو من شحال هادي كيقلب عليك..دابا لقاك.. تصدمات فرح.. فرح: بغيت نشوف انور😰 تأليف دودي العيساتي الحلقة 9 خرج الطبيب لعند السي مهدي اللي كان كيستنى فيه.. المهدي: امضرا.. الطبيب: الحقيقة ان فرح تراكمت عليها الاحداث.. وهادشي سيء بزاف ليها حيت عاد مخرجاتش من الصدمة ديال وفاة امها.. ولكن هي فظل كاع هاد التراكمات كتذكر جوج دالناس وكنحس انها دماغها مركز عليهم وهما بنتها وانور..معرفناش الذكريات اللي عندها سيئة او جميلة.. ولكن الاكيد ان دماغها واللاوعي ديالها مركز عليهم مزيان.. لذلك غانديرو تجربة بسيطة.. واللي هي اننا خاص نجيبو انور يتلاقاها . ونشوفو ردة فعلها المهدي: مستحيل.. انا مغانخرجش داك الحيوان من الحبس.. الطبيب: ولكن هي كتسول عليه.. كأنها بغات تهرب اليه من كمية الناس الغير معروفة عندها اللي حواليها .. على الاقل بوجوده نبينو ليها انها فالواقع ماشي فالخيال.. المهدي: الى رجع ممكن يخطفها او يديها معاه.. وانا بزز باش لقيت بنتي.. مغاديش نتخلى عليها.. الطبيب: هادشي ممكن يأدي بيها لانتكاسة... واسوء الاحتمالات انها ممكن تصنع عالم خاص بيها فخيالها.. تهرب ببه من الواقع المفروض عليها.. كما دارت اول مرة.. تهرب من واقع مبغاتوش هي .. ومغانقدروش نردوها.. هادي راه فرصة رجعات فيها فرح للواقع وخاص نستغلوها.. المهدي: غادي نديوها لعندو.. ومغاديش يخرج.. غانشوفو ديك الساعة فكرتك العجيبة.. بنادم هو اللي وصلها لهادشي وباغيها تبرا بيه بااز.. الطبيب : وقل داوني بالتي كانت الداء.. المهدي: هضرة خاوية.. بعدها رجع الطبيب لفرح اللي لقا تعابير الخوف بادية على وجهها وبنتها فحضنها.. الطبيب: بغيتي تشوفي انور؟ حركات راسها بالايجاب.. الطبيب: نوضي نمشيو عندو،. ناضت فرح وهي مترددة.. وخرجات مع الطبيب.. وخافت مللي شافت فمهدي.. الطبيب: متخافيش.. زيدي نمشيو.. دازت من حداه وهي خايفة ومترددة.. الطبيب: طبيعي السي مهدي راها مكتعرفكش وعمرها شافتك فحياتها.. المهدي: فهمت.. انا غاندير اتصالاتي باش ندخلو كلنا لعنده.. مغنخليهاش معاه.. الطبيب: واخا خلينا نمشيو.. فمكتب الضابط دخلو فرح والمهدي.. وحتى الطبيب.. بقاو كيستناو حتى دخل انور .. فجأة شاف لقا فرح وهو يجري عندها بلهفة.. وعنقها هي وبنته.. وبدا كينزل دموعه.. انور: كنت خايف اني منشوفكمش مرة اخرى.. فرح حياتي واش راكي لاباس.. واش مرتاحة.. فرح: (حركات راسها بالنفي) علاش خليتيني بوحدي.. انا مكنعرف حتى واحد من غيرك.. عفاك بقا معايا.. انور: فرح.. واش بالصح باغاني نكون معاك .. فرح: اه خودني للفيرمة.. انا عشت فيها وحليت عينيا فيها... مبغيتش نمشي لشي بلاصة اخرى.. انور: سمعتي.. ( وجه كلامو لمهدي) مكتعرفكش وماباغاش تبقى معاك.. بغات ترجع معايا.. المهدي: فرح بنتي.. واش نسيتي كاع داكشي اللي دوز عليك.. قليلي واش كيهددك بشي حاجة.. انا غانحميك منو.. متخافيش.. فرح: انور ديني معاك متخلينيش.. انور: واش نتا طرش ولا شنو.. واش مكتشوفش انها باغاني انا ومكتعرفكش نتا.. انا مغانسمحليكش تقرب منها كنواعدك.. الطبيب: السي مهدي ممكن نهضر معاك على انفراد.. المهدي: تفضل 😠 تأليف دودي العيساتي الحلقة 10 خرج الطبيب والمهدي برا وبداو يهضرو.. مهدي: شنوو الطبيب: تهدن وسمعني.. فرح مكتعرفكش.. ومغاديش تعرفك بين ليلة وضحاها.. وحتى امها اللي ممكن كانت تقوليها الحقيقة وتقربها منك ماتت...فرح مقارياش ودوزات حياتها فالفيرمة مع هاد الناس.. ومغاتعرفش شي حاجة سميتها تحليل الابوة.. واصلا هي كتعرف حاجة وحدة فهاد الدنيا.. انور.. حتى لو كان مرتبط عندها بذكريات خايبة.. كيبقى هو الحاجة الحقيقية عندها.. ومظطرة تتشبث بيه.. ثانيا هي صدمتها كبيرة من موت امها.. واي صدمة اخرى دابا مغاتحملهاش.. المهدي: شنو بغيتي ندير .. الطبيب: تخرج انور من الحبس.. وتحاول تكسبه.. باش يعاونك تتقرب من بنتك.. المهدي: نتا اكيد حماقيتي.. ندير يدي فيد ولد الد اعدائي.. الطبيب: معندكش حل اخور.. والا غادي تخسر بنتك.. حيت فنظري مكايناش طريقة اخرى.. المهدي: اوووف.. وااخا... خدا المهدي تلفونه وبدا يهضر فيه.. اما لداخل.. كان انور مع فرح.. كيدوز على وجهها.. انور: حبيبة .. واش دارولك شي حاجة.. واش راكي لاباس.. فرح: انا خايفة بزااف.. متخلينيش بوحدي.. شكون دوك الناس.. انور: متخافيش.. (عنقها) انا معاك ومغانتخلاش عليك.. شوية دخل الطبيب.. الطبيب: فرح.. واش نمشيو.. حركات راسها بالرفض.. وتخبات فظهر انور.. الطبيب: اذا بغيتي تمشي مع انور.. واخا انا غانعاونك ترجعي معاه.. بشرط.. نوليو صحاب.. ونبقا ديما نجي نشوفك فالفيرمة.. شافت فرح فانور اللي استغرب من الهضرة ديال الطبيب.. وشاف فيه بدوره.. انور: شنو كتقصد.. الطبيب: انا بغيت نواكب فرح نفسيا.. وغانقنع السي مهدي يتنازل عن الدعوة ديالو.. يعني غاتقدر ترجع مع مرتك وبنتك للدار.. انور: واش بالصح؟؟ الطبيب: كما قلتلك .. شاف انور ففرح اللي كانت مفاهمة والو.. ورجع شاف فالطبيب.. انور: موافق... الطبيب: مزيان... دخل المعدي وبقا كيشوف فيهم ودخل موراه الظابط... الظابط: الاجراءات مغاياخدوش وقت.. التنازل ديالك غايكون واجد حالا.. وغايقدر السي انور يمشي معاكم.. فرح انور وشاف ففرح.. وعنقها.. انور: غادي نرجعو للفيرمة.. متخافيش احياتي..،. عمري نتفارق معاك.. سالاو الاجراءات بسرعة.. وانور طول الوقت معنق بنتو وفرح.. حتى مشاو للفيرمة.. ومع الدخلة تصدمات ثورية مللي شافتهم.. نسيمة: ولدي 😭(جرات عندو عنقاتو) انور: ماما هاهيا فرح ومريم.. مغانوليوش نهربو تاني ... غانعيشو هنا ونستاقرو هنا.. نسيمة: ولدي عفاك وقف معانا.. حياتنا تقلبات كلها.. وباباك مريض بزاف.. مكاين اللي يوقف معانا من غيرك.. ثورية: ماشي هو السبب باش وصلنا لهادشي كله؟؟ نسيمة: ثورياا!!! ثورية: غاتبقى فنظرنا ديما الراجل اللي دمر العائلة.، انور: ماما انا غانطلع لبيتي انا وعائلتي باش نرتاحو.. نسيمة: واخا اولدي.. تأليف دودي العيساتي الحلقة 11 تأليف دودي العيساتي دخل انور وفرح لبيتهم وحطات فرح بنتها .. انور: متصوريش شحال توحشتك.. عرفتي افرح.. كنت يأست من اننا نتجمعو تاني كعائلة.. فرح: انور انا خايفة بزااف.. شكون هاداك الراجل.. وشنو بغا مني.. انور: تهدني.. انشاء الله غانهضرو فالموضوع فرح: متعاودش تخليني واخا؟؟ انا معندي تا واحد فالدنيا من غيرك.. انور: ااااه يا فرح... شحال كنت كنحلم نكونو مع بعضنا... كنبغيك بزاااف... عمري تخيلت اني نبغي شي وحدة قد مبغيتك نتي... حنات راسها ومهضراتش.. انور: انا عارف انك هازة فقلبك من جيهتي... ولكن .. كنواعدك اني غادي نسيك فكلشي.. غير عطيني فرصة.. وغادي تشوفي كلشي بعينيك.، فرح: انور.. انا خايفة من انهم يفارقوني على بنتي.. انور: محدي عايش فالدنيا.. غاندير المستحيل باش نبقاو مجموعين.. انا ونتي وبنتنا... فرح: وعد!! انور: وعد.. 😊 داز داك النهار.. وانور فرحان بزاف حيت مرتو وبنتو حداه.. اما ثورية محاملاش الدنيا.. فرح مقابلة بنتها.. ونسيمة حتى هي كتهلا فيهم.. واحد النهار جا واحد الضيف.. نسيمة: ولدي شي واحد كيقلب عليكم.. انور: شكون هادا.. نسيمة: كيقول باللي هو الطبيب ديال فرح.. فرح: انور مابغيتش نمشي معاه.. 😰 انور: تهدني احبيبة.. مغانسمحش ليهم ياخدوك..انا غانزل عندو نشوف اش بغا.. نزل عند الطبيب.. انور: مرحبا.. الطبيب: شنو اتافقنا.. واش درتي منو شي حاجة.. انور: شنو غاندير.. الطبيب: هضرتي مع فرح.. انور: نتا طبيب وعارف انه ماشي من السهل هادشي يكون.. فرح مازال خايفة بزاف.. ومازال كتغوت بالليل فنعاسها باسم ماماها.. كنهدن فيها بزاز.. الطبيب: فهمت.. واش كتشرب الدوا ديالها؟؟ انور: اه بالساعة.. الطبيب:واخا غادي تضوبل الجرعة .. انور: وعلاش!؟ الطبيب: باش متبقاش تخاف وتغوت بالليل.. هي محتاجة تتهدن اكثر.. انور: واخا.. الطبيب: خليت ليك الراحة.. وغانستنى منك اتصال.. انور: بالسلامة.. خرج الطبيب من الدار.. وانور خدا التلفون اتصل بالطبيب االي كان مقابل فرح.. الدكتور: السي انور لاباس.. انور: بخير.. بغيت نقولك باللي داك الطبيب قالي نزيد الجرعة ديال الدوا لفرح..شنوبانليك.. الدكتور: واش مازال كتخاف.. انور: للاسف اه وكتغوت بالليل... الدكتور: الدوا غاينفعها وزيد ليها الجرعة.. حيت غادي يهدنها.. انور: انا خايف عليها.. الدكتور: متخافش... راه معندوش اضرار.. وغايهدنعا وصاف.. انور: شكرا بزاف ادكتتور.. تأليف دودي العيساتي الحلقة 12 تأليف دودي العيساتي رجع انور لعند فرح.. ولقاها خايفة انور: تهدني.. مغايفارقوناش مرة اخرى.. فرح: انا خايفة.. وبزاااف... انور: ( عنقها) متخافيش.. انا معاك.. فرح: انور.. شكون هاد الراجل.. انور: ( بهدوء) هادا كيقول باللي هو الاب البيولوجي ديالك.. واش عمر معاوداتليك ماماك عليه؟ فرح: ماما عمرها معاودات ليا على شي حاجة.. مكنعرف والو على الماضي ديالها.. انور: خاص نسولو ماما.. على الله تكون عارفة شي حاجة.. فرح: انا مبغيتش .. داك الراجل كيخوفني.. وزايدون باش عرفناه هو بابا.. انور: راه دار تحاليل.. وخرجو النتائج باللي هو بالصح باك.. فرح: وفين كان حياتي كاملة.. ومللي كانت ماما عايشة.. انور: هو كيقول انه مكانش عارف البلاصة اللي راكم فيها..متشوشيش راسك دابا.. كلشي غانعرفوه من بعد.. بقاو مع بعضياتهم.. حتى داها النعاس... وغطاها انور وناض.. مشا لقا امه كتنعس مريم.. وعمر حداها.. انور: ماما.. ممكن نهضرو.. نسيمة: جلس اولدي.. انور: بغيت نسولك.. على شي حوايج.. بما ان خالتي رقية قديمة معاكم.. بغيت نعرف.. واش كتعرفي عليها شي حاجة؟؟ على الماضي ديالها وكدا.. نسيمة: ( بتنهد) هي كانت صاحبتي من الطفولة.. بنت صاحب بابا... كنا ديما كنمشيو لبعضياتنا وكنبقاو مع بعض .. انور: بلاتي بلاتي .. شنو كتقصدي ببنت صاحب بابا.. نسيمة: (بتنهد) اه.. رقية راه كانت من عائلة لاباس عليها.، وكانت بحالي ولا اكثر.. من اغنى العائلات.. وباها كانت عندو بدل الفيرمة عشرة .. انور: صدمتيني.. نسيمة: كنا صحابات.. وهي كانت زوينة بزااف.. اي واحد كان يتمناها .. حتى باك.. كان باغيها ومتمنيها.. باك كان باغي يتزوجها.. ولكن هي كان عقلها مع واحد اخور... هو المهدي.. ولد عمها.. كان ديك الساعة شاب زوين ولاباس عليه.. ولكن.. كان شايف راسو بزااف... وحاقد على كلشي.. وهمه الوحيد ياخد الورث من هم انور: غادي نحماق ..بغيت نفهم علاش كانت خدامة عندنا مدام كانت صاحبتك ..ومادامها لاباس عليها نسيمة : نتا معارف والو ..خاصك تعرف الحقيقة ديك الساعة حكم انور: عاوديلي كلشي تأليف دودي العيساتي الحلقة 13 تأليف دودي العيساتي نسيمة: الموضوع صعيب حتى انه يتحكى.. رقية كانت كتبغي المهدي.. وهو مواعدها بالزواج.. وهي كانت زوينة وكلشي باغيها.. حتى باك.. كان عينو عليها.. ولكن هي مكانت شايفك قدامها حتى واحد من غير مهدي... وحملات منه بلا خبار والديها.. ونهار صارحاتو.. نكرها.. وفضحها.. حتى كلشي ولا سايق خبارها.. واتهمها فشرفها.. وباللي هي زانية وحاملة من شي واحد مامعروفش.. طبعا.. كلشي تيقو.. وانا الوحيدة اللي كنت متيقاها وعارفة الحقيقة.. كان عليها تهرب حيت كانو غايقتلوها...ديك الساعة كنت مزوجة بباك ووالداك نتا وعادل .. طلبت منها تجي عندي للفيرمة وواعدتها انه حتى واحد مغايعرف باللي راكي هنا.. وفعلا.. عطيتها بيت.. وبقات معايا حتى ولدات .. وكلشي فعائلتها فبالهم راها فشي بلاصة بعيدة.. حتى جا النهار المشؤوم.. انور: شنو وقع فيه.. نسيمة: فقت بالليل مالقيتش باباك حدايا.. مشيت لبيتها لقيتو معاها.. غوتت وتصدمت.. انا اللي عاونتها.. علاش تغدر بيا.. مهضروش بجوج.. خرجت من تما وتبعني هو.. بدا كيرغب ويقولي انها هي اللي استدرجاتو.. قلتلو غاتمشي من الدار.. بقا كيقولي لا.. وهي معندها حد منغيرنا.. وباللي هي غاتشرد وممكن يقتلوها الى لقاوها.. تيقتو.. وطلبت انهم يسكنو فبيت الخدم هي وبنتها... بدات كتحكي والدموع كيغلبوها مرة مرة .. كتتبعها لحظات صمت وتنهد من بعد.. انور: كملي .. نسيمة: هي مهضراتش.. ومحاولاتش تفسر.. ولكن انا قريت فعينيها.. كلشي قريتو.. الحزن وخيبة الامل.. كنت عارفة انها ما فيدها والو.. وان باك هو السبب.. وانه هو اللي مشا لعندها.. وكنت عارفة من ديما انه باغيها وعينو فيها.. ولكن الغيرة.. خلاتني نسكت.. ونرد اللومة فيها.. الغد ليه نزلات هي وبنتها لا كاف.. وولات كتشقا مع الخدامة.. كنت عارفة ان باك مغايخليهاش فالتيقار.. نهار طيحها عادل وماتت.. جريت عندها وشافت فيا وففمها كلمة .. فرح بنتي... كنت عارفة انها كتصيفطلي ميساج.. وانا فهمتو.. هي تآذات بزاف من الرجال.. كلهم ظلموها.. باها.. مهدي.. حتى باك نتا.. واخيرا عادل.. اللي قتلها.. ولكن.. هي مابغاتش بنتها تعيش نفس الشيء .. عرفتي... بنتك مريم كتشبه لجداتها.اللي عمرها مغاتفارق عقلي.. ااااه اولدي.. كون عرفتي الحمل اللي هازاه فقلبي.. الدنيا.. انور: القصة ميتيقهاش عقل.. ودابا بكل جرأة داك الراجل جاي باغي بنتو.. اللي لاحها وشك فأمها.. وكان السبب فالحالة اللي وصلو ليها دابا.. نسيمة: شفتي.. هو السبب .. هو .. تأليف دودي العيساتي الحلقة 14 تأليف دودي العيساتي طلع انور لبيتو وبقا كيفكر فداكشي اللي عاوداتليه امه..تبلوكا ومبقا عندو ما يدير.. شاف ففرح اللي كانت ناعسة.. وبقا كيدوز على شعرها.. انور: حياتي سمحيلي.. حيت انا انا ساهمت فعذابك... وحيت خليتك حتى نتي تشوفي ما شافت ماماك من عذاب.. لالة رقية مكتستاهلش داكشي اللي عاشتو فحياتها.. كل ذنبها انها حبات.. مكتستاهلش داكشي اللي داز عليها.. بقا كيدوز على شعرها حتى فاقت وشافت فيه لقات عينيه كيدمعو.. فرح: اش واقع.. فين مريم.. انور: تهدني احبيبة.. مريم راها مع ماما.. متخافيش.. فرح: مالك كتبكي.. انور: والو غير بقيت كنشوف فيك وكنتفكر كاع داكشي اللي داز علينا.. وندمت على داكشي اللي دوزت عليك.. فرح واش ممكن تسامحيني فيوم من الايام.. فرح: انا سامحتك.. غير متخلينيش بوحدي.. انا خايفة بزاف.. عنقها وزير عليها.. انور: انا غانكون عبد تحت رجليك.. مستحيل نفكر نخليك بوحدك.. نتي وبنتنا .. نتوما هما حياتي.. فرح: حتى انا مابقيت باغا من الدنيا حتى حاجة من غير الامان.. انور: فرح.. فرح: ممم انور: نتي عارفة ان باباك رجع.. وباغيك تمشي تعيشي معاه... واش تقدري فيوم من الايام تمشي تعيشي معاه وتسمحي فيا .. فرح: انا معنديش بابا.. كانت عندي غير ماما.. وماتت الله يرحمها.. من بعدها معنديش شي حد من غيرك نتا وبنتي.. انور: واش متأكدة؟؟ فرح: اه متأكدة.. انور واش نقدرو نمشيو غدا نزورو ماما فقبرها.. انور: اه غانقدرو .. علاش لا.. فرح: شكرا بزاف.. مكنتش عارفة اش ممكن ندير من غيرك.. انور: راني قلتلك.. مادامك سامحتيني راه غانكون تحت رجليك.. واللي تمنيتيها غاتكون ليك.. الغد ليه خرجو انور وفرح.. وخلاو مريم مع نسيمة... واتاجهو لعند المقبرة.. باش يزورو رقية.. غير وصلو وبدات فرح تتزير.. انور: فرح واعدتيني انك غاتكوني قوية.. فرح: مم غانحاول.. نزلات على قبر امها وبدات تنظفو.. ودموعها كينزلو.. وبدات تهضر.. فرح: ماما.. انا درت كيما وصيتيني.. انا رجعت لأنور.. كما قلتيلي .. ياك نتي اللي قلتيلي الى بغيت نهرب ونكون فأمان من الدنيا كلها.. نرجع الفيرمة.. نتي اللي وصيتيني نخلي بنتي مع باها .. تكبر وتشوف باها قدامها.. استغرب انور من هضرتها وهي كتسترسل.. فرح: هاهو جا معاها.. وراني مرتاحة اماما.. متخافيش عليا.. متبكيش اماما.. ومتشوشيش عليا.. انور واعدني انه غايحميني من الدنيا كلها.. توحشتك بزاف اماما.. توحشتك بزاف.. انور: باراكة عليك احبيبة.. نوضي نمشيو..غادي نرجعو مرة اخرى كنواعدك.. فرح: واخا 😭 تأليف دودي العيساتي الحلقة 15 تأليف دودي العيساتي شد انور فيد فرح وداها للطموبيل ومشاو... انور: حبيبة واش لاباس دابا.. فرح: اه لاباس.. انور: حبيبة سمعتك كتهضري مع ماماك وتقولي .. فرح: اه.. فهمت شنو باغي تقول... انور: اها.. فرح: ماما جاتلي فالحلم.. مللي كنت مع دوك الناس.. وقالتلي نمشي عندك نتا ومنتيق فحد غيرك نتا ولالة نسيمة.. انور: ماما؟؟ فرح: اه.. انور: لالة رقية مازال كتيق فماما رغم كلشي.. فرح: شنو؟؟؟ انور: والو احبيبة.. كنواعدك اني غادي نكون عند حسن ظنك.. ونخلي ماماك مرتاحة فقبرها.. فرح: انور.. شكرا بزاف حيت متخلينيش عليا رغم كلشي... انور: مستحيل نتخلى عليك.. انا كنبغيك.. وعندي فوبيا من اني نفقدك.. وصلو للفيرمة لقاو فيها المهدي وهو كيدابز مع نسيمة ومع العامري.. المهدي: واش مكفاكمش داكشي اللي درتوه لرقية.. باغين تاخدو مني بنتي.. انا مغانسمحش ليكم بهادشي.. نسيمة: نتا اخر واحد يهضر على رقية.. نتا اول واحد آذيتيها.. ودمرتيها ولحتيها هي وبنتها.. انا عارفة كلشي.. شحال زاوكات فيك.. مازال راني نعقل على داك النهار اللي جات فيه عندك.. عودة الى الماضي {{رقية: مهدي انا حاملة منك.. كنقسم اني معندي حتى شي واحد فحياتي من غيرك.. مهدي: هه.. وشنو اللي يأكدلي هادشي !! كما عطيتيني راسك.. وغدرتي بعائلتك على قبلي.. انا متأكد انك غاتكوني عرفتي ثلاثة وعشرة غيري.. رقية: اشهادشي كتقول.. انا ممتيقاش راسي.. واش نتا هو مهدي اللي بعت الدنيا على قبلو.. مهدي: سمعيني مزيان.. انا غادي نشوهك .. وكلشي غايولي يعرف شكون هاد العفيفة اللي مفتخر بيها الخضر.. وكيقول عليها بنتو.. رقية: مهدي.. انا مبغيتكش تعترف ولا تتزوج بيا.. غير با لا امهدي.. بابا غاتوقعلو شي حاجة الى عرف هادشي.. عفاك لا..، انا مغانوليش نبرزطك عفاك.. مهدي: دابا خفتي.. بهادشي كتأكدي ليا انك فعلا خاينة.. وخايفة تنكشف فضيحتك.. انا غادي نفضحك وندمك.. }} نسيمة: عقلتي ولا نفكرك.. مهدي: نتي السبب.. وحتى هاد راجلك.. انا غادي ندمكم.. مغانسمحش لولدكم يدير مدرتو نتوما.. انور: اش جاي دير هنا.. واش مكفاكش داكشي اللي درتي مهدي: واش هادا هو اتفاقنا.. واش توحشتي الحبس.. فرح: ( بخوف) انور.. نسيمة: متخافيش ابنتي.. اجي لعندي.. مهدي: ماشي بنتك هادي.. ماشي بنتك.. نتوما سبابنا.. نتوما للي خرجتو علينا.. بنتي انا غاناخدها وغادي ندمكم.. ثورية: بنتك هي اللي دمرات حياتنا حنا.. هاهي خودها.. مهدي: بنتي اجي معايا.. معندك مناش تخافي.. متخافيش منهم انا غاناخد ليك حقك منهم.. كاع داكشي اللي دوزو عليك غادي ننتاقمليك نتي وماماك منهم.. فرح: شكون نتا ؟؟ عمت لحظة صمت وصدمة بعد جملة فرح.. المهدي: انا باباك.. واش معمر عاودات ليك رقية عليا.. بنتي الحبيبة .. فرح: انا معنديش اب.. تزاديت وكبر وانا معرفاش ننطق هاد الكلمة.. وعمري فكرت اني نقلب عليه.. حيت مكنتش محتاجاه.. ماما كانت ليا الاب والام.. ودابا هي ميتة.. انا مكنعرفكش.. ومبغيتش نعرفك.. المهدي: 😰بنتي تأليف دودي العيساتي الحلقة 16 تأليف دودي العيساتي مهدي: بنتي.. فرح: متقولش بنتي.. انا عارفة شنو بغبت مزيان.. وعارفة شنو وقع.. مهدي: متيقيهمش.. فرح: فين كنتي النهار الاول.. وعلاش هربات ماما... وعلاش متزوجتيهاش من الاول.. علاش ماكبرتش تانا عندي اسم وعائلة.. كنت عارفة ان ماما معندها ذنب.. احيانا الواحد كيبغي يعيش.. واي واحد فالدنيا كيغلط.. ولكن.. كاين اخطاء مكتغفرش.. فين كنتي هادي كتر من عشرين عام.. عمرك تفكرتيني.. كمل على حياتك.. ونساني ... حيت ولات عندي حياتي .. بنتي وراجلي.. وراني مرتاحة معاهم.. انا مكنعرفكش..ومعنديش اب.. المهدي: يمكنلك تتأكدي.. انا درت التحاليل.. فرح: انا مكنعترفش لا بتحاليل لا بغيرو.. المهدي: بنتي انا دوزت سنين وانا كنقلب عليكم.. فرح: وصلتي معطل.. المهدي: متقسيش عليا.. متخليش العديان يغسلو ليك دماغك.. فرح: انا عارفة طريقي مزيان... وقراري اتاخذتو من قلبي.. لوكانت ماما باغاني نعرفك.. كانت عاوداتلي عليك فحياتها.. ولكن هي عمرها جبدات سميتك لا بخير ولا بشر.. يعني كانت باغيانا نكملو بلا بيك.. انور: خرج .. سمعتيها اش قالت.. مبغاتكش فحياتها.. خلينا نعيشو فحالنا... برا.. المهدي: كنتمنى يجي شي نهار.. تعرفي فيه الحقيقة.. وتعرفي اني كنت مخدوع بحال ماماك.. فرح: احسن حاجة تنساني.. حيت رجوعك معندو معنى.. وغادي يزيد يدمر ليا حياتي.. سير بحالك.. وخليني نعيش.. خرج المهدي وهو مكسور.. شد انور فيد فرح وباسها.. انور: كنواعدك انك عمري غاتندمي على قرارك.. نسيمة: بنتي .. اجي عندي .. مشات فرح وهي مترددة قدام ذراعات نسيمة اللي فتحاتهم ليها باش تعنقها.. حتى ترمات فحضنها وبقات كتبكي.. نسيمة: سمحيلي ابنتي.. سمحيلي.. فرح: عفاك متخلايش عليا .. نتوما عائلتي.. ومعندي حد فالدنيا من غيركم.. نسيمة: متخافيش ابنتي.. انا غانبقى ديما فجنبك.. ثورية: هادشي اللي بقا.. الخدامات ولاو يتساواو بلالياتهم.. نسيمة: غادي تحتارميها والا.. ثورية: والا شنو؟؟؟ تجريو عليا،؟ استفردتو بيا وراجلي بعيد عليا.. نا غانخرج ليكم من هاد الفيرمة.. نسيمة: الى بغيتي تمسي سيري.. ولكن عمر غايبقا هنا.. هو ولد عادل العامري.. وغايبقا هنا.. ثورية: كتبيعوني على قبل خدامة.. نسيمة: فرح نسبها وعائلتها يشريوك نتي وتريكتك كلها.. خلينا نحتارموك.. ثورية: عادل مغايعجبوش هادشي.. نسيمة: اللي فجهدك ديريه... تأليف دودي العيساتي الحلقة 17 تأليف دودي العيساتي.. بعد داك النهار معاودتش شفت داك الراجل.. ومابغيتش نشوفو.. وليت مزيانة مع عائلتي.. الدنيا كتبدل.. البارح اللي كنت كنتمنى فيه غا نتزوج بعامل من العمال.. واليوم انا مرت رب العمل بنفسه... انور مكيخلي واش يدير باش يراضيني.. وحتى انا زعمت وولات شهيتي للحياة اكبر.. ثورية محاملاش وجودي ابدا.. داك البؤس اللي كنت فيه حاولت ننساه بكل الطرق.. واخا مرة مرة كنتفكرو.. العامري مكنفوتش من حداه ابدا واخا كيدير فيا شي شوفات ماشي هما هادوك الا اني كنتفاداه .. كنخاف منو.. دوزت بزاف دالوقت باش نمشي للملحق.. ونسترجع ذكرياتي وذكريات ماما.. حاولت بزاف نزير على قلبي.. ولكن مع الدخلة كنلقى رجليا كيرجعو اللور.. مكنقدرش حتى اني ندخل.. وكنلقا دموعي كتنزل تلقائيا.. انور احترم ماما ومعطاش البيت اللي كنا ساكنين فيه لشي حد وخلاه مسدود.. حاولت ننسى كلشي.. ونبدا من جديد.. نشوف الجانب المليئ من الكأس.. انور اللي كانو كل بنات الدنيا كيتمناو يشوف فيهم.. هو كيبغيني انا.. وكيموت عليا.. مكنتش كنحلم فحياتي بهادشي.. كان يحسابلي تزاديت فالدنيا باش نكون خدامة وباش ندمر.. ونشقا.. عمري فكرت اني نكون مولات الدار.. باقي كنشوف من عائلتو دوك الوشوشات.. وداك النظرة ديال بنت الخدامة.. حاولت نتجاوز هادشي كله.. وحاولت ننسى.. ونبدا حياتي.. وليت كنهز بنتي وننزل للسويقة.. بعد موافقة انور اللي رغبني اني نخرج مع حارس.. ولكن رفضت.. حيت مبغيتش نكون مقيدة.. نزلت مرة وجوج ورتاحيت نفسيا... وحتى هو رتاح من جيهتي.. وبحال بزاف دالايام.. جريت البوسيت ديال بنتي وخرجت.. حتى حسيت وانا كنتمشى بشي حذ كيراقبني..واش يكون انور زعما مصيفطلي شي واحد يحضيني ؟ لا منظنش.. بقيت حاضياه حتى شفتو.. هداك كان داك الراجل... استجمعت قوتي وتنفست..ومشيت لعندو فرح: كنسمعك.. المهدي: واعديني انك غاتيقيني.. فرح: هضر دغيا حيت مزروبة وخاصني نمشي.. المهدي: شوفي ابنتي.. بابا الله يرحمو كان الاخ ديال عمي غا من الام ديالو.. ولكن كان منبوذ بزااف ..حيت هو كان ولد راجل اخر.. وباين عمي كان لاباس عليه بزااف.. وكبر فالتفريق.. اكيد كان عمي هو اللي مفضل.. كبرو بجوج.. وتزادينا انا وماماك.. وكبر الفرق تا هو.. صحيح اني كنت كنبغي ماماك.. الا اني كنت ديما معدب من جيهة بابا.. كان كيعمر راسي ديما.. ومخليني كاره كلشي..الله يسمحلو.. حتى وقع اللي وقع.. وقبل ما تجي ماماك عندي تقولي راها حاملة بيك.. جا الشيطان.. العامري .. جا باش يوسوس ليا.. ويقولي باللي رقية كتعاود لصاحبتها اسرار.. وبلي هي على علاقة بواحد السيد.. وباللي كيتفلاو عليا.. فرح: ونتا تيقتيه.. المهدي: للاسف.. قلت فراسي هر اكيد عاوداتليه مرتو.. ورقية معندهاش شي صاحبتها من غير نسيمة.. كلشي بان هو هاداك.. كنت غانحماق.. اتهمتها باللي هي خاينة وباللي اللي فكرشها ماشي مني.. وللاسف.. كان العامري سبقني وبدا ينشرها فالدوار.. حتى كلشي ساق الخبار.. هربات رقية ومعاودتش شفتها من داك الوقت.. حاولت نقلب عليها ملقيتهاش.. وبعد عشرين عام .. عرفت انها ماتت.. وانها كانت مع نسيمة.. وعرفت انك كاينة.. فرح: المفروض نتيقك دابا.. المهدي: ضروري تيقيني.. نتي مخاصكش تبقاي فداك الدار.. هادوك اعداءك.. ماشي حبابك.. فرح: انا خاص نمشي.. انور غايتشطن عليا .. المهمدي: بنتي انا غاندير المستحيل باش ميوقعليك حتى مكروه معاهم فرح: انا راني مزيانة بزاف معاهم.. ومن الاحسن تبعد مني.. مشيت وخليتو.. صعيب باش ننسى صعيب تتمة قصة دودي العيساتس فوضت أمري لنسيان الحلقة 18 تأليف دودي العيساتي مشيت وانا كنفكر فالهضرة ديالو.. صافي عييت من كلشي.. مبقيتش قادرة اني نتحمل تكون تما شي اسرار اخرى اللي غاتصدمني مازال.. مشيت للفيرمة ودوزت نهاري مع بنتي وانا عقلي سارح.. حتى جا انور ولقاني فديك الحالة.. انور:حبيبة؟؟ مالك احياتي.. فرح: انور انا خايفة بزاف انور: خايفة!!! من اش فرح: من الماضي... قرب منها وعنقها .. انور:انا معاك.. متخافي من تا حاجة... حاول يطمئني ولكن عقلي كان مشوش.. دوزت داك النهار واتا كنفكر..واخيرا لقيت رجليا غاديين بيا لجهة البيت اللي كنا ساكنين فيه.. دخلت ومشيت لحوايج ماما.. ودموعي مزيرة عليهم .. بديت نجبد حتى لقيت صندوق صغير.. حليتو ولقيت فيه شي تصاور.. ديالها مللي كانت شابة.. وبزااف ديال واحد الشخص .. اكيد هو.. المهدي ... ومن بين هادشي بانلي واحد الكاسيط ..هزيتو.. غريب ماما مكانتش كتبغي الاغاني ابدا.. مشيت جبت المسجلة وحطيتها فيه وخدمتها... وبقيت كنسمع.. كانت هضرة ماما.. وكان باين جدا انها كانت كتبكي.. رقية: بنتي.. انا سجلتليك هاد الكاسيط.. وايلا كتاب شي نهار غاتسمعيه.. وايلا بديتي تسمعيه.. اكيد غادي نكون انا وقعاتلي شي حاجة.. حيت الاسرار اللي فيه..خطيرة بزااف.. بنتي انا.. قبل منقول اي حاجة.. بغيتك تبقى ديما كتدكريني بالخير.. بغيتك تعرفي اني كنبغيك ابنتي.. وداكشي اللي درتو فحياتي كلها.. درتو على قبلك..من نهار لاحني باباك ونتي فكرشي.. ومبغاش يعترف بيك.. وانا الدنيا تقلبات سفلها على علاها .. كلشي تبدل.. مشيت لعند صاحبتي.. نسيمة.. متستغربيش.. اه كانت صاحبتي.. حيت بابا كان صاحب باباها.. مشيت عندها.. وتما دارت بيا الدنيا.. مللي العامري قرر يستغل الفرصة.. لعب بيا كما بغا.. حيت ديما كان كيهددني بأنه يعرّف طريقي لعائلتي باش يقتلوني ويقتلوك.. حيت جبت ليهم العار.. خدا مني كلشي.. هو كيعرف يهدد مزيان.. بنتي حضي راسك منو.. اما نسيمة.. مهما كان..متعاديهاش.. حيت هي رغم كل داكشي اللي عرفات منتقماتش مني.. وصانت العشرك اللي كانت بيناتنا..، اما باباك..فقرارك نتي هو اللي غاديري.. نتي بيدك تسامحيه او لا.. ومتنسايش.. ان العامري هو الشيطان بنفسه.. سالا الكاسيط.. وانا قلبي مقبوظ.. اش غاندير.. سديت.. وخبت داكشي.. وخرجت من تما.. سديت الباب هاد المرة حيت هادشي مخاصش يشوفو شي واحد.. مشيت لبيتي وبقيت مع بنتي.. حتى جا انور.. وحط يدو على كتفي .. انور: حياتي.. مالك.. هاد الايام كتغيبي فالتفكير.. فاش كتفكري.. نقدر نعاونك.. فرح: كنفكر.. معرفتش شنو اللي خلاني نتمسك بيك.. بالرغم من كاع داكشي اللي داز عليا.. انور: يعني مازال ماسامحتيني.. فرح: انا سامحتك.. ولكن.. بغيت نعرف.. علاش كنتي باغي تتعدى عليا داك النهار.. وعلاش كنتي كتعدبني... وعلاش مفكرتيش تضربني شي مرة.. وكنتي كتبقى ساكت.. فاش كنتي كتفكر.. وعلاش مدافعتيش عليا قدام عادل.. وعلاش خليتيه ياخد مني الجلد بزز مني.. علاش وعلاش وعلاش.. انور: عندك الحق.. مهما حاولت نبرر ليك.. يمكن متقديش تيقي بيا.. غانبداو من الاول.. انا حاول غا نشدك وتخضعي ليا مكانش عندي داك التفكير دالاغتصاب من الاول.. حتى بديتي كتقاوميني عاد شديتك بزز.. متنسايش اني كنت واحد الانسان اللي غير نحط عيني على حاجة كتحضر وكتكون ليا.. هكا رباوني.. فطبيعي نبغيك تكوني ديالي،. تاني حاجة.. انا فالاول كنت فصدمة.. داكشي علاش كنت هكاك.. ومضربتكش حيت انا ماشي عدواني بطبعي.. ثالث حاجة مكنتش كندافع عليك حيت عادل كان مسيطر من صغرنا.. هضرتو كانت كتمشي عليا ديما.. ولكن نهار حسيت اني كنبغيك وقفت فوجهه ومقدرتش نسكت.. ودخلتو الحبس.. على قبلك نتي ... فرح:انا خايفة من هادشي.. حيت وقفتي فوجههم على قبلي.. خايفة من اللي جاي. انور: مدام انا كاين فالدنيا.. معندك مناش تخافي الحلقة 19 تأليف دودي العيساتي.. فرح: شنو رأيك.. نسامح المهدي ولا لا انور: هاداك قرارك نتي.. فرح: كلشي بغيتوني انا اللي نقرر.. انور: شكون حنا.. فرح: نسا غير كنهلوس.. انور: انا بغيت نشاركك حتى فهلوساتك.. فيمن كتفكري ههه فرح: ماما طبعا انور: الله يرحمها.. اجي بما انك جبدتي الماضي.. بيني وبينك.. عمرك مشفتي فيا شي نظرة اعجاب .. عمرك حلمتي بيا.. فرح: انا نظرتي كانت بسييطة.. كنت كنتمنى غير بيت صغيييور.. ونتا كنتي حلم كبييير عليا.. انور: كنبغيك بزااف افرح.. بزاااف.. فرح: حتى انا كنبغييك.. انور: اول مرة تخرج من فمك.. حاس اني طاير فالسما.. مجموعة مشاعر.، مقادرش نوصفها.. غير انا اللي حاس بيها.. مقادرش نعبر عليها.. غير بكلمة كنبغيك.. فرح: نتا انسان زوين بزاف انور.. ماشي بحالهم.. نتا كتشبه لماماك.. حتى هي قلبها زوين.. انور: يعني.. مامعصباش من ماما؟؟ فرح: لا.. عنقها بالجهد.. وبقاو مدة هكاك.. حتى سمعو غوات.. انور: اشواقع.. مشا كيجري.. ونزل لقا ماماه مع باه.. وكتبكي.. انور: شنو واقع اماما.. نسيمة: باباك مريض بزااف.. انا خايفة عليه.. سير جيب الطبيب عفاك.. انور: واخا انا ماشي... مشا انور كيجري.. وفرح بقات معاهم فالبيت وكتذكر هضرة ماماها.. شاف فيها العامري وبدا قلبها يضرب.. العامري: بغيت نهضر مع فرح... بوحدي.. زاد قلبها ضرب كتر حيت كانت كتخاف منو بزااف.. نسيمة: واخا... فرح بنتي عفاك.. متقصحيش معاه.. بحال الى حسات انه عدو ليا .. خاص نشد راسي.. ربما غايطلب مني نسامحو.. على مادار فيا .. ومدار فماما.. خرجو ملشي وبقيت بوحدي.. وبدا يهضر.. العامري: ماماك غاتبقى محفورة فبالي.. علاش كانت كتشوفو غير هو.. علاش انا لا.. بقات فيا الشمتة... ولكن.. هانا خديت منهم بجوج بنتهم.. وبزز عليهم بجوج.. بغيتي ولا كرهتي.. نتي مربوطة بيا الى الابد.. فرح: اش هاد الهضرة.. انا باقية مع انور بخاطري.. العامري: ولكن ماشي بخاطرهم هما.. انا غانحرق قلب المهدي عليك.. كما حرقت قلبو على رقية.. نتي مكتعرفيش شنو طرا لعائلة ماماك مللي عرفو بالفضيحة.. مازال تابعاهم الى اليوم.. ومغاديش يقدو يغسلو عارهم ويرفعو راسهم الا لوكانو قتلو رقية.. ولكن.. هي ماتت ماشي على يدهم.. وغادي يبغيو يقتلوك نتي وبنتك.. قلبي بدا يضرب بالجهد وخفت بزاف.. العامري: المهدي كان موكل يقتل رقية.. ولكنه ضعف .. ولكن احفاد جدك غايقومو بالواجب جريت خارجة من عندو دغيا وقلبي غايخرج من بلاصتو اشنو بغا من هادا طلعت لبيتي وسديت الباب وضميت بنتي وبقيت خايفة وكنفكر .. حتى سمعت انور جا وجاب معاه الطبيب .. الحلقة 20 تأليف دودي العيساتي دخل عندي انور.. ولقاني هازة بنتي .. انور: فرح فينك قلبت عليك ملقيتكش.. واش راك لاباس.. فرح: طمئنيني على باباك؟؟ انور: اه ، الطبيب قال انه خاص يرتاح ويشرب الدوا.. معندنا منديروليه.. هو كيفكر بزاف.. الاعصاب كيخليوه ينتكس.. فرح: انور انا خايفة.. انور: مناش افرح.. ياك كلشي تصلح دابا.. فرح: لا متصلح والو.. باباك هددني.. وقالي باللي غايجيو عائلة ماما يقتلوني.. انا وبنتي.. انور: اش هادشي كتقولي.. انا غاندفن اي واحد قرب منكم.. فرح: انور انا عارفة انك غاتحميني.. ولكن انا خايفة عليك حتى نتا.. باباك مكانش كيضحك معايا.. الشيء اللي كان كيهدد بيه ماما طول حياتها.. هاهو كيهددني بيه انا.. اشنو اللي خلى ماما تخضع ليه لو انها معارفاش انه عائلتها غايديروها .. انور: فرح.. واش بغيتي نمشيو من هنا؟؟ فرح: مبغيتكش تتخلى على عائلتك غلى قبلي.. نتا دخلتي خوك الحبس على قبلي.. مبغيتكش تتخلى على ماماك.. انور: اذا خلينا هنا وانا غانزيد الحراسة.. كنواعدك مغادي يمسك معايا والو.. فرح: شنو رأسك نمشي لعند المهدي.. نطلبو يدوي معاهم.. انور: انا قادر اني نحميك.. وايلا بغيتي تمشي لعند داك الراجل سيري.. ولكن عرفي ديك الساعة انك كتذبحيني وكتخلاي عليا... فرح: انا مقصدتش.. غير راني متوترة.. وخايفة بزااف... انور: انا عطيتك وعد..متخافي من والو.. فرح: واخا.. بقيت هكاك كناكل فجنابي.. وكنتحاشى داك الشيطان.. حتى لواحد النهار.. اللي مكنتش دايرة بحسابو.. نزلت انا وبنتي.. وبقيت كنتمشى بين الربيع.. حتى شفت شي ناس مكنعرفهمش.. واحد منهم ضربني لراسي وطحت.. ومبقيت عاقلة على والو.. حليت عيني لقيت شي ناس قدامي... مكنعرفهمش.. فرح: شكون نتوما.. المجهول: ماشي مهم.. نتي غادي تتقتلي فوسط الجماعة.. باش نقدرو نرفعو راسنا من جديد.. فرح: شنو ذنبي انا 😭انا ما درت والو.. المجهول: اه ما درتي والو ولكن امك دارت..ونتي غاتخلصي ما دارت.. فرح: ديرو فيا مابغيتو.. ولكن بنتي ردوها لباها.. انا والله حتى ولدتها بالزواج.. وبالحلال.. عفاكم ردوها لباها.. المجهول: معندنا سوق فبنتك.، حنا مهزيناهاش اصلا.. سكتت وعرفت ان نهايتي قربات.. فالفيرمة بقا كيقلب انور على فرح ومالقاهاش.. وكيسول كلشي حتى دخلات واحد الخدامة هازة مريم فيدها،. انورء: فين لقيتيها.. الخدامة: كانت بين الاشجار.. وفرح مكانتش معاها:، انور: ماما تهلايلي فبنتي.. انا غانمشي نقلب على فرح.. نسيمة: حضي راسك اولدي عفاك.. مشا انور لعند المهدي.. دخل وبدا يغوت عليه.. انور: فين مرتي .. فين مرتي.. المهدي: اش كتقول.. بنتي راها عندك.. غانقتلك الى طراتليها شي حاجة.. انور: نتا وعائلتك اللي خطفتوها.. هي كانت خايفة منكم بزاف.. انا اللي غانقتلك الى طرات ليها شي حاجة.. المهدي: اش كتقصد.. مصيبة الى خداوها ولاد عمامي.. هادوك مافقلبهم رحمة وغايقتلوها فوسط الجماعة.. انا خاص نعتقها.. مشاو كيجريو بجوج .. كل واخد ركب فطوموبيلتو.. اما فرح.، فبداو يجرجرو فيها ويجمعو ناس القبيلة باش يشوفوهم وهما كيغسلو عارهم.. الرجل: شوفو الجماعة.. شوفو اناس القبيلة.. هادي عارنا.. وغانغسلوه ليوم.. امها ماتت.. وليوم غاتتبعها،. بقات فرح خايفة وماعارفاش اش غاتدير.. البائسة اللي تكتب عليها تعيش البؤس فحياتها وللاسف حتى فموتها.. غاتموت وهي بائسة تأليف دودي العيساتي الحلقة 21 تأليف دودي العيساتي.. غمضات عينيها.. وهي كتشوف كل فرد من افراد القبيلة باغي فيها العذاب.. كل واحد اش كيقترح.. حتى سمعات صوت.. المهدي: حباااس.. هادي بنتي.. بنتي انا. وماشي بنت الحرام.. الرجل: اش كتقول امهدي.. خاص نغسلو عارنا وعار العائلة.. المهدي: انا اللي غويت رقية وتفليت عليها.. وخويت بيها.. هي معندها ذنب.. انا اللي نستاهل القتل ماشي بنتي.. وكنقولها هنا قدامكم كلكم.. انا هو الاب ديال فرح.. انا كنعترف بيها قدامكم وقدام العالم كله.. رقية بريئة وانا اللي ظلمتها... الرجل: وعلاش هربات.. نتا باغي غير تعتق البنت.. نتا كداب.. المهدي: كنقسم ليكم.. رقية بريئة.. وانا السباب فهادشي.. عفاكم.. متحرمونيش من بنتي بعدما لقيتها.. الى باغين تعاقبو شي حد.. عاقبوني انا.. وقتلوني انا.. بداو كيشوفو بيناتهم .. حتى ناض واحد بجلاية وشارف.. باينة فيه هو الشيخ ديال القبيلة.. الشيخ: طلقوها وخليوها تمشي بحالها.. حنا مكنعرفوش هاد البنت ومعندنا معاها والو... خليوها تمشي.. واللي فات مات.. رقية ماتت وتدفن معاها الماضي.. كلشي سمع هضرتو فجأة وجاو فكوني .. جا انور كيجري وعنقني.. انور: الحمد لله.. انا كنت غانموت الى طرات ليك شي حاجة.. كنت غانشعل العافية فهاد القبيلة باللي فيها.. فرح: ششش.. عندك يسمعك شي حد.. باينة فيهم مكيتسامحوش.. جرني وحطني قالطوموبيل.. وديمارا ومشا.. ومن الزاج شفت المهدي.. كان كيشوف فيا بضعف.. مشيت حتى للدار.. لقيت نسيمة كتسنى فيا وهي خايفة غير شافتني جرات عنقاتني.. نسيمة: بنتي.. الحمد لله يا ربي على سلامتك.. الحمد لله.. فرح: لالة نسيمة 😢 نسيمة: متبقايش تقوليلي لالة.. قوليلي ماما.. مم فرح: واخا اماما.. 😥 عنقتها وشفت موراها كانت ثورية كتشوف فيا بحقد.. داز داك النهار وانا مع انور مرتاحة.. وحاولت ننسى.. معنديش حل اخور من غير النسيان.. انور قدملي كل ما نتمناه.. ومبغيتش حتى حاجة من غير راحة البال.. حيت عييت.. املي فبنتي ونور عيني.. اني نشوفها عروسة قدام عيني فيوم من الايام.. تأليف دودي العيساتي الحلقة 22 والاخيرة تأليف دودي العيساتي فقنا على غوات غير طبيعي.. كانت امي نسيمة كتبكي.. هادا العامري مات وسلم روحه لبارئها،. مقدرتش نحزن ومنكدبش الى قلت ان جزء كبير من الخوف اللي كان لداخل ديالي اندثر وخفاف.. حيت كان ليه نصيب كبير منو.. مشا وخدا معاه دنوبه كلها.. خصوصا اللي دارها مع ماما.. تدفن وخيمت ملامح الحزن على الفيرمة.. خصوصا انور.. اللي حاولت نكون معاه فهاد الموقف بالتحديد... لاني حسيت انه حاس بالوحدة.. ومعارفش كيفاش يتصرف.. حسستو اني حداه بمعنى الكلمة.. دازت ايام وتنسى كلشي.. حتى لواحد النهار حلمت حلمة غريبة.. كنت كنتمشى وكنقلب على بنتي وانور.. فجأة شفت ماما وبديت كنتبعها وكنعيط عليها.. كانت كتبتعد بزاف ومكنتش كنلحق عليها.. حتى لقيت راسي وصلت للمقبرة.. شفتها جالسة قربت كان القبر ديالها وكان واحد الراجل جالس عندو وكيبكي.. وصوت بكاءه مسموع.. قربت وشفت فيه كان المهدي.. اللي من نهار عتقني معرفت عليه والو.. فجأة فقت.. لقيت راسي تعرقت بزاف.. فاق انور ولقاني هكاك وشعل الاباجور انور: حبيبة واش نتي لاباس؟؟ فرح: والو غير حلمت بماما.. انور: خير وسلام.. واش شي حلمة خايبة.. فرح: انا خاصني نمشي نزورها.. غدا نمشي واخا.. انور: نمشي معاك.. فرح: لا بلاش.. بغيت نمشي بوحدي.. انور: واخا على راحتك.. تهدني ورجعي تنعسي دابا.. فرح: واخا.. رجعت ننعس وبقيت كنفكر.. شنو معنى الحلم.. الصبح نضت بكري ومشيت للمقبرة.. مشيت للقبر ديالها وانا نلقاه جالس وكيبكي.. هو بنفسو المهدي.. ترددت بزاف قبل منقرب ليه.. مريم: الله يرحمها.. كانت هازة بزاف فقلبها.. المهدي( رفع راسو) : بنتي.. انا لو بقيت حياتي كلها كنرغبكم..باش تسامحوني.. نتي وماماك.. مغانغفرش لنفسي.. لو اني تيقتها فداك الوقت.. مكانتش رقية غاتكون هنا فالقبر.. تنفست بعمق.. ودويت.. وفاجئتو.. فرح: انا عييت.. وعييت اكتر من اللازم.. عييت من كلشي.. مكرهتش نتهدن.. انا ولى راسي كيحرق بالتفكير.. استنفذت الطاقة ديالي فيه.. عشت حوايج خايبين بزاف.. ومعنديش حل اخور من غير اني ننساهم.. انا مسامحاك.. ونتمنى تسامحك ماما فقبرها.. المهدي: واش بصح؟؟! فرح: اه حيت معنديش طاقة لشي صراعات اخرى.. حتى لو كان صراع داخلي.. مسامحاك وباغا نبدا معاك صفحة جديدة.. ومن ليوم.. عائلتي ولات نتا وماما نسيمة وانور ومريم.. المهدي: 😭 بنتي خليني نعنقك.. قربت منو وعنقتو.. كنت فالاول خايفة ولكن ارتاحيت من بعد.. غمضت عيني ورتاحيت.. مقدرش يحبس دموعه .. المهدي: عرفتي .. خوتك مشوقين يتعرفو عليك.. فرح: انا عندي خوت؟؟ المهدي: اه خوتك.. كلهم صغار منك.. مكرهوش يتعرفو على ختهم الكبيرة.. فرح: واخا غانشوف مع انور.. ونجيو نزوروك شي مرة.. ومعايا مريم.. المهدي: غانستناك على احر من الجمر.. عرفت انه متيقش راسو اني سمحتلو.. ولكن هضرتي فعلا كانت نابعة من القلب.. ضروري ما نصلح الماضي باش نقدر نعيش المستقبل.. وفعلا لاني عييت من جميع الصراعات.. والمفاجئات .. بعد ايام زرتو انا وانور وبنتنا .. وتعرفت على اخواتي.. وحتى مرات بابا اللي كانت فغاية اللباقة معايا.. كانو مضيافين معايا بزاف.. واخيرا استقرات حياتي.. وقدرت نتنفس من جديد.. انور قدر يسير اشغال عائلتو بقوة .. وقدرنا نعيشو حياة هادئة.. بنتي مريم كبرات قدام عيني.. وليوم انا حاملة بالمولود الثاني.. مريم: ماما فوقاش يجي خويا؟ فرح: قريب.. مريم: عمر واش شفتي ... انا غايكون عندي خويا قريب.. عمر: سعداتك.. فرح: غايكون خوك حتى نتا اعمر.. عمر: ولكن ماما.. فرح: نتوما ولاد عم.. يعني اخوة.. عمر: ولكن انا ومريم ماشي خوت.. حنا غانتزوجو مللي نكبرو.. انور: هههه اهيا ودي.. خاصك تقد براسك ديك الساعة نفكرو هعع.. بدينا نضحكو على عمر.. ولكن فالداخل ديالي كان خوف من هاد الجملة.. عمر ومريم.. بحال النار حدا البنزين.. ياخوفي من اللي جاي.. النهاية.. هادي نهاية الفصل الثاني من رواية البائسة .. موعدنا يتجدد مع الفصل الثالث.. ولكن هاد المرة الابطال غايكونو مريم وعمر.. بقصة مختلفة تماما.. تأليف دودي العيساتي