قصة البائسة للكاتبة دودي العيساتي

البائسة 1 دودي العيساتي ذالك الاحساس.. الذي يجعلك تعجز عن التنفس.. ويخنق انفاسك.. ذلك الاحساس الذي يجعلك ترى العالم كله يتشح بالسواد،.. ذلك الذي يجعلك ترى نهايتك اقرب اليك من حبل الوريد.. ذلك الذي يشعرك ان ابواب الحياة كلها مقفلة في وجهك.. وهو الذي يجعلك تعاود الاحساس بأنك لست ابدا على قيد الحياة..وانما جثة تمشي في الارض.. تملؤها السلبية .. انه الاحساس بالقهر.. زيرت على جسمي وانا كنتغطا بشالي.. حيت جاني البرد.. تحديدا فشهر 3 كان البرد والرياح كتهز شعري.. وانا كنطل للدنيا.. وكنشوف .. هزيت كارو وشعلتو.. وبقيت نسوط حتى كيبانلي الدخان واصل لنهاية البالكون.. كنت كنتعش وانا كنكمي.. وكنحس اني كنحرق كل بلاصة فجسمي ببطئ.. وكأني كنستمتع وانا كنقضي على نفسي وكنعدبها.. رشفة بعد رشفة .. ونهايتها غالبا كتكون فأني كنكوح.. وكيخرجو عينيا بالكحة.. بعدها كنلوح الكارو بلا منطفيه.. وكنشرب الما حيت مكنبقاش قادرة نتحمل اكثر.. دخلت للبيت.. اللي من اول يوم دخلت ليه كان جحيم ليا.. ونسيت الحياة او اني عشت فيوم من الايام.. كانت طفولتي متواضعة بزاف.. حليت عيني للدنيا ولقيت قدامي ام فقط.. اما الاب فتخلى علينا.. اللي فهمت بعدها انه عمر مكان عندي اب ابدا.. حيت الواليدة هزاتني فالحرام.. وهربات لهاد البلاصة خايفة من الفضيحة.. ولكن عمري لمتها حيت ولداتني بدون قانون.. ولا كرهتها.. مع اني معندي حتى حاجة كتثبت اني موجودة فالحياة.. شدات الخدمة فواحد الفيرمة .. مولاها كان واحد بوكرش كبيرة.. كلشي كان يخاف منو.. حتى الخدام ديالو.. كان عندو جوج ولاد.. وكانت ديما توصيني امي باش نبعد لساحتهم.. والبلاصة اللي يكونو فيها نبعد منها انا.. واحد كبير ومتسلط والاخر صغر منو ديما تابعو.. فالتحراميات.. وفالفعايل السيئة.. ديما معروفين.. انهم ولاد العامري.. وعندهم الحق فكلشي.. حنا خاطينا... ماحناش قدهم.. هادي هضرة ماما اللي كانت كتزيد تأكدلي اننا فقط دخلاء فالحياة.. وانه معندناش مكان فيها.. ولدت لاكون خادمة.. من نهار عقلت على راسي وانا هنا كنهز ونحط مع ماما.. وشادة فذيلها.. دايما كنا كنسمعو انا وياها التوبيخ،،من عند مولات الدار.. وراجلها تا هو.. كتوصل انه كيعاقبنا.. ولكن العقاب ديالها هي كان مختلف.. بحيث فرطات فما تبقى من شرفها وكرامتها.. لفائدة السي العامري.. طبعا باش يخلينا تحت ظله.. ويقبل بينا نسكنو هنا.. احسن من وحشة الزنقة .. كنت كندير عين ميكة على كلشي..وكندير ًراسي ما شفت والو وما سمعت والو.. كنخدم ونسكت.. اش بغيت كتر.. واكلة شاربة.. اش خاصني كتر.. هادو هما اسياد الكون.. وحنا العبيد.. خلقنا لنكون عبيد.. قاطع حبل افكاري ورجوعي الى الماضي.. الدقان فالباب.. هادي شي وحدة من الخدامات اللي كنت منهم.. الخدامة: لالة صونا لينا السي انور.. وطلب منا نشوفو واش خاصاك شي حاجة،. فرح: مخاصني والو.. سيري فحالك .. تأليف دودي العيساتي البائسة 2 تأليف دودي العيساتي.. اه سميتي فرح.. اسم على غير مسمى.. كان خاص تسميني ماما منحوسة.. ولا كآبة.. ولا بائسة علاش لا.. كانو غايجيو معايا هاد الاسماء وغايتوافقو مع هاد الحالة اللي راني فيها دابا..ولا نقول اللي من نهار تزاديت وانا فيها.. بعدما جريت على الخدامة..جلست كنشوف فالحالة اللي وصلت ليها.. وكنقارنها مع كيفاش كنت فالماضي وشنو اللي وصلني لهادشي كله.. زدت من المرايا وشفت فوجهي اللي فيه ندبة كبيرة كتحكي حكاية .. ووجهي اللي ولى زرق.. والهالات السوداء كبار كيتوسطوهم عينيا اللي تنفخو تلقائيا بسبب كمية البكا اللي بكيتها فحياتي.. دابا نشفو عينيا من الدموع.. ولاو هيئتهم بحال شي عجوز.. رجعت بيا الذاكرة من جديد الى الوراء.. ديك البنت اللي كانت دايما جامعة شعرها ومرجعاه اللور.. ولباسها متواضع جدا.. غالبا كيكون من البقايا اللي كتعطيهم ليا مولات الدار سنويا.. وكنفتسموهم مع الخدامات.. صاية طوية وبودي .. وصندالة دالميكة.. كنت كنعاون ماما ولكن ولات مولات الدار كتقصد انها تعطيني مهمات خاصة ليا.. كل مرة فين مصيفطاتي.. باقي نعقل.. مللي مشيت نجمع شوية العنب من الفيرمة .. تشهاتو مادام نسيمة.. هزيت القفة وتمشيت وانا فأوج النية ديالي فالدنيا.. وبديت كنجبد العنب ونحط فالقفة.. حتى سمعت شي حركة ماشي هي هاديك قريب للدالية.. ناري عندك يكون شي حنش..خفت وخرجت باش نشوف شنو كاين تما.. حتى لقيتهم كيضحكو.. كان ولد السي العامري.. انور.. ولدو الصغير.. ولكنه كان اكبر مني.. وكان معاه ولد عمو.. وشي دري اخور معرفتوش.. جاتي الخوف خصوصا ان ضحكاتهم كانت مخيفة وشيطانية.. منين ما جيت نهرب نلقا واحد منهم واقفلي.. خفت بزاف.. حتى الغوات من الداخل ديالي مبغاش يخرج.. فشلو عليا الركابي.. ومعرفت ما ندير.. هي قوة الاهية اللي عتقاتني.. مللي داز احد الخدامة .. واظطرو مللي شافوه انهم ينساحبو.. تنفست الصعداء.. وخديت القفة دغيا وجريت للدار.. موقفت حتى تقطع فيا النفس.. دخلت دغيا للكوزينة ولقاتني ماما صفرا.. بدات كتسول فيا مالكي.. تحججت بأني شفت حنش.. مقدرتش ندوي.. من اش غانشكي ليها،. هي اللي مقادرة ترفع راسها فيهم.. كيفاش غاتاخدلي حقي منهم.. هي اللي علماتني اننا مامنحقنا حتى حاجة فالدنيا.. واننا مخلوقات غا للتكرفيص.. يعني بلا منحلم بشي حاجة كبر مني.. دوك الايام كانت الخدمة بزاف فالدار.. حيت عادل الابن الاكبر للسي العامري غادي يتزوج ببنت شي واحد حتى هو عندو فيرمات .. يعني بنت الفشوش بحالهم.. بقينا خدامات ومعندناش الوقت حتى نعسو.. دوز العرس فالفيرمة.. وانا كنت فرحانة وناسية كاع داكشي اللي دار السي انور ورباعتو.. حيت الخير تزلع.. والماكلة موجود وكناكل بلا قياس.. وبلا منخاف تسالا الماكلة.. ولا نحطهالهم ناقصة.. كلشي بالزايد.. وانا واخا تمارة حيدت القنط وانا كنشوف الشيخات والدقايقية اللي جابو.. عجبني الحال واخا ماشي من حقي نخرج عندهم.. ونشطح فوسطهم.. بقا فخانة الاحلام كالعادة.. الاحلام المنسية.. داز العرس.. والعروسة رافعة قنانفها.. ومحاملة حد..بسيف .. هي بنت من.. ماشي بحالي معندي طاسيلة.. اما السي عادل فرحان بزاف .. حسدتهم فهاد اللحظة.. واش زعما غايجي شي نهار اللي نكون فبلاصتهم..ونفرح بحالهم.. بقيت كنسربي وفرحانة.. دخلت الكوزينة باش نجيب الكيسان نفرقهم .. ضرت وانا نلقى السي انور داخل وبنفس الضحكة الشريرة.. انور: افين العود.. 😈 فرح: اا السي انور!!! خاصاك شي حاجة..!! انور: والو غا شفتك عييتي.. وجيت نشوفك واش نتي خاصاك شي حاجة.. فرح: حااشا اسي انوور حاشا.. بدا كيقرب مني ويحط يدو على راسي.. وانا الرعب مزعزع كياني.. فرح: ااا سي انور انا خاصني نعطي للناس كيستناو.. لحسن الحظ مشدنيش وهربت دغيا .. مشيت للناس وانا حمرا.. هاد الناس حاسين راسهم ملاك الحياة.. هو وباه وخوه.. الله يبعدهم من ساحتي.. اش بغا من وحدة دريويشة بحالي.. مبغيت لا مشاكل لا حتى حاجة فالدنيا.. تأليف دودي العيساتي.. البائسة 3 تأليف دودي العيساتي سالا العرس وجمعنا وطوينا.. وليت منين ما دزت نلقاه كيشوف فيا ويضحك.. مبقيتش واخذة راحتي فهاد الدار.. وليت ديما شادة فأمي.. وكنخاف نمشي لشي بلاصة بلا بيها... حيت كنخاف يستفرد بيا.. حتى لواحد النهار.. سمعت انهم باغين يخطبوليه واحد البنت.. من بنات النخبة.. وباللي هو كيبغيها.. عاد تهدنت شوية.. يمكن الخطبة ديالو غادي تخليه يتهدن من جبهتي شوية..ويبعد من طريقي.. انا خايفة بزاف وماشي قدهم.. الى مشاو حتى شمو خبر انه كيشوف جيهتي وصاف ماشي بعيد انهم يجريو علينا انا وماما من الدار .. وحنا لا حنين لا رحيم.. وبلا انه هادو معرووفين بزاف فالساحة.. باللي كيلعبو ببنات الناس كما بغاو وكيلوحوهم.. كيحساب ليهم باللي اي وحدة ختاروها راها من حقهم.. وخاصهم يمتلكوها.. كما بغاو.. انا خاطيني .. انا غا بنت دريويشة.. كالعادة .. كنسيقو وكنخملو.. وفوسط هادشي كله كانت كتعطيني ماما الصينية فيها اتاي باش نعطيها لهادوك اللي خدامين فالفيرمة.. وكان من بينهم.. واحد كان ديما كيشوف فيا وكيضحك عندي..ومكانش كيتجرأ انه يهضر ولا يقرب.. والصراحة حسيت من جيهتو بشي حاجة.. بديت كنضحك ليه حتى انا كلما ديت ليهم اتاي ولا شي حاجة اخرى.. لدرجة اني .. وليت قبل مانمشي لعندهم كنشوف فالمرايا.. غا باش نشوف كيفاش كيشوفني.. وواش بالصح انا زوينة ولا .. وليت كنفكر ماما بأنه خاص نوجدو ليهم ما ياكلو وما يشربو.. حتى الما وليت كنديه ليهم.. غير باش نشوفو.. انور تجمع من جيهتي ومابقاش كيضور بساحتي.. ووليت كنفكر غا فداك السيد.. اللي داها فبنت الخدامة.. وليت كنحلم انه غادي يتزوجني.. ويقولي جلسي من الخدمة..وغانولدو ولادنا.. ونتهناو من هاد تمارة اللي من صغري وانا كابرة فيها.. واحد النهار لقيتو كيدق فباب الكوزينة..وجايب الصينية بيدو.. انا قلبي ديك الساعة كان غايوقف.. حماريت.. وبديت كنضحك غا بوحدي.. هو هضر.. - واش كاينة لالة رقية.. بغيت نهضر معاها شوية - ااه كاينة.. مامااا.. تكلمي.. خرجات عندو امي.. وانا دخلت لداخل.. شفتو كان كيهضر معاها وانا مكنسمع والو.. حتى سالاو ودخلات ماما.. مشيت عندها ديريكت.. فرح: ماما.. شنو بغا هاداك رقية: باغي يخطب. 🌝 حسيت ديك الساعة اني ملكت الدنيا كلها.. وحسيت اني انسان ولو للحظة .. احلامي غادي يتحققو.. وغادي نخرج من هنا.. وندير داري.. فرح: احم.. وشنو قلتيلو.. رقية: قلتلو لا.. فرح: 😳 وو.. وعلاش!!! رقية: نتي معندك حتى شهادة.. باش غاتزوجي.. فرح: الله يجعلني نتزوج غا بالفاتحة.. رقية: شتك ملهوفة على الزواج.. 😒 فرح: اماما الله يهديك.. واش عاجباك الذل اللي انا عايشة فيه هنا.. بغيت نخرج من هنا وندير داري.. عفاك اماما قوليلو اه.. رقية: يكون خير.. فرحت مللي قالتلي هكاك.. ومشيت كنجري نقلب عليه.. هادا اللي معارفك حتى سميتو.. وانا نتقابل مع السي انور.. شاف فيا مزيان ومهضرش.. حنيت راسي ودزت.. ها علاش بغيت نتزوج.. غا باش نبعد من هاد الناس.. وصلت للعمال.. وشافني هو .. جا عندي.. - لاباس عليك 😊 - الحمد لله ونتا.. - انا الحمد لله.. واش قالتلك خالتي رقية شي حاجة.. - اه قالتلي.. وانا موافقة.. - 😅بالصح.. انا فرحان بزااف.. - انا معنديش الوراق.. وقلت لماما اننا نتزوجو غا بالفاتحة.. - متخافيش.. انا غادي نمشي نسوليك على هادشي.. وغادي نلقاو حل.. - مقلتيليش شنو سميتك..😊 - انا جواد.. - واخا اجواد.. انا غانستناك... 😌 مشيت وانا حشمانة.. وفنفس الوقت مسايعانيش الفرحة.. واخيرا .. غاتضحكلي الدنيا تأليف دودي العيساتي البائسة 4 تأليف دودي العيساتي بقيت كنفكر فجواد وفشنو ممكن نديرو انا وياه.. قدرت نقنع ماما بيه.. وفكرتها بوضعها.. اكيد اي بنت مبغاتش تعيش بنتها داكشي اللي عاشتو هي..وحتى جواد جابلي خبار زوينة.. وقالي باللي هو اننا نقدرو نديرو العقد واخا ماعنديش الازدياد.. مكنعرف والو فداكشي ..وماهتاميتش.. انا كايهمني غير نتزوج ونخرج من هاد تمارة.. ومن هاد الذل ديال هاد الناس .. بقيت مدوزة نهاري عادي .. وناشطة.. مولات الدار: اجي افرح.. سيري لبيت الخزين ستفي داك الروينة اللي دارولي تما الخدامة.. راهم لاحو تما كاع الحوايج اللي صبغو بيهم داك المرة.. فرح: واخا الالة.. تمشيت وانا فرجلي صندالة ديال الصبع.. طول الطريق وانا كنسمع حس واثر ديال شي حد مورايا.. كنتقلب ومكنلقا حد.. اكيد غا كيجيبلي الله.. حتى وصلت لبيت الخزين ..دخلت ولقيتو كلو مكركب.. بقيت كنجمع ونرتب.. مع هو كان كبير.. شوية وانا نسمع الباب مورايا تسدات.. قلبي ضرب.. ضرت لقيت قدامي السي انور وفوجه ابتسامة ماكرة.. فرح: ش شنو بغيتي ؟؟ انور: شوووت.. بغيت غا نجلسو شوية.. متخافيش.. تم غادي جيهتي وانا كنرجع اللور وكنرجف.. فرح: خليني نمشي ماما كتسنى فيا.. انور: غادي تمشي ..، ولا بلاتي شوية.. 😈 بقا غادي جيهتي حتى تساطحت مع الحيط.. قرب مني حط يدو على راسي وانا ننترها وجيت نهرب.. عمر شي حد مقاسني حيت نفسي عزيزة.. ومكنرضاش على راسي الحرام..هو شدني وزدحني فالارض.. وبدا يشد يديا .. وانا كنغوت وكنتركل.. محملتوش يقيسني.. قطع عليا الكسوة .. وانا زاد قلبي اكتر.. مستحيل يديرها بيا.. مستحيل ياخد مني شي حاجة.. انا غانتزوج وغادي نبعد من هنا.. بقيت كنحاول نلقا اي حاجة نعتق بيها راسي.. من حسن حظي انه طاحت بواطة اثناء مصارعته معايا.. كانت فيها داكشي اللي كيستعملو للزرع.. لقيت واحد القرعة .. ولحتها عليه بالجهد.. شوية وهو ينوض كيغوت وحاط يدو على وجهو.. وغواتو كان قوي بزاف.. استغليتها فرصة.. ونضت دغيا جريت حليت الباب وطلقت رجليا للرياح وانا معارفة فين غادية.. عارفة انهم غايعاقبوني وغايعطيو الحق للسيد.. انا مدرتلو والو بالمقارنة مع داكشي اللي دارلي هو.. بقيت كنجري وانا خايفة..ومعارفاش راسي.. فين غادية كاع.. انور بقا كيغوت بالجهد حتى سمعو ليه العمال ومشاو كيجريو.. لقاو كيتحرق بالالم.. ووجهو كله دم.. حيت تضرب بالاسيد.. (الحمض) المادة للي كلات وجهه كله.. وبقات كتاكل فيه.. جراو عيطو لباه ولخوه للي بدورهم جاو كيجريو .. وداوه للسبيطار.. وامه طلقاتها بغوتة وهي مفاهمة اش وصل ولدها لهاد الحالة.. كلشي كان مصدوم .. ومعارف اش واقع.. داوه دغيا للسبيطار.. اللي داروليه غا الاسعافات الاولية.. وطلبو منهن يديوه لطبيب اختصاصي.. حيت وجهه تضرر بزاف.. بقيت مخبية مور واحد الشجرة حتى ظلام الحال.. وقلبي كيضرب بالجهد.. ورجليا فشلو عليا ومبقيتش قادة نحركهم.. بالخوف وبالعيا.. كنت قريبة للطريق.. وكنستنى جواد... هو اللي جا فبالي ديك الساعة.. كان كل دقيقة يدوز واحد.. وانا الرعب فات حدوده فيا..تنفست مللي شفتو وعيطليه.. هو تفاجأ مللي شافني.. جواد: فرح 😳 اش كديري هنا فهاد الوقت.. فرح: عفاك خبيني عندك.. انا خايفة بزاف.. جواد: واخا اجي معايا.. تمشيت وانا خايفة يخرجلي شي واحد منهم.. يقتلني.. وفكرت فماما شنو غاتكون دايرة دابا.. حتى وصلنا لواحد الدار صغيرة .. ساكن فيها جواد بوحده.. دخلت وانا خايفة.. جواد: دخلي رتاحي.. عاوديلي شنو وااقع.. فرح: 😭 داك الحيوان تهجم عليا 😭 وكان باغي .. جواد: 😳 يعني نتي اللي ضربتيه بلاسيد لوجهه.. فرح: اه 😭 جواد: واش عرفتي راسك شنو درتي.. راه غادي يقتلوك.. هاداك لاسيد راه خطير وكيشوه الى حتى قاس الجلد.. ومعندو دوا.. فرح: الله يجعلو يبقى مشوه حياتو كاملة.. وشنو كنتي باغيني ندير.. واش نخليه؟؟ جواد: حنا طحنا فمشكلة كبيرة.. وايلا عرفو اني مخبيك عندي هنا غادي يقتلوني معاك.. فرح: مغايعرفوش.. جواد: فرح انا ماشي ديال المشاكل.. انا كنت ناوي نتزوج بيك باش نتهنى.. ماشي .. فرح: غاتخليني برا؟؟؟ 😭 جواد: سيري عند ماماك وحاولو تهربو بجوج.. تمشيو من هنا.. فرح: ونتا؟ 😭 مبقيتيش غا.. جواد: سمحيلي.. ولكن انا ماشي قد هادوك الناس.. انا غا خدام جورني.. نتي اللي وحلتي راسك فهادشي.. انا ماشي ذنبي.. عفاك سيري من هنا دابا.. اش هادشي واقعلي.. واش حتى واحد ميضحي على قبلك فهاد الدنيا.. تمشيت وانا رجليا فاشلين... وخرجت ومشفتش فيه.. بقيت كنتمشى وانا خايفة.. حتى وصلت لحدا واحد الحجرة كبيرة .. وهما يطيحو ليا ركابيا..مقديتش نزيد عاد.. تأليف دودي العيساتي البائسة 5 تأليف دودي العيساتي مازال كنعقل على هادوك الاحداث مزيان.. وقلبي مازال كيضرب مللي كنتفكرها كأنها وقعات البارح.. وشكون غاينساها.. وهي المرحلة اللي تقلبات فيها الارض عليا سفاها على علاها..مكنقدرش نتحمل نتفكرها.. كناخد من جديد كارو وكنشعلو باش يخنقني من جديد.. واخا مكنلقاش فيه داك الراحة ديالي.. ومكنكرهش نلقا سم.. ونقتل بيه راسي.. ولكن سيدهم انور منع عليا كلشي .. وخبا عليا كلشي.. حتى من كنينة الراس اللي ديما كيحرقلي....وكيرجع تفكيري لداك الايام تاني وانا كنحرق الكارو وكنحرق معاه صحتي وروحي.. فاق انور وباباه وامه حداه كيبكيو وحتى خوه.. عادل: شكون دارليك هادشي.. قولي شكون وانا غانفعصو برجليا.. انور: شنو وقعلي 😪 واش وجهي مشا ؟؟ صافي.. عادل: دوي شنو وقع .. شكون دارها.. انور: ف.. فرح بنت رقية.. هي اللي دارتهالي.. كلشي تصدم.. فرح كيفاش تجرآت وهي مابايناش فيها.. عادل: انا غاندمها،. غانقتلها.. خرج من السبيطار كيجري .. بقيت فالزنقة والبرد بزاف وانا معندي حوايج.. وكنفكر فهاد المصيبة اللي طاحت عليا..واش ماشي من حقي انا نفرح.. ونرتاح.. حلمت حلمة بسيطة بزاف..وطاحت على راسي.. فكرت فشنو قالي جواد.. اني نشوف ماما ونهربو من هنا.. تمشيت وانا خايفة يشدوني.. كنحضي جنابي.. حتى وصلت.. بقيت كنشوف.. ونتخبا بين الاشجار.. حتى بانلي داك عادل مخرج امي ومجرجرها وهي مافيها جهد ولا صحة.. عادل: فين ديك الق.. ديال بنتك.. فين هااا.. ضرني خاطري.. مقدرتش نتحمل داك المنظر.. الا ماما.. هي اللي عندي فالدنيا.. جريت عندها وبلا منحس.. فرح: انا هنا.. طلق ماما هي مادارت والو.. جا شدني من شعري ونظرات الشر كيبانولي فعينيه.. جرني بعنف كبير.. وداني لنفس الخزين.. لاحني فواحد القنت فيه.. جا شدني من شعري وعطاني بواحد الطرشة حتى حسيت الدم ترش ليا من نيفي.. بدا بعدها كيضرب بطرشات متتالية وانا ساكتة.. بعدها بدا باللكمات.. حتى خلا وجهي كله زرق.. وكله دم.. بعدها بدا بالركلات.. كيضرب وكينهج..حتى عيا وحقده باقي ما سالا.. ناض وقال لواحد من رجاله يكتفني.. وانا كنت حاسة انه مابقا فيا حتى عظم صحيح فجسمي.. حسيت ان ساعتي سالات وان نهايتي قربات.. هادو اكيد غادي يقتلوني لا محالة.. سدو عليا تما.. حتى سمعت امي كترغب فيهم يطلقوني.. بعدها ماسمعتش حسها.. غايكونو قتلوها.. غانموت الى وقعات ليها شي حاجة .. بقيت خايفة وانا جسمي كيحرق.. بقيت مدة فداك البيت.. والخوف تسرسب لاعماقي مكرهتش هاد الساعة ياخد الله روحي ونتهنا.. حسيت بشي تخرشيش.. حتى لقيت الفيران كيخرجو باش يضورو حدايا .. وانا كنخاف منهم بزاف.. 😭 بقيت شادة راسي وحاسة اني فالجحيم.. اضافة الى ان جسمي كان كله مضروب والدم كينزل من وجهي كله.. شوية سمعت الباب تحل.. قلبي تقبط من جديد.. لقيت واحد من العمال جايب سطل كبير.. ولاحو عليا.. كان الما كيحرقني بزاف فوجهي وفجسمي.. معرفتش واش ملحوه يمكن.. ولد الحرام.. عارف اني مجروحة.. وباغيني نبقا فهاد العذاب بزاف.. الله ياخد فيك الحق اعادل..دعيتك لله.. بقيت فداك العذاب.. حتى وضعية مريحاتني..الغد ليه صبحو عليا.. بعدما كان داني شوية النعاس..حلو الباب ودخلو الكلاب وسدوه تاني.. جاو كينبحو وكيشمشمو،. ديك الساعة فشلت ديال بالصح وطلقتها فحوايجي... شفتهم جايين عندي وانا مرعوبة.. بقيت كنغوت ونرتكل.. حيت اعدى حاجة عندي هي الحيوانات.. واحد من دوك الكلاب عظني من يدي مع هو عندو النياب كبار.. حسيت راسي غادي نموت تما.. وفعلا غيبت ومعقلتش على راسي تاني تأليف دودي العيساتي البائسة 6 تأليف دودي العيساتي تحلات عليا الباب ودخل انور.. انا عمري مشفتو انور.. وانما ظلام.. هو اللي ظلم عليا حياتي.. لقاني كنكمي..جا حيد الكارو من يدي.. انور: ياك كانقولك هاد الزمر خايب لصحتك..نسيتي شنو قال الطبيب.. كالعادة ومنذ 5 سنين وانا مازلت كنشوف فيه بلا ماننطق حتى كلمة.. حتى بدا يشك اني وليت زيزونة.. انور: قالولي باللي ماكليتيش.. علاش؟؟ واش باغا نعلقليك السيرو تاني.. بقيت كنشوف قدامي وانا نرجع للماضي من جديد.. مللي فيقوني وهما كيضربو وجهي بالما بدون شفقة ولا رحمة.. بقيت كنشوف كأني كنحلم.. وباللي داكشي مرانيش عايشة فيه.. عادل: دوي الكلبة.. شكون صيفطلك تديري ديك الحالة لخويا.. شكون عطاك المقابل.. دوي ولا ليوم نكمل تهراس ما بقا من عضامك.. فرح: اهئ اهئ والله ما بالعاني.. هو.. هو اللي حاول يتعدا عليا.. وانا دافعت غا على راسي.. تفاجأ من كلامي.. وشويك وهو يعطيني بركلة زلزليا ضلوعي.. عادل: كدابة.. 😡.. انا غانربيك.. بدا يضرب من جديد.. حتى مابقيتش نحس بظلوعي.. فوسط الضرب بانليا جواد واقف مع العمال وهو كيشوف فيا.. ومتحركات فيه حتى شعرة وانا كناكل الدق.. بقا فيا راسي اللي حلمت بالزايد.. رجعت من جديد للحاضر.. بعدما لقيتو كيشير ليا بيديه.. انور: هييه.. فاش كتفكري.. كالعادة مجاوبتوش.. حيت معندي منقوله.. انور: انا كنحاول معاك بكل الطرق.. ولكن نتي .. مبغيتيش تنساي.. ننسا!!! شنو ننسى.. النسيان الوحيد للي نسيتو فهاد اللحظة هو اني على قيد الحياة.. انور: انا وجدت باش نمشيو نسافرو..تبدلي هاد الجو شوية.. فرح: لا جواب انور: (بعصبية) الى نتي مكيهمكش راسك فكري غا فداكشي اللي فكرشك.. شنو ذنبه.. انا مغانسمحليكش توقع ليه شي حاجة.. داكشي اللي فكرشي!! داكشي اللي فكرشي!! هيجني من جديد.. انا واش غانولد بائس او بائسة اخرى لهاد الدنيا.. انا خاص نقتلو ارحم ليه.. من انه يتزاد مع هاد الناس لهاد الدنيا.. فرح: غنقتلوو.. غانقتلو.. انور(بصدمة) : شنوو.. واش تسطيتي.. فرح: مغانولدوش سمعتي.. غانقتلو.. تصدم انور من ردة فعلي.. وناض من حدايا بهدوء.. خدا تلفونو وخرج البالكون يهضر.. وانا عقلي كيدي ويجيب.. وكنفكر انه مستحيل نولد شي حاجة لهاد الناس.. ولهاد الدنيا.. مخاصش يتزاد.. يا ريت فكرو فيا والديا حتى انا بهاد الطريقة.. وقتلوني.. ولا هاد الحياة اللي ماشفتش فيها نهار زوين.. رجع عندي انور.. وبقا كيشوف فيا بهدوء.. وانا كنحيد عينيا منو.. حتى سمعت الدقان فالباب.. مشا فتح الباب.. وجات واحد البنت هازة معاها شي حاجة.. شدني انور.. وزير عليا وانا محاملاهش.. فرد يدي.. وعطاهالها.. اما هي دكات ليا فيها واحد الشوكة.. محرقاتش ليا حيت الالم انا نسيتو شحال هادا.. حسيت بهدوء وتبلد.. كيعجبني هاد الاحساس.. ومكرهتش نحس بيه الى الابد.. تأليف دودي العيساتي البائسة - الحلقة 7 تأليف دودي العيساتي فالمستشفى كان انور ناعس ووجهو كل مضمد .. جاو عائلتو طلو عليه .. ومن بينهم كانت خطيبتو.. ريم: على سلامتك.. انور(شد فيدها) : الله يسلمك.. متخافيش .. انا غادي نولي لاباس.. ووجهي غايرجع كما كان.. ريم: انشاء الله.. كلشي تأثر بيه.. ومشات ريم.. وخرجات معاها الام ديال انور.. ريم: خالتي .. معرفتش اش غانقولك.. ولكن منقدروش نستمرو فهاد العلاقة كتر.. عفاك عطي هاد الخاتم لأنور.. والله يشافيه.. الام: اشهادشي ابنتي.. واش غاتخلاي عليه فعز الازمة اللي راه فيه.. ريم: سمحيلي ولكن انا منقدرش ندوز حياتي مع واحد وجهو مشوه.. انا مازال صغيرة وباغية نعيش حياتي .. بالسلامة.. خلاتها مصدومة ومشات.. بقات الام فديك الحالة.. شوية وهي تدخل عند ولدها.. انور: ماما.. فين هي ريم.. الام: ( بتنهد) ولدي سمعني..مم نتا مازال شاب وغاتلقا اللي غاتستاهلك.. واللي غاتجي معاك وتواتيك.. واكيد غاتكون زوينة.. وقلبها زوين.. وغادي تكون كتبغيك.. انور: مبقاتش باغاني.. 😭 الام: مكاتستاهلكش تيق بيا.. الحمد لله انها بانت على حقيقتها من دابا حسن مكنتو غاتزوجو وديرو الاولاد.. انور: عندها الحق شكون اللي تقبل تتزوج بواحد وجهه مشوه.. مسخ.. الام: ولدي متقولش على راسك هكاك نتا مازال غاتعالج.. وغاتولي لاباس.. انور: انا حياتي ضاعت اماما.. وليت مسخ .. الام: 😭 متقولش على راسك هاكا اولدي.. غاتولي لاباس.. انا مستعدة اني نخسر فلوسي كلها باش ترجع كما كنتي.. الله ياخد الحق فاللي كان سباب.. انور: اللي كان السبب!! حقي غاناخدو بيدي.. شحال ما طال الزمان .. بقا انور في انهيار تام.. وامه حداه.. حليت عيني من جديد ولكن هاد المرة كنحس بألم كبير.. كل بلاصة فجسمي كتحرق .. راسي تقيل عليا ويدي كنحس بيها مضرورة بزاف.. وكرشي خاوية.. كنت كنحس بالقوة فشلات عليا وبالجوع.. تحلات الباب .. وقلبي تقبط من جديد .. ولكن مقديتش نهز راسي نشوف فيه من جديد.. ونشوف هاد العذاب اللي موجد ليا هاد المرة .. اصلا معرفتش كيفاش باقي فيا الروح لحد الان.. لقيت الصمت المطبق.. حتى سمعت الصوت الخشن.. كان الاب ديالهم هادا.. الاب: ماشي هاكا اعادل.. هزوها للمستوصف حالا.. الى ماتت غاتكون مصيبة.. عادل: خليها تموت.. حثالة بحال هادي لاش غاتعيش .. الاب: واش باغي تخرج على راسك.. انا ما مستعدش يضيعو جوج من ولادي بسبابها .. ديوها للسبيطار.. وانا عارف اش ندير معاها .. اش غايكون كيستناني يا ترى.. واش غايعاقبني كما كان كيعاقب ماما .. بطريقتو.. مغانقبلش.. كنفضل يقتلني عادل على انه يقرب مني.. تأليف دودي العيساتي البائسة- الحلقة 8 تأليف دودي العيساتي داوني للمستوصف وهضرو مع الطبيب بعيد عليا.. اكيد مغايقدش يهضر وغايداويني في سكوت.. كنت كنحس ان كل بلاصة فجسمي كتحرق.. كنت كنشوف فالطبيب والفرملي نظرات الشفقة والاسف على حالتي وعلى داكشي اللي كيستناني.. طبعا هما فخبارهم كما جميع الناس بداكشي اللي درت.. للحظة تمنيت لو اني خليتو يدير فيا ما بغا .. كنت غادي نوض ونهرب .. نخلي البلاد كما دارت امي زمان .. كنت على الاقل مغانوصلش لهاد الحالة من الذل.. ذنبي اني تمنيت نكون انسانة.. واني نعيش..ولكن لقيت الضرب والاذى.. نعست ومعرفت راسي فين.. بعدما دكولي ابرة.. غاتكون مهدئة.. ورتاحيت.. معرفتش شحال نعست فقت لقيت الضوء خافت والدنيا ليل.. ويدي مجبصة.. والحريق رجع عليا تاني.. سكتت وقلت فنفسي احسن من الدق ديالهم .. على الاقل منشوفش كمامرهم.. بقيت تما داك النهار..جا الطبيب واستغليتها فرصة نهضر معاك.. الطبيب: واش لاباس شوية.. فرح: عفاك عاوني نهرب منهم .. عفاك.. الطبيب: ولكن انا منقدش على البطش ديال العمراني وولادو.. كنظن انك عارفة هادشي.. سمحيلي بزاف ولكن.. انا منقدر نفيدك بوالو .. قلبت وجهي وانا كنبكي.. وكنفكر ان الدنيا كلها تخلات عليا.. خليتهم حتى تشغلو بشي مرضى.. ونضت بزز وانا كنحس بضلوعي مازال كيحرقو.. ولكن كان عندي امل اني نقدر نهرب.. بقيت كنتمشى بصعوبة كبيرة.. حتى وصلت للباب.. وخرجت بلا مايشوفني شي حد.. بقيت كنجري ببطئ.. وكنطيح وخايفة انه يلقاوني.. الاشجار محيطة بيا فكل بلاصة.. انا مكنتش عارفة منين نخرج اولا منين ندخل .. عمري خرجت من الفيرمة.. تزدت ولقيت راسي فيها.. وكبرت فيها وعمري خرجت ابدا.. بقيت كنجري.. لقيت الدم فيدي .. ومديتهاش فيه.. يمكن بلاصة السيرو هي اللي تجرحات.. حسيت ان القوة مبقاتش فيا كاع.. وولى كلشي قدامي ضباب.. طحت على ركابيا.. وبعدها غبت ومبقيت عاقلة على والو.. بعدما لاحظ الفرملي ان فرح مكايناش عيط للطبيب دغيا وعلمو.. وبعد تردد عيطو لعادل وخبروه بكلشي.. جا عندهم جاعر.. وشد فالطبيب.. عادل: انت اللي عاونتيها تهرب نتا.. انا غاندمك انا غانخلي دار بوك.. بقا الطبيب كيحاول يبرر ليه ويقنعو باللي معاونها حد.. حتى جاو شي ناس هازين فرح ومدخلينها للمستوصف وهي فحالة اغماء.. الرجل: دوكتور لقينا هاد البنت طايحة.. الطبيب: دخلها دغيا نديرو ليها الاسعافات الضرورية.. عادل: انا مغاديش نخليها هنا.. غادي ناخدها للفيرمة.. وديك الساعة اجي داويها تما.. الطبيب: واش بغيتي الدرية تموت.. راها محالاش حتى عينيها.. عادل: تموت ولا تخنق وانا مالي.. انا باغي حق خويا فهمتي.. وغاندمها على داكشي اللي دارت فيه.. هزها عادل ومشا حطها فالطوموبيل.. وديمارا ومشا والطبيب بقا كيشوف فيه.. الطبيب: الله معاك ابنتي.. الله يكون فعونك.. تأليف دودي العيساتي البائسة : نحو الجنون- الحلقة 9 تأليف دودي العيساتي رجعت للحاضر من جديد.. وانا باقية فنفس الهدوء.. حسيت اني مخنوقة ونضت بغيت نحل البالكون لقيتو مسدود.. اووف سدو عليا تاني.. خرجت من البيت وبقيت كنتمشى وكنشوف راسي فكل قنت وانا كنمسح ونسيق .. بكل بلاصة كنرتب وكنضحك.. ديك الضحكة اللي نسيت معناها.. ونسيت الاحساس بيها كيفاش كيكون.. لقيت راسي حدا الكوزينة.. وانا كنشوف ماما كتوجد .. كتعجن وكتستعجلني باش نزير راسي دغيا ونحطو.. حيت غادي تغوت علينا مدام نسيمة وغادي يغضب السي العامري الى تعطلنا عليه فالغدا.. فينك اماما.. توحشت منك تعنيقة وحدة.. 😢 نزلت دمعة مني بلا منحس.. مفيقني من الماضي غا صوت مورايا.. هادا ديال مادام نسيمة.. نسيمة: فرح.. اش بغيتي.. لاش نزلتي من البيت.. مسحت دموعي وضرت عندها.. جيت نهضر وتخرست من جديد.. مقديتش نجاوبها.. نسيمة: رجعي لبيتك واي حاجة حتاجيتيها غادي توصلك.. بقيت كنشوف فيها حتى استغربات نظرتي ليها.. مقدرتش نفسر ديك الساعة احساسي.. بين العتاب واللوم.. وبين العرفان بالجميل.. وبين الحزن.. نسيمة: فرح.. واش مكتسمعينيش؟؟ داز من حدايا ولد فعمرو اربع سنين.. هادا ابن عادل.. شد فيا وتلفتت ليه.. كرم: بغيت حلوى.. ثرية: كرم.. اجي الهنا... اش جات تدير هادي هنا... اه تكون توحشات الكوزينة والشقا فيها.. كيقولو الاصل غلاب.، شفت فيها كانت حاقدة عليا بزاف.. انا عارفة انه متسرطاتش ليها انه نكون فهاد الدار عندي قيمة وامتيازات بحالها.. كنة ليهم بحال بحالها.. ولكن.. انا عمري نكون بحالها.. وعمري بغيت نكون.. مكرهتش نمشي من هنا.. مكرهتش.. بغيت نلقا ماما.. نعرف فين مشات.. ونمشي عندها .. نهرب منهم.. ومبغيت نسمع عليهم حتى حاجة.. مهضرتش عندها ودزت من حداها باش نمشي.. وانا نلقا قدامي انور داخل من برا.. انور: فرح!!! اش نزلك من البيت.. واش راكي لاباس.. واش بغيتي شي حاجة ثرية: مزيان تبارك الله حتى الخدامات ولات عندهم قيمة.. انور: (شاف فيها مغوش ) زيدي طلعي معايا.. شد فيدي وانا مستسلمة تماما وتمشيت .. عارفة انه هاد الاستسلام والهدوء سببه داك الابرة اللي كيدكولي كل مرة.. تفاديا لمحاولة الانتحار المتكررة اللي درت وكندير وتفاديا لأني ندير شي حاجة فكرشي كما سبق ودرت.. نهار عرفت اني حاملة المرة الاولى.. دخلت للبيت من تاني.. مشيت نعست فالناموسية.. وانا مسترخية تماما ومغمضية عينيا.. ورجعت للماضي من تاني تأليف دودي العيساتي البائسة- نحو الجنون- الحلقة 10 تأليف دودي العيساتي حليت عيني وانا فبيت مافيه حتى حاجة من غير ناموسية وحدة من حديد.. يديا وحدة مربوطة بالحبل عند راس الناموسية والاخرى فيها السيرو.. عرفت ديك الساعة انهم لقاوني.. واني رجعت لبين يديهم من تاني.. معرفتش اش ندير .. واستسلمت.. ياريت يقتلوني ولا انهم يخليوني فهاد العذاب اللي راني فيه.. بقيت تما يوماين.. لا حس ولا خبر.. مشفتش وجههم.. حتى بديت كنشك واش بالصح راني عندهم ولا لا.. حتى اليوم الثالث.. عاد تحلات الباب.. ودخلات لالة نسيمة.. ومعاها ولدها عادل.. ونظراتهم فيها شرارة موجهة ليا كأنهم مكرهتش يقتلوني.. دخلات مرت عادل والسي العامري.. وأخيرا دخل شخص وجهو كله مضمد.. ومكيبان منو الا عينيه.. كلشي شاف لعندو.. فهمت شكون هو بالضبط.. هادا انور.. اكيد هادو جاو ينفذو فيا حكم الاعدام.. اكيد جا يقتلني بيدو ولا يكب لاسيد على وجهي كما درتلو انا.. يا ريت يديرها ويهنيني.. حسن ما نبقى نستنى فمصيري وانا معارفاش اش غايوقع من بعد.. العامري: انا منعت عادل يدير شي حاجة.. وحتى انا مدرت والو.. كما طلبتي منا.. نتا اللي غاتقرر وتنتاقم بيدك.. اللي غايشفي غليلك.. ويبرد خاطرك.. حنا موافقين عليه.. انور(قرب مني وشاف فيا بعينين مخلطين باليأس والدمع الخفيف) انا قررت.. عادل: شنو قررتي.. عطيني الاذن غادي نشوها دابا وقدامكم.. باش عمرها تفكر تعيش من بعد ابدا... انور: انا غادي نتزوجها.. عادل: شنوووو واش حماقيتي ... نسيمة: ولدي.. بشوية عليك.. واش كتكافئها على داكشي اللي دارت.. انور: اكبر عقاب ليها هو زواجها مني... حيت غاتكون مضطرة انها تشوف هاد الوجه البشع كل صباح وكل ليلة.. وكل دقيقة.. وحيت مغاترضاش تتزوج بيا اي بنت فالدنيا بخاطرها.. فهي اللي غاتزوج بيا بزز منها.. العامري: انا موافق.. وديك الساعة منك ليها.. انا بحال الى هز سيف وحطو على عنقي.. واش غادي نبقى حياتي كاملة معاه.. للحظة تمنيت لو اني .. تنازلتله وخليتو يدير ما بغا.. على الاقل كنت غادي نمشي ... ماشي نبقا معاه حياتي كلها.. كلهم خرجو.. وانا حسيت بقشعريرة طلعاتلي من رجليا حتى لراسي.. حسيت بخوف شديد.. وفكرت اني نقتل راسي.. خوف كبير.. قلبي بقا كيضرب بزاف غايبدا العذاب الحقيقي .. نقدر نقول الرعب الحقيقي.. اش غاندير.. يا ربي خد روحي.. حيت قلبي طاب صافي من الرعب اللي حاسة بيه.. اش غايكون مصيري مازال... وشنو غانشوف فحياتي كتر من داكشي اللي شفت.. تأليف دودي العيساتي البائسة- الحلقة 11 تأليف دودي العيساتي .. بعدما طلعني انور من عائلتو.. ودخلني للبيت.. انور: شنو قالولك.. واش عصبوك؟؟ بقيت كنشوف فيه ومهضرتش .. جا يحط يدو على وجهي.. وانا نبعدو.. انور: عارف انك محاملانيش .. ومحاملاش عائلتي.. ولكن انا فعلا باغي نبدا معاك بداية جديدة.. انا ونتي وبنتنا.. شفت فيه باستغراب.. انور: اه بنتنا.. انا عرفت من الطبيبة انه عندنا بنت.. وانا متأكد انه غاتكون كتشبه فيا... ههه شنو بغيتي نقولك تشبه فيك.. اكيد غاتكون كتشبه فيا.. واش غاتبقاي ساكتة!! طلبي مني اي حاجة بغيتيها.. اي حاجة غانفذها.. هضرت وصدمتو بهضرتي.. فرح: فيناهي ماما ا انور.. بقا كيشوف فيا بصدمة.. انور: ما م.. ماعرفتش.. فرح: انا مستعدة ننسى كلشي.. ونبدا معاك صفحة جديدة.. ولكن بشرط.. انك تلقى ليا ماما..فهاد الحالة نقدر نمشي معاك للجحيم الى طلبتي ماشي غا من هنا.. انور: بالصح؟؟ يعني غاتبداي معايا صفحة جديدة.. فرح: ماما هي اللي عندي فهاد الدنيا.. وايلا كانت حدايا غادي نكون لاباس.. انور: غاندير اللي فجهدي باش نجيبهالك.. كنواعدك.. الوعد الوهمي اللي خديت فهاد النهار.. تيقتو وكان بمثابة بصيص من الامل.. كان عندي امل كبير اني نلقا ماما ونعنقها وتكون ليا سند فهاد الغابة اللي انا عايشة فيها.. الغابة اللي دخلت ليها برجلي فداك اليوم المشؤوم.. لبيتو بعدما كتبو ليا عقد سنيت عليه بزز مني..دخلت وانا ماعارفاش شنو كيستناني.. كنت خايفة من كل دقيقة كنسمع فيها صوت كيقرب للبيت.. حتى دخل هو.. كنت خايفة بزاف منو.. جميع السيناريوات جاو لعقلي.. وكلهم تخلطو فيا حتى تخربقت.. وقف قدامي.. وانا رجليا كيرجفو.. وحسيت اني مبقيتش قادرة نوقف عليهم كتر.. بدا كيحيد البندا على وجهو.. في مشهد مفاجئ ليا..حتى حيدها كاملة وبان وجهو المشوه.. واش كاين شي مخلوق فالدنيا ابشع من هادا اللي كنشوفو قدامي.. كانت ندوب كثيرة وحمرا.. ولحم وجهو تحلل وكون طبقات على وجهه.. والجلد انسلخ عنه.. مقدرتش نوصف كتر من داكشي.. ولكن بشاعة وجهه كانت كبيرة بزاف.. انور: شنو... واش تصدمتي؟؟ حتى انا تصدمت مللي شفت راسي فالمرايا.، وليت خايب بزاف.. ولكن غاتولفيني.. فرح: 😭😭سمحلي .. انا مدرتهالكش بالعاني.. نتا اللي... انور: انا اللي.. انا اللي تعديت حدودي.. وهادا جزاءي.. وليت مسخ عايش فالدنيا.. نتي غاتكوني مراتي وغانعيشو حياتنا ونولدو انا وياك.. ولا عرفتي.. بلاش من الاولاد.. حيت غايخافو من باباهم.. وغايقولوليك بابا خايب وبشع.. غانعيشو بوحدنا بلا ولاد.. زدت خفت منه.. حيت بانلي ديك الساعة ماشي طبيعي ابدا.. ممكن يفكر انه يقتلني ولا يعدبني.. تأليف دودي العيساتي البائسة - الحلقة 12 تأليف دودي العيساتي استسلمت والرعب تسرسب لأعماقي.. خفت منو.. توقعت منو كل أنواع العذاب.. خدا جسمي ببرود تام.. ومقدرت ندير حتى ردة فعل.. اللي مكنتش باغا نعطيه بزز دابا كنعطيه بخاطري وبأي مقاومة مني.. بكائي كان أخرس.. كنبكي فصمت وشكون يسمع بكائي.. تمنيت لو اني متزاديتش.. قدري نعيش فالبؤس.. كيقصد يوريني وجهه كل مرة.. كيقصد يدخل فقلبي رعب ويندمني حيت شوهت وجهه.. حتى واحد فالدار محاملني..بحال شي حيوانة معندها قيمة.. وحتى الماكلة .. مكنشوفها الا عندما كيطلبها هو.. انور: اجي تاكلي.. ونديرو كما الازواج.. نوكلك وتوكليني.. استفزازو كان متواصل ليا.. كان كيأكد على انه يقتلني بالبارد.. من نهار دخلت عندو مامدش يدو عليا ابدا.. ومعمرو استعمل معايا العنف في شيء الا مللي حاول يتعدا عليا اول مرة.. ولكن برودو معايا كان كيقتلني.. كان الرعب كيدخل لقلبي كل ما سمعت خطواته كيقربو للبيت.. فكل مرة كيدعوني ناكل كنت كنقول انه غادي يقتلني.. الماكلة كنت كنحس انها مسمومة ..كنت كنخاف حتى اني نرفض دعوتو او شي حاجة بغاها مني.. مكنتش كنقدر ابدا اني نهضر او نسول فين هي ماما..من نهار شدوني انا مبقيت عرفت فين مشات.. خفت بزاف اني نسول عليها..دازو ايام وانا فنفس الشيء عايشة كابوس.. انور كيفيقني حتى بالليل باش نشوف وجهه..واش كاين شي عذاب فالدنيا اكثر من هادا.. وليت ضعيفة وجسمي نقصاتو القوة ولكن الجديد هاد المرة اني وليت كنتقيا بزاف.. وتقطعات عليا الدم.. تما عرفت اني ممكن جدا نكون حاملة.. محملتش الموضوع ابدا.. فكرت فمصيرو.. وفالهضرة اللي قال ليا انور.. فأنه غايكبرو ويشوفو باهم مشوه.. ويخافو منو.. ومن جهة اخرى مبغيتش نزيد بائس اخر لهاد الدنيا.. البائس اللي غادي نولدو باش يتعدب ويمرض فهاد الدنيا بحالي.. حاولت نخبي ما امكن.. ومنبين والو قدامو.. كنت كنموت بالتقية ومكنقدرش نتقيا وكنزير راسي.. عذاب تاني زدتو.. ديك الساعة فكرت فشي حل باش نتخلص من الولد .. ونموت حتى انا معاه.. دخلت للطواليط.. وبقيت كنضرب فكرشي.. وكنزير عليها.. دموعي تخلطولي مع العرق .. والسخفة.. حسيت بالدم كينزل من تحتي.. بعدها مابقيتش عاقلة على راسي تأليف دودي العيساتي البائسة- الحلقة 13 تأليف دودي العيساتي حليت عيني وانا فالسبيطار وما حدايا حتى واحد.. والم كبير كنت كنحس بيه فكرشي.. شوية دخلات عندي الفرملية.. الفرملية: على سلامتك اختي.. فرح: الله يسلمك.. الفرملية: حرام عليك هادشي اللي درتي.. راه هاديك روح ديال الله علاش تقتليها.. فرح: 😓واش مات؟؟ الفرملية: للاسف.. فرح: وراجلي؟؟؟ قلتوهالو.. كنترجاكي متقولو حتى حاجة:. فرح : فات الفوت.. قاليهم الطبيب كلشي .. خفت بزاف من ردة فعلهم.. بقيت فالسبيطار ايام...رتاحيت على الاقل من المرض ديالهم.. حتى جا واحد النهار واحد من الخداما ديال الفيرمة.، الرجل: واش لاباس اختي فرح،.. فرح: الحمد لله.. الرجل: انا صيفطني السي العامري باش نجيبك للدار.. فرح: واخا.. بدون اية مقاومة مشيت لقدري.. حيت الفشل فأني نهرب ولا قدام عيني.. وحتى جسمي مكيتحملش حيت قوتي مشات .. لهلا يبلي شي وحدة بالاجهاض.. مشيت معاه حتى وصلنا.. وانا نلقا التغوبيشات كيستناوني.. عادل: معرفتش واش نلومك ولا نشكرك.. نلومك ونقطع يديك حيت تجرأتي وقتلتي طرف فكرشك من دمنا.. ومديتي يدك تاني على واحد منا.. ولا نشكرك حيت قتلتي الحثالة اللي نتي كنتي غاتكوني امه... العامري: غادي تتعاقبي على هادشي افرح.. ومغاديش نفوتليك انك قتلتي حفيد ليا.. عادل: ولا عاليك الواليد.. شي شهورة قلال وغادي تولد ثرية.. الولد اللي يشرفك تكون جده.. فظل كاع الشتائم اللي كانو كيعطيوهالي.. بانلي انور.. وباشارة بيدو طلب مني نتبعو للبيت.. حنيت راسي ومشيت موراه.. دخلت للبيت.. ومهضرش.. بقيت كنستنى حتى هو يلقمني بكلماتو الجارحة كما دارو هما.. ولكن ماهضرش... بقا مدة على داك الحالة.. حتى جا جلس حدايا .. وهضر اخيرا.. انور: علاش قتلتيه.. فرح: حيت نتا.. قلتيلي مبغيتش الاولاد.. 😰 انور: ولا حيت ماباغاش تولدي من واحد مسخ بحالي.. فرح: لا لا .. ماشي هكاك.. خفت انك متبغيش نكون حاملة.. انور: فرح.. انا بغيت نولد معاك.. ويلا قتلتيه غادي نقتلك.. بلعت ريقي وحركت راسي بالايجاب.. خفت بزاف من نبرة التهديد اللي هضر بيها.. كان جدي للغاية.. نضت دغيا من حداه ودرت راسي كنبدل حوايجي وانا رجليا مهازينيش.. كلشي عندو معكوس.. كينتاقم مني وفعلا كينجح.. حيت العذاب النفسي اللي انا عايشاه اكثر من اي ضرب ممكن يضربو ليا او تعذيب كما كان.. تأليف دودي العيساتي فبراير 04, 2019 البائسة- الحلقة 14 تأليف دودي العيساتي بقا فهدوءو من داك النهار.. وعلاقتو بيا هي هي.. نقدر نقول اني تعودت شيئا ما عليه.. واطمئنيت ليه.. ولكن ماشي مية فالمية.. مازال خايفة اني نتفاجأ منو .. وفعلا داكشي اللي كان.. بقا شهرين كيسولني كل مرة واش انا حاملة..كان باغي يثبت لنفسو انه ماشي عالة فالدنيا.. وانه يحس انه كاين بغلة فالدنيا باغاه وباغا تولد منو رغم تشوه وجهه وبشاعته.. ولكن الحمل موقعش.. كنت كنتحجج فكل مرة بأنه ميمكنش يوقع الحمل مباشرة بعد الاجهاض.. حتى فاض بيه الصبر.. وقرر يصيفطني مع امه للطبيب.. طبعا امه مكانتش كترفض ليه طلب.. وخداتني معاها للطبيب.. بعد فحصو ليا قال انه مايمكنش نولد فهاد الوقت حيت الرحم تضرر بالاجهاض .. وبالصدمات للي خدا وانا كنحاول نجهض.. وباللي خاصني نتبع العلاج اللي غادي يوصفولي باش نقدر نولد .. نسيمة: وهاد الحمل فوقلش يمكن يوقع.. يعني شحال المدة اللي يمكن يتعالج فيها رحمها.. الطبيب: منكدبش عليك .. ممكن ياخد العلاج سنوات.. بيني وبين نفسي حمدت الله اني مغاديش نولد مع هاد النسل.. ولكن خفت بزاف من ردة فعل انور.. ربما ينفذ تهديدو ليا .. بأنه يقتلني.. تمشيت مع امه ورجعنا للفيرمة.. وانا فكل خطوة كنخطيها بالاقتراب من انور الا وكنزيد كنرجف وكيفشلو عليا ركابيا.. سبقاتني امه ومعرفتش شنو دار بيناتهم وانا بقيت فالبيت .. حتى دخل .. وعلى عكس المتوقع كان هادئ جدا.. متعصبش عليا.. ولى كيفاجئني بزاف.. مهضرش على داك الموضوع من داك النهار.. حمدت الله على عدم تقلبه.. وحاولت نرتاح.. ونستافد من انه توقف عن استفزازه ليا.. هو دابا فحالة ضعف.. وباغي يحس انه عايش.. ضروري نحسسو بهادشي.. وبأني مخايفاش منو.. ونحاول نتعايش معاه.. انور واش غايسامحني على داكشي اللي درت.. وهو فكل مرة كيشوف فيها وجهه فالمرايا غادي يتفكر اش درت.. كنت ديما فالبيت مكنخرجش.. حتى لواحد النهار.. نزلت فصمت باش نشوف واش نلقا شي خبار على ماما.. بقيت كنتمشى باش تا واحد ما يحس بيا.. حتى لقيت جواد.. جواد: فرح .. واش نتي لاباس.. فرح: جواد بغيت نسولك على ماما.. فيناهيا.. جواد: معرفتش.. مشفتهاش.. فرح: عفاك اجواد قلبلي عليها.. نعطيك اللي بغيتي.. بحق الحب اللي كان بيناتنا.، جواد: واش مازال كتبغيني... انور: فرح.. تصدمت مللي سمعت صوته مورايا.. غايكون سمع كلشي... تأليف دودي العيساتي البائسة- الحلقة 15 تأليف دودي العيساتي.. تجمدو العروق فجسمي .. ومقديتش نتحرك بالرعب اللي كان فيا.. جا عندي وقال.. انور: ( بهدوء) طلعي لبيتك.. فرح: وواخا.. مشيت كتجري بلا منشوف مورايا.. وطلعت للبيت.. بقيت كنرجف وجالسة على نار.. وجنوني مهداوش عليا.. حتى سمعت صوت .. هدا كان صوت جواد وهو كيغوت.. مشيت كنجري باش نطل من البالكون.. كان انور معاه عادل.. اما جواد كانو جارينو وكيغوت.. حتى دخلوه لنفس البيت اللي دخلوني ليه انا داك المرة.. بيت الرعب.. الشيطان دخل على الخط من تاني.. عادل هو اكثر من شيطان.. انور مكايفكرش يآذي من عقلو ابدا.. ولكن عادل هو دايما الراس المدبرة.. تما عرفت ان كل ما دار انور خايب فحياتو كان موراه عادل.. بقيت كنشوف برعب شديد حتى شاف فيا عادل بواحد النظرة زعزعاتني.. نظرة ناوية على خزيت.. معرفتش شنو كتاشفو.. ولكن عرفت ان دوري جاي تانا.. دخل للدار وموراه انور.. انا ركابيا فشلو بالمعقول.. بقيت كنستنى حتى دخل للبيت ديالي وفوجهه نظرة شر.. وكان معاه انور.. شفت فيه باستعطاف لعلي نأثر فيه.. فرح: اقسم بالله اني كنت كنسولو غير على ماما.. اقسم بالله.. عادل: لوااه.. حبك القديم وكتسوليه غا على امك.. انور.. هادي راه استهانت بيك.. حيت وجهك مشوه.. وخانتك .. كتستغل وجهها الزين باش تأثر على الرجال.. هادي خاص تتشوه حتى هي من وجهها باش ميبقى حتى راجل يشوف فيها.. كان كيحاول يستفزو باش يآذيني.. شيطان .. جا جرني من شعري وبقا غادي بيا.. حتى وصل للكوزينة وانا كنغوت.. وانور غير كيشوف فيا ومتحركش.. وامهم حتى هي والخدم كيشوفو فيا ببرود كأنهم كانو باغيينها فيا،، شعل البوطة وحط على العافية واحد الحديدة.. وانا الرعب تغلغل لاعماقي حتى مابقيتش قادرة نوقف على رجليا.. مستحيل يشوهني،. هادا من شحال وهو باغيها فيا .. حسيت بداك الحديد سخن مزيان وولا حمر ... وهو يحطو على وجهي.. قفزت من بلاصتي بقوة الالم والحرق.. معرفتش كيفاش تفكيت منو وانا كنغوت بالجهد.. وكنجري فالدار... كنغوت لربي للي خلقني .. محسيتش براسي حتى لقيت راسي فالبيت.. شفت فالمرايا كان فيا الدم فوجهي .. وكانت باينة الطبعة مزيان ومشوهة وجهي حتى انا.. طحت على ركابيا وبقيت كنبكي بغزارة.. مقديتش نهضر تقطع فيا النفس بالبكا.. مطلبتهاش فالدنيا كبيرة.. ومع ذلك جاني غا القاصح.. واللي مقديتش نتحملو.. حسيت بيد تحطات عليا.، عليت راسي لقيتو هو.. انور اللي تآمر مع خوه عليا .. واللي كنت كنظن انه مبقاش حاقد عليا بعدما وافقت نولد معاه.. الا اني كنت مخطئة بزاف.. هو كان حاقد عليا اكثر من اي احد.. بحيث قرر يشوهني كما شوهتو.. وماقدرش يغفر رغم اني توسلتو.. وتبع هضرة الشيطان.. مقديتش نشوف فيه.. مد لي زيف باش نمسح الدم.. مهزيتوش منو.. حطاني واحد الدوا كيستعملو هو وكينظف بيه الجرحات فوجهه.. خديت على امل نبرا من وجهي.. دخلت للطواليت وكبيتو على وجههي.. وانا نشعل بقوة الحريق.. هيجلي وجهي بزاف.. حتى زيرت عليه بالخرقة.. والدموع نازلة ومزيرة على سناني..حتى حسيت ان الدنيا كتضور بيا .. صافي مبقيتش قادرة نتحممل وانا نطيح ونغيب،. تأليف دودي العيساتي البائسة- الحلقة 16 تأليف دودي العيساتي حليت عيني وانا فالناموسية.. ويدي فيها السيرو.. حطيت يدي على وجهي لقيت عليه سبرادرا.. باينة جابلي طبيب .. مبقيتش قادرة نطلع الصوت .. صافي ضاع كلشي.. وجهي مشا.. بقيت هكاك.. انور كيجي وكنتفادى نشوف فيه.. وحتى هو مكيهضرش.. كيبقى بلا باندا معايا فالبيت.. ومللي كيخرج كيديرها.. بقا هكاك حتى جا وجاب معاه الماكلة.. انور: نوضي تاكلي.. مجاوبتوش وبقيت في هدوء.. انور: كولي حيت خاصك تشربي الدوا.. واش نسيتي وعدك ليا.. باللي غادي تولدي معايا.. مازال طامع فالاولاد.. علاش ميقتلنيش ويتهنى.. علاش مصر يعدب فيا.. انور: حتى نتي مادرتي فيها ما يصلاح.. تكوني مرتي وتمشي للخداما ديالي.. طبيعي يكون هاداك هو رد فعل ديالي.. دابا مزيان انا وياك متساويين.. هكا تضمني انه لا انا نشوف غيرك رلا نتي تشوفي غيري.. حيت بجوجنا مشوهين.. وحتى واحد مغايديها فينا،. استفزاز وعذاب نفسي.. كيقصد يستفزني بهضرتو.. انور: الخيانة راه صعيبة.. ولكن دابا انا مطمأن انه مغاتخونيش.. فرح: انا مخنتكش 😡 انا سولت غا على ماما.. انور: ولكن هو مقالش هكا.. جواد قال انك كترمي عليه راسك من زمان.. وتابعاه.. وحتى العمال الاخرين شهدو بهادشي... وكاين اللي قال انه تشكلك لماماك اكثر من مرة باش تبعدي من طريقه ولكن نتي مبغيتيش.. صدمني بهضرته.. واش فعلا جواد قال هادشي.. فرح: نتا كذاب 😰 انور: الى مامتيقاش نوضي تشوفي بعينيك.. نضت بزز مني وبصعوبة حيت الجهد مبقاش وتمشيت معاه.. عيط لجواد .. وانا تخبيت غا باش نسمع.. انور: قولي الحقيقة .. واش مكانتش عندك حتى علاقة مع فرح.. جواد: لا اسيدي.. كنحلفليك.. راه هي من ديما كانت تابعاني وكتعرض راسها عليا.. راه كلشي فالفيرمة عارفين شحال هي قليلة اداب وممربياش.. انا اصلا مستحيل ندير شي علاقة مع وحدة مامعروف حتى اصلها شكون.. وامها استغفر الله العظيم .. كلشي عارفين اخلاقها.. انا مظلوم اسيدي وبريئ.. وطيحات عليا الباطل.. انور: سير دابا.. انا تصدمت بداكشي اللي سمعت.. واش باش يعتق راسو يوحلني انا.. كان ضروري نعرف انه مافيهش خير نهار باعني وتخلل عليا مللي التجأت ليه المرة الاولى.. ولكن انا اللي حمارة.. جا عندي انور وشد فيا باش نطلعو حيت مبقاتش فيا القوة.. داني للناموسية وتكيت.. فرح: واش متيقو.. انور: شنو بانليك؟؟ فرح: نتا تزوجتيني عزبة.. ولو اني معنديش شرف مكناش غانوصلو لهادشي كله.. كان وجهك غايبقى وحتى وجهي انا.. وكنت غانخليك تقربلي فداك النهار.. انور: انا عارف هادشي.. فرح: مللي عارفو لاش شوهتي وجهي 😢 انور: باش حتى واحد ميكون حسن من لاخور.. انا وياك .. وباش تعرفي انه معندكش فالدنيا غيري.. انا .. جواد ولا غيرو.. باغيين غير يستغلوك ونهار كيحصلو.. كيخويو بيك.. لقيت باللي عندو الحق.. مكاينش اللي يستاهلك.. ولا يبغيك.. كلشي باغي مصلاحتو.. حاولت نستعطفو من جديد.. فرح: عفاك .. انا عارفة ان قلبك زوين.. وماشي بحال عائلتك.. عفاك خليني نمشي من هنا.. نمشي عند ماما نقلب عليها.. انور: سمعيني افرح.. نتي مغاتخرجي من هاد الفيرمة الا لقبرك.. متحلميش انك غاتخرجي من هنا فيوم من الايام.. فرح: يعني غاتبقى تعدب فيا حياتي كاملة.. مغاتسمحليش.. انور: اه .. نهار نشوف فالمرايا ومنلقاش وجهي مشوه.. ديك الساعة يمكن نسمحليك.. فشلني .. وزاد خوفني من داكشي اللي كيستناني.. بقيت كنشوف الدنيا كحلة قدامي.. رجعت من جديد لداك العذاب النفسي اللي عيشني فيه انور.. كلامنا قليل بزاف.. والشيطان ديال عادل كان كيعمرليه الراس باش يتقلب عليا فكل مرة.. رغم انه كان احيانا هادئ الا انه فالاحيان الاخرى كان يقلبلي على السبة من والو.. وصل النهار اللي ولدات فيه مرت عادل تورية.. ولدات الدري وسماوه عمر.. بدات الاحتفالات بولادته كأنها مهرجان.. العامري فرح بحفيده بزاف وكلشي ساق الخبار ليه.. تفكرت نهار كانو كيعجبوني هاد الاحتفالات.. حيت كنت بسيطة فتفكيري وكان كيعجبني غا ناكل ونتفرج بالرقصات وفالشيوخ.. بقيت كنطل عليهم وحاطة راسي على الزاج.. وحتى انور منزلش عندهم .. حيت ماباغيش يشوفوه الناس.. ويشوفو فيه بشفقة.. تأليف دودي العيساتي البائسة- الحلقة 17 تأليف دودي العيساتي فالدنيا بزاف دالانواع.. كاين اللي عطاتو كلشي.. وكاين اللي حيدات منو كلشي.. بحالي انا.. حيدات مني العائلة.. وحيدات السعادة.. وعطاتني كل ما هو سيء... معمري ما سولت علاش.. حيت كنت كنآمن ان داكشي ارزاق.. وكل واحد ورزقو.. الحمد لله.. دازت ايام وسنوات... وانا عايشة نوع من الركود النفسي.. محاساش براسي.. وكنطفى بحال شي شمعة يوم عن يوم.. ولكن امي منسيتهاش.. ومغانساهاش.. كان باقيلي امل بسيط عايشة على قبلو.. وهو اني نلقى ماما.. حتى جا واحد النهار مختلف تماما على كل الايام اللي دوزتها من قبل.. فقت من النعاس على صوت دقان قوي فالباب تخلعت وحتى انور معايا.. ناض دغيا وحل الباب كانت امه.. دخلات وهي فرحانة.. نسيمة: ولدي انور .. واخيرا.. واخيرا انور: شنو كاين.. نسيمة: واحد الطبيب ديال التجميل جا من المانيا.. ملي عطاه عادل الملف ديالك قالينا راه ممكن دير عملية تجميل وترجع كما كنتي.. انور: واش بالصح.. نسيمة: اه انا فرحانة بزااف.. انا فرحت ماشي حيت هو غايبرا.. ولكن حيت غانقدر نتفك منو.. ونبعد عليه.. ومغايلقاش السبة بأنه مشوه.. بالعكس غايمشي يقلب على حياتو ديك الساعة ووجودي مغايكونش بالنسبة ليه اي معنى.. فعلا مشا مع خوه باش يشوف الطبيب وهو فرحان.. عادل: فرحنا ادكتور.. الطبيب: هو العملية ممكنة .. وولكن بواحد الشرط.. انور: اشناهو.. الطبيب: العيب ديال لاسيد انه بحالو بحال العافية..ولذلك فضروري خاص زراعة للجلد يرجع لوجهك.. عادل: كيفاش.. واش خاص نستناو يكبر الجلد ولا؟؟ الطبيب: طبعا لا.. فالطب ديما كاين حلول.. فهاد الحالة كناخدو الجلد من شي بلاصة اخرى فالجسم بحال الفخذ .. وكنديروه فالوجه.. عادل: فهمت.. واش ضروري يكون من جسم الواحد ولا من اي جسم .. الطبيب: طبعا كنشوفو المتبرع والا كان يصلاح وتوافقات انسجتو راه ممكن ناخدو منو.. عادل: مزيان.. خرجو انور وعادل من عند الطبيب.. وبقاو غاديين.. انور: علاش سولتي على المتبرع.. علاش مياخدش من جسمي انا.. عادل: واش غادي تصلح عيب بعيب اخر.. نتا جسمك خليه مزيان .. غاتاخدو من متبرع.. انور: وفين نلقاو المتبرع.، عادل: اللي شوهاتك هي اللي تخلص الخطية.. انور: فرح!!! عادل: كاين من غيرها؟؟ عطا الله البلايص اللي تاخد منهم جلدها .. والو اقتضى الامر نسلخوها كلها ههههه.. انور: الموضوع راه مكيضحكش.. عادل: شنو غاتبقى فيك ولا؟؟ نسيتي اش دارت.. وزايدون غاتاخدو من بلايص متفرقة من جسمها.. ومغايضرها بوالو.. انور: ولكن.. عادل: ماكاين لا ولكن ولا علاش.. راه بزز منها غاتديرها.. وديك الساعة نطلقو الزمر تمشي بحالها.. وايلا بقات فيك بزااف غانعطيوها جوج ريال تسد فمها.. بقات فالجلد.. الناس راه كيبيعو كلاويهم.. بقيت كنستنى يجي باش نسمع منو.. حتى دخل وبقا ساكت على غير العادة.. حتى اعتقدت ان الطبيب مفرحوش.. وقاليه باللي العملية مغاتمكنش.. شديت راسي تا انا ومبغيتش نهضر ولا نسوله.. اصلا انا حالفة منسمعو صوتي.. ماشي سوقي فيه.. تأليف دودي العيساتي البائسة- الحلقة 18 تأليف دودي العيساتي بقا فهاديك الحالة بزاف.. حتى بديت كنشك.. السيد حاط يدو على خدو ومتحركش.. كأنه كيفكر فشي حاجة.. وخايف منها.. داز داك النهار.. وهو فنفس الحالة.. الغد ليه خرج.. وانا جات عندي امه.. نسيمة: فرح وجدي راسك.. غادي تمشي مع راجلك للطبيب.. نضت ودرت داكشي اللي قالت.. مازال عندو امل نولد منو.. بعد داكشي اللي دار فيا.. نزلت ولقيت معاه داك الشيطان دعادل.. مبقيتش حاملة حتى نشوفو.. قلبي كيضرب كلما شفتو وكنترعب .. حيت كنعرف انه موجد شي مكيدة ليا.. تمشيت وركبت معاهم فالطوموبيل.. حتى وصلنا لواحد البلاصة باينة فيها سبيطار .. دخلنا بعد استأذان.. سلمو على الطبيب .. شاف فيا ديريكت للحرق اللي فوجهي.. الدكتور: اشنو هادا؟؟ حدرت راسي.. ومبغيتش نهضر.. حتى هضر عادل.. عادل: هادي هي المتبرعة.. دير اللازم ادكتور.. تصدمت.. باش غانتبرع.. شنو باغيين ياخدو مني.. شفت فانور حنا راسو.. ومبغاش يشوف فيا.. الطبيب: واش مقالولكش انك غاتبرعي لانور بالجلد.. متخافيش مغايكونش من وجهك.. تصدمت وخفت.. خفت حيت مشاو بعيد فتفكيرهم.. باغين يحيدو ليا الجلد ويعطيوه لانور.. اه آذيتو ولكن ماشي حتى لهاد الدرجة.. يفكر يخليني بلا جلد باش ياخدو هو.. جيت نهضر.. وهو يقاطعني الشيطان.. عادل: ممكن نبقاو معاها بوحدنا ادكتور .. دقيقة وصاف.. الطبيب: طبعا... ناض وخرج ومباشرة شاف فيا عادل وهضر.. عادل: مبغيتش نسمع صوتك... هادشي الى بغيتي تبقاي عايشة.. انور: فرح متخافيش.. الطبيب قالينا باللي مغاديش تحسي بالفرق ومغاديش ياخد الجلد من بلاصة وحدة... يعني مغايبقاش اثر ليه... عادل: واش نتا باقي غاتبرر ليها.. راه بزز منها.. وياربي تفتح فمها.. ديك الساعة غادي تشوف وجه اخور مني.. بلعت ريقي وحسيت العرق كيجري على جسمي.. ماعنديش حل.. عيطو للطبيب.. وجا عندي وبقا كيشوف الجلد ديالي.. وكيقيد فشي ورقة.. خرجت وبقيت كنستناهم.. جات عندي واحد الممرضة داتني لواحد البيت وطلبات مني نحيد حوايجي ونلبس واحد الخرقة زرقة.. لبستها وانا ذابلة ومصدومة.. مابقا فيا الجهد لوالو.. حتى الحاجة الزوينة مابقيتش كنستناها او كنحلم بيها.. بغيت نكون فسبات .. وماباغا تا حاجة.. ماحسيتش بالوقت حتى لقيتهم داوني للعملية ولقيت تما حتى انور.. حتى هو لبسوه بحالي.. ومحيد الباندا على وجهه.. شاف فيا بنظرة فيها خوف.. واش غانخرج من هاد العملية بوجه مشوه وهو بوجه زوين؟؟ واش غانتبادلو الادوار.،، كان قريب ليا.. وعينيا فيهم بؤس شديد وحزن.. حسيت بيدو كتلمس يدي.، نزلت دمعك من عيني وحيدت يدي وقلبت وجهي للجهة الاخرى.. حطو على فمي شي حاجة تنفست فيها حتى مابقيتش عاقلة على راسي.. تأليف دودي العيساتي البائسة- الحلقة 19 تأليف دودي العيساتي الامر مكايتعلقش بالحمل وانما بطبيب ديال التجميل.. حليت عيني بزز.. ولقيت راسي فبيت بوحدي.. حسيت بالحريق فمناطق متفرقة فجسمي.. الفخذين بجوج.. والرجل.. وحتى ظهري وكرشي.. هادو اكيد سلخوني.. حطيت يدي فالبلاصات اللي كيحرقوني لقيتهم مضمدين.. بقيت تما حتى جاو الممرضات وكانو كيفحصوني فكل مرة.. وانا محاساش براسي.. وماباغاش نعيش كاع.. حسيت بيأس شديد.. بأني بوحدي فالدنيا.. بقا فيا راسي بزاف.. على هاد الحالة وفين تلاو بيا الايام .. وليت لعبة فيد الاخرين ومانقدش نقول اي.. سكتت ومهضرتش... دازو ايام وانا بوحدي.. ومكنشوف غا الممرضات والطبيب.. عرفت منو انه انور نجحات ليه العملية.. وباللي خدا مني جلد وزرعو ليه.. مكانش كيهمني ابدا.. تبلدت.. ومابقيت باغا والو.. دازت سيمانة.. حتى قالتلي وحدة من الممرضات اني غانخرج.. عاوناتني ولبساتني حوايجي.. وانا مرخية وماباغا والو.. استسلمت جدا ليهم.. حتى لقيت انور دخل ومازال داير الفاصمة فوجهه.. جا جلس حدايا وكانت معاه امه.. انور: فرح واش نتي لاباس.. مجاوبتوش وقلبت وجهي.. اما هو شد فيدي،. انور: شكرا بزاف .. انا رجعات ليا الروح والحياة بسبابك نتي.. عادل: نسيتي باللي هي اللي حيداتهالك النهار الاول ولا؟؟ مفهمتش علاش مازال حان فيها.. تمشي بحالها.. مابقا علاش تجلس دابا.. انور: عادل!! عفاك ،، مبغيتش نسمع هضرة على هاد المرضوع... خرج الشيطان.. وانا مسمياه هاد الاسم ماشي من فراغ.. اما انور تلفت عندي من جديد.. انور: نوضي خاصنا نمشيو للدار.. بداك الضعف وقفت ومشيت معاه.. لا داعي للمقاومة.. وياريت يخليوني نمشي ولا نشوف الوجه دالشيطان.. طول الطريق وانور شاد فيدي،. وانا محاساش بأي عاطفة سواء كانت خايبة او زوينة.. وصلنا للفيرمة والاسرة كلها فرحانة لانور.. غادي يقدر بعد يوماين يحيد الفاصمة ويستعمل الدوايات ديالو،، طلعت للبيت.. وبقيت تما ماباغا نحتفل مع حد ولا نشوف حد.. دخلت ندوش وحيدت حوايجي.. وحتى السبادرا اللي كانت فجسمي كلها.، وبقيت كنشوف فجسمي.. كله مخيط.. جسمي كله تشوه.، ومابقاتش فيه رائحة الانوثة.. دوشت وخرجت دغيا مشيت تخشيت فالمانطة.. يا ريت نموت،،، يا ريت ندخل فسبات عمييق منفيقش منو.. الا واني بجنبي.. مابقيتش باغا شي حاجة من الدنيا غير اني نتوسد رجليها،.. ونبكي عليهم،، دخل عندي انور.. وجا حط يدو على راسي.. انور: واش نتي لاباس!! انقطع فيا الصوت.. مبغيتش نجاوبو،. ومقاداش.. عييت من قوة الالم.. عييت من الحياة بصفة عامة.، انور من داك الوقت،. وهو كيهضر وكيحاول يهضرني،، كيحاول يدير اي حاجة باش يرضيني وانا كنشوفها كحلة.. بعدما ولى زوين.. ووجهه تنور من جديد،. حاولو معاه فالدار انه يطلقني.. ويجري عليا.. الا انه كان كيرفض بشدة.، ياريت يخليني نمشي.. حسيت الدار كتضياق عليا.. وباللي باغا نموت.. حسيت التنفس تقطع عليا،. ومبقيتش مازال باقيا نجلس هنا.. خرجت بلا مايشوفني.، وبالليل،. وبقيت كنتمشى طمعا فأني نقدر نتنفس،، كنتمشى وكنطيح.، حتى بعدت على الفيرمة،. وطحت على ركابيا كنبكي.. وانا نغوت بأعلى صوت عندي.. مابقيتش قادرة نتنفس.. مابقيتش قادرة نعيش.. تأليف دودي العيساتي البائسة- الحلقة 20 تأليف دودي العيساتي بقيت كنبكي بصوت قوي.. وكنتخصص.. حسيت قلبي كيضرني.. حتى سمعت صوته.. هادا كان انور.. كيعيط ويقلب عليا.. مقدرتش نتحرك من بلاصتي.. حتى لقاني.. انور: فرح!!! فرح واش نتي لاباس.. بقيت كنبكي فصمت ومكنجاوبوش .. عنقني بشدة.. وهزني.. وانا كنبكي.، حتى ردني من جديد للفيرمة.. ديك الساعة كان الشيطان ناض من نعاسو وحتى امه وباه.. كلهم كيشوفو فانور وهو هازني وعلامات الخوف بادية على وجهه.. داني للبيت وحطني.. وغطاني وهو خايب عليا.. وانا محاملاش راسي.. خرج عن عائلتو.. وانا نسمع اصواتهم ارتافعات.. عادل: بغيت نفهم واحد الحاجة.. علاش راك متمسك بيها.. شنو جانا منها غير المرض والبلاء.. بنت الخدامة اللي ماعندها لا اصل ولا فصل.. وليتي خاثك غير تركع لعند رجليها.. شنو ذاري معاك نتا.. واش نسيتي شنو دارت.. وباللي كانت سباب لفراقك مع خطيبتك.. الام: ولدي ريم كتسول فيك وباغا تتلاقاك.. هادي فرصة باش ترجعو لبعضياتكم.. نتا غاتطلق هاد البنت .. ومتخافش انا غانتهلا فيها.. انور: مكاين لا ريم لا غيرها.. والى سمحتو حتى واحد ميدخل فحياتي.. انا ندير داكشي اللي بغيت.. وفرح مغاتمشي لحتى بلاصة.. عادل: واش تسطيتي ولا شنو.. شنو كيقولك عقلك.. الى كتفكر ترد من ديك البنت وحدة من العائلة راك غاتكون كتحلم.. الام: علاش اولدي.. علاش مازال غاتبقى هنا.. خليها تمشي.. انور: غاتبقى حيت انا كنبغيها...سمعتو.. انا كنبغي فرح.. وغانولد انا وياها ولاد.. واللي مابغاهاش .. غايكون ماباغينيش حتى انا.. وايلا مشات فرح انا غادي نمشي معاها.. وديك الساعة مغاتعاودوش تشوفو وجهي مرة اخرى.. خلاهم مصدومين.. ودخل البيت.. وبقا كيسمع هضرتهم.. عادل: هاد الولد اكيد تسطا.. الام: سكت.. واش سمعتيه اش قال.. انا مابغيتش ولدي يبعد عليا.. البنت غاتبقى.. الى هو بغاها غاتبقا.. عادل: واش كلكم تسطيتو.. الام: قلتلك سكت.. الموضوع تسد.. انور كان معايا وكان يسمعليهم.. اما انا دخلت فسبات عمييق.. مكنتش كنحس فأي حاجة.. ركود فالمشاعر.. بقا انور كيحاول معايا.. وانا محاساش بيه.. حتى بقا كيديني للسبيطار باش نشوف طبيب نفساني.. اللي كان كيديرلي ابر.. كنكون متبلدة بعدها تماما.. وماباغا والو ولا حاسة بوالو.. حتى اني فمرة ... محسيتش براسي حتى جرحت يدي ... تخلع عليا بزاف انور.. ومن تما ما شفتش قدامي شي الة حادة ابدا.. وليت ديما ساكتة .. وعينيا ذابلين تماما .. تأليف دودي العيساتي البائسة- الحلقة 21 دازت ايام ورا ايام وانا معارفاش راسي واش عايشة.. الزمن توقف عندي.. ومابقيتش عارفة شحال داز كاع.. حتى لقيت راسي فهدوء غريب.. عرفت انه دزت من مرحلة علاج حيت دخلت فمرحلة صدمة قوية .. خلاتني منشوفش قدامي.. حتى لقيت راسي كنكمي.. وكنتذكر كلما وقع لحظة بلحظة.. وتصدمت اني حامل.. وكيفاش حتى حملت.. مقادراش نستوعب اني غانولد فهاد العالم.. معرفتش كيفاش حتى وصلت لهاد الحالة.. دازت مدة طويلة.، انور ولى خايف من انه يفقدني اكثر من اي وقت.. ولى حريص اكتر عليا.. وانا باغا نموت.. لو اتيحت ليا الفرصة.. فجأة .. كنتفكر امي.. وكيرجع ليا الامل من جديد.. اني نعيش.. الى لقيتها قدامي.. فرح: اه.. كما سمعتي.. الى لقيتي ليا ماما.. غادي ننسى كلشي.. وغادي نبدا معاك صفحة جديدة.. ونديرو ولاد.، انور: غاندير اللي فجهدي.. باش نلقاها.. كنواعدك.. وبدا معاها الامل من جديد.. دازت شهور وانا كنستنى.. وكرشي كتكبر.. وانور مخلا شكون سول على ماما.. حتى وصل النهار المشؤوم.. اللي انقلبات فيه جميع الموازين.. وخلاني ندخل فصدمة عمري.. عادل: واش نتا غاتبقى غير كتقلب على ديك الشارفة .. ماعييتيش؟؟ انور: ديك الشارفة هي املي.. فأني نعيش انا وفرح فسلام.. ثرية: مزيان تبارك الله.. بنت الخدامة ولات كتتحكم فيك كما بغات.. انور: منسمحلكش تهضري عليها بديك الطريقة.. هاديك مرتي.. وغاتكون ام ولادي.. وغادي نلقاليها ماماها شحالما كلفني الامر.. ثرية: واش غاتبقى حياتك كلها تقلب على وحدة ميتة ؟؟؟ عادل: ثوريااا 😡😡 تصدم انور بالهضرة ديال ثورية.. انور: شنو كتقصدي.. يعني!! عادل: مكتقصد والو.. نتا كمل على البحث ديالك.. يمكن تلقاها.. انور: عادل جاوبني.. واش وقعات لرقية شي حاجة.. جاوبني.. بقا عادل ساكت وحتى ثورية معاه.. كأنها ندمات حيت هضرات.. ناض من حداهم انور ومشا لعند امه.. انور: ماما جاوبيني عفاك ومتخبي عليا حتى حاجة.. الام: شنو كاين.. انور: شنو وقع لرقية.. عنداك تكدبي.. حيت الى عرفت الحقيقة من جهة اخرى.. كنقسمليك اني مغانبقا هنا حتى دقيقة.. ومعمرك تعاودي تشوفي وجهي.. الام: اش هاد الهضرة.. واشنو اللي فكرك بيها بعد هاد المدة كلها.. انور: جاوبيني.. شنو وقع ليها.. والا كنقسمليك اني غادي نمشي.. الام: (كتبكي) حرام عليك .. وانا شنو ذنبي.. قدرها هاداك.. انور: شنو وقع.. الام: 😭مللي كان عادل شاد بنتها.. هي بدات كترغبنا اننا نخليوها.. وكتبوس رجلينا.. وماشي بالعاني وبلا ميقصد عادل دفعها باش يبعدها علينا طاحت على راسها.. وماتت 😖... دفناها حيت مبغيناش خوك يدخل الحبس.. انور: اش درتي اعادل .. اش درتي 😓 مصيبة هادي.. اش غانقول لفرح.. وهي عاقدة املها عليا .. اش غانقول ليها دابا .. تأليف دودي العيساتي البائسة- الحلقة 22 دخل انور وهو فاقد الامل للبيت.. فرح: شنو.. لقيتي ماما؟؟؟ انور: معرفتش شنو غانقولك... ولكن.. فرح: شنو واقع 😨 انور: ماماك.. فرح: هضر.. واقعة ليها شي حاجة؟؟ انور: الله يرحمها 😓 الدنيا ضارت بيا.. وماقدرتش لا نهضر .. احساسي فديك اللحظة بحال شي واحد تضرب بالضو.. كل الامال تلاشت.. طحت ومابقيتش عقلت اش واقع.. تخلع انور وبدا كيعيط بالجهد لامه.. تجي تعاونو.. هزها وحطها فوق الناموسية.. وكيحاول يفيقها.. نسيمة: مالها اش واقع.. انور: كله من ولدك.. لو انه مقتلش رقية مكناش غانوصلو لهادشي.. نسيمة: ششششش.. منسمعكش عاودتي هاد الهضرة:. منسمعكش.. انور: لا مغانسكتش.. انا مقلتليهش قتل باش تجيبليا حقي.. هو خرج عدى حياتي.. فرح عمرها مغادي تسامحني.. حيت خويا انا هو اللي قتل ماماها.. كيغادير تشوف فوجهي مرة اخرى.. كيفاش .. نسيمة: قولتليك سكت... ( ضرباتو بطرشة) انور: انا غادي ناخد مرتي من هنا... وعمركم مغادي تشوفو وجهي مرة اخرى.. مشا هز فرح بين يديه:. ونزل من البيت.. ونسيمة موراه كترغب فيه.. نسيمة: لا انور لااا عفاك لا.. انور لاااا... مشا انور حط فرح فالطوموبيل .. وركب القدام يصوك.. العامري: فين غادي بالسلامة.. توقف انور باش يهضر مع باه.. العامري: باغي تبيع عائلتك على قبل هادي.. انور: نتوما اللي اضطريتوني لهادشي.. العامري: اذا حط الطوموبيل وهز مرتك.. وسير تشوفو شي بلاصة اللي تاواو فيها.. ولا عرفتي.. سير خدم تا نتا معاها فشي دار.. غسل الماعن.. وجفف.. حنا انور راسو.. وجا يهضر... العامري: هز مرتك وطلع لبيتك.. كوماكانت حاملة وهازة لحمنا..كنت لحتها من هاد الفيرمة ولا تبعتها لامها.. ولكن... انا اللي غلطت النهار الاول مللي وافقتك تتزوج بيها... مكانش حسابلي غاطيح على خنافرك فخدامة... هز انور فرح وردها للبيت.. وبقا معاها كيحاول يفيقها:.. وهو محبط.. من انه مقادرش ينشق على عائلته.. واكثر لانه ماقدرش يستقل بنفسه عليهم.. هو عارف مزيان انه بلا باه مكيسوا والو.. فاقت فرح وهي فحالة صدمة.. وبدات كتبكي فصمت وانور كيرغب فيها.. فرح: بعد مني.. متقيصنيش.. 😭 انور: فرح انا والله معندي دنب.. عفاك متحملينيش ذنب خويا.. فرح: خوك!!! يعني هو اللي قتلها 😭 انور: 😓ماشي بالعاني.. هو غا دفعها وهي جات على راسها:.. فرح: الشيطان... 😭 انا غانقتلو بيدي.. اما تشدلي حقي.. واما غانشدو بيدي.. انور: واخا.. عفاك تهدني... فرح: ديني للقبر دماما ..😭 انور: واخا غانديك ليه.. نتي تهدني.. ناض انور وشد ففرح وخرج هو وياها.. مشاو للمقابر... حتى وصلو للقبر ديال رقية.. وهي تطيح عليه فرح وبدات كتبكي بالجهد.. فرح: مامااااا .. اهئ اهئ اهئ .. داروك تحت التراب.. ظلموك.. لمن خليتيني... خليتيني باش ينهشو فلحمي امي..، خوديني عندك كنترجاك .. علاش خليتيني بوحدي علااااش 😭😭.. بقا انور كيحاول يهدنها وهي زايدة فالغواات.. لو كان الغوات كيفيق الموتى.. كانو فاقو كلهم.. انور: عفاك افرح .. نوضي باراكة راه البكا كيعدب الميتين .. فرح: متقولش ميتة.. متقولش.. انور: عفاك.. نوضي شدي فيا.. فرح: اه ااااه.. كنموت.. كرشي.. انور: واش غاتولدي .. 😨 صبري حتى نمشيو للسبيطار.. عفاك صبري.. تأليف دودي العيساتي البائسة- الحلقة 23 تأليف دودي العيساتي بقات كتغوت وانور شاد فيها.. حتى وصل للطوموبيل.. وديمارا دغيا.. هي كتغوت وهو مرعوب عليها.. وباغي يوصل دغيا للسبيطار.. فرح كتولد.. وغواتها مسموع.. كانت كتقطع بالحريق.. واخيرا وصل للسبيطار وخرجوها دغيا.. ودخلوها باش تولد.. اما انور.. بقا برا كيستنا.. وهو على نار.. اتصل بامه.. جات وبقا معاه كتحاول تهدنو.. حتى خرجات القابلة وطمناتو.. بأن البنت تزادت بخير.. فرح بزاف وخصوصا مني شافها.. وهزها بين يديه.. نسيمة: زوينة بزاف... شنو رأيك نسميوها مريم.. من ديما كنت كنتمنى نولد بنت ونسميها مريم.. ودابا تزادت حفيدتي.. مكرهتش تسميها هاد الاسم.. انور: نتشاور مع فرح.. ونرد عليك.. انا متأكد ان ولادة البنت غادي تعوضها على كلشي فالدنيا... دخل انور عند فرح ولكن لقاها فوضع غريب.. انور: فرح... هاهي بنتنا.. واش شفتيها... فرح: غادي تتخلع عليا ماما... قالتلي سيري قطفي شوية دالليمون ورجعي دغيا... غاتكون كتسناني.. انور: فرح.. واش نتي لاباس؟؟ فرح: واعداتني اننا غادي نمشي من الفيرمة.. وغادي نتهناو... منبقاوش حياتنا كلها فالذل.. ماما كتعرف تغزل الزرابي.. غادي نمشيو وتخدم الزرابي وانا غانعاونها.. باش نتهناو .. انور: فرح!!! 😢😢 الطبيب: كنتأسف بزااف.. ولكن فرح خاصها ضروري تشوف اخصائي امراض نفسية وعقلية.. بابن انها تلقات صدمة قوية بزاف.. الشيء اللي خلاها فاقدة للادراك.. معارفاش اننا هنا حداها اصلا.. وانها ولدات بنت.. بالعكس. رجعات للماضي..كنصحك تستعجل بنقلها.. حيت حالتها سيئة بزاف.. بقا انور حداها كيبكي.. انور: حتى قلت صافي.. غاتكوني معايا.. وسمحتي فيا.. علاش.. فرح انا كنبغيك بزاف.. نتي قدرتي تغيريني،. انا اللي مكانتش حتى حاجة فالدنيا مستحيلة ليا.. انا اللي من صغري والحاجة اللي طلبتها كتكون ليا.. انا اللي معمر تقالت ليا كلمة لا.. جيتي نتي.. وقلتيلي لا.. كنتي صعيبة فكلشي.. حتى فالمرض ديالي.. صبرتي.. وسكتتي.. ولكن كنت كنشوف فعينك ديما.. التحدي.. ديال انك مغاتنكسريش.. اشنو وقع دابا.. علاش انكسرتي... علاش معطيتينيش فرصة نكفر عبى اخطائي.. ونرجعو احباب.. كنت مستعد اني.. نجيبليك الدنيا لعند رجليك.. مستعد ندير اي حاجة باش نشوف الضحكة فوجهك.. عفاك.. رجعيلي .. حطات الام يدها على كتفو.. نسيمة: خاص تدخلها السبيطار.. انور: مغنقدرش نبعد عليها.. انا اللي وصلتها لهاد الحالة..، نسيمة: الى بغيتيها ترجعليك خاص تدخلها للسبيطار.. ومتخافش.. انا غانتكلف بالبنت.. مسح دموعه.. ومشا وقع على موافقته بانه يدخلوها لمستشفى امراض نفسية وعقلية.. كان قرار صعب بزاف.. الطبيب: على حسب التقرير اللي عندي.. ضروري من انها تبقا مدة معانا.. باش نقدرو نعالجوها..وضروري ايضا انه توقع شي حاجة تحفزها.. انور: انا عارف اش غاندير.. تأليف دودي العيساتيً البائسة- الحلقة 24 والاخيرة من الفصل الاول.. تأليف دودي العيساتي فالفيرمة كامت الام كتحاول توكل البنت اللي سماتها مريم..وكان حداها العامري،، وعادل ولده ومرتو وولدهم.. ثرية: زدتي بنت الخدامة دابا باش تربيها.. نسيمة: هادي بنت ولدي.. ماشي بنت الخدامة.. عرفي اش كتقولي.. عادل: عندها الحق امي.. علاش مهلية فيها.. اريلي نديها لشي خيرية وقلبي لولدك على مرا ديال بصح.. فجأة دخل انور ومعاه البوليس.. انور: وانا جبتليك اعادل اللي غايديوك للبلاصة المناسبة. عادل: شنو؟؟؟ الظابط: نتا مطلوب.. وغاتجي معانا.. عادل: علاش اش درت.. الضابط: نتا متهم بقتل لالة رقية.. الخادمة ديالكم.. عادل: اش كتخربق.. وعندكم شي دليل!! انا مكنعرف لا رقية لا غيرو.. انور: انا اعترفت بكلشي.. وكاين شهود.. جوج من العمال وافقو يشهدو معايا.. نتا قتلتي رقية.. وخاصك تمشي الحبس.. نسيمة: واش تسطيتي.. غادخل خوك الحبس. انور: هو دمر حياتي.. وجالس مبرع وسط عائلتو.. اما انا.. فكنشوف الانسانة الوحيدة اللي بغيت قدامي كتطفا بحال الشمعة،. بسبابو هو.، مغانرضاش بهادشي.. عادل: غادي تندم انك بعتي عائلتك على بنت الخدامة.. انور: سالات الهضرة.. جاو جروه وسط الغوات ديال ثورية ونسيمة.. شوية وهو يطيح العامري.. ومقدرش يتحرك.. زادو غوتو ومشاو لعندو.. اما عادل داوه البوليس.. بعد داكشي اللي وقع العامري هزوه للسبيطار.. وبقا تما شهر.. ولكن للاسف تشلل.. ومبقاش قادر لا يتحرك ولا يهضر.، اما انور.. فمابقا حد كيهضر معاه.. وكيحملوه مسؤولية اللي وقع.. اما هو فكل يوم كيمشي عند فرح.. يشوفها انور: انا شديت ليك حقك.. واش سمعتيني!؟ عادل تشد فالحبس.. وغايخلص الخطية.. عافاك رجعيلي انا عييت.. لا مجيب.. وفرح حالتها هي هي.. فعلا.. من الصبر.. مرورا بالمعاناة والاشواك.. نحو الجنون.. واش ممكن ترجع فرح كما كانت.. وشنو غايطرا من بعد.. كلشي غادي نعرفوه فالفصل الثاني من القصة-فوضت امري للنسيان- مع تحياتي.. دودي العيساتي فصل ثاني قصة فوضت أمري لنسيان https://9isaskamila.blogspot.com/2019/03/blog-post.html