سلام البنات كنتمنى تكونو لباس .. بغيت نشارك معاكم ليوم واحد القصة قصيرة من 14 جزء كاملة .. خيالية كوميدية ودرامية وخاالية من الرومانسية
بعنوان : أمنية رجل ميت
بقلمي : #asmae_ely
~~~ وكما العادة لتسلية فقط
البارت الأول
واحد نهار كنا معروضين عند شي ناس من العائلة البعيدة زعمة ريحة الشحمة فالشاقور .. وبيناتنا كانو داك ناس ناويين يزوجوني لولدهم وعرضونا باش يتعرفو عليا زعمة وحنا مشينا على أساس مافراسنا مايتعاود البراءة وداكشي هه .. مهم داز كلشي مزيان الهضرة بالقياس الماكلة بالقياس ضحيكة تاهي بالقياس .. الحاصول كلشي موزون وخلاص .. الى أن بغينا نخرجو وأنا نتسلت لطواليط حيت بصح كنت مزيرة ايوا وهي تحصر ليا طواليط .. ويلي على فضيحة من نهار لول نعطي ريحة .. مالقيت ماندير وحتى حاجة مابانت ليا تقدر تعاوني يااااربي ماكرهتش الأرض تشق وتبلعني ..وحتى الى خرجت غايتبت عليا الجرم المشهود مهم بان ليا واحد سريجم متوسط شوية طليت منو لقيت واحد البالكون تحت منو مابعيدش عليه نقدر نخرج ونوصل ليه بدون ضرر يدكر .. مافكرتش جوج مرات وهبطت من بعد ماحليت الباب ديال طواليط باش مايعيقوش بلي هربت من سرجم .. ايوا الفضيحة الكبيرة هي ملي وصلت للبالكون شنو غانقول لمواليه .. أنا باطمان شفت عندكم الدخان .. صافي أنا تشوهت ماتغيب شمش حتى تولي سيرتي على كل لسان .
البارت 2
صراحة أنا محدودة الدكاء .. يعني داكشي على قد الحال .. حيدت الزيف من فوق راسي على أساس نقوليهم طاح ليا من سرجم جا فوق لبالكون ديالكم دقيت عليكم مالقيت حد قلت نجبدو لراسي .. وهادي كخطة مبدئية بانت ليا مابيهاش .. ايوا توكلت على الله ودخلت فالكوزينة .. صراحة زريبة ماشي كوزينة عامرة بالمواعن الموسخين .. اذن الدار مافيهاش مرا .. ويااااربي مايكونش فيها حتى راجل ونسل شوكتي بلا دم ... فرحتي ماكملاتش ملي جيت نحل الباب ديال برا حليتها فواحد الراجل .. عرفتو داك لpause ديال المسلسلات الهندية و الله تا طرا ليا ومع الإخراج لي فدماغي مشترك مابين الهند وباكستان و كوريا الشمالية المهم القاضية فيها الكوميسارية يايديني ليها بصفتي شفارة .. ويا نديه أنا بصيفتو مغتصب حكار .. دخل فيا وزاد صافي الاحتمال التاني مافيهاش
- هو : واش انت هي لي صيفطاتك الحاجة ؟
- أنا : الحاجة ؟ (ناري هاد الكلمة شحال كاتخلعني) اينا حج حاجة فيه هاد الحاجة ؟؟
- أشنو ؟؟ واش انت لي صيفطاتك تجمعي دار ؟
- آآآه الدار يسحابني نجمع حاجة واخرى (ناري دابا يجمعني بنص لداكشي جمعت راسي قبل) احم أه أنا .. هادشي بان ليا كتير على الخلاص لي واعدتوني به لداكشي أنا مانقدرش نهلك صحتي على جوج دريال الله يعاونك وقول لهاديك الحاجة توب وماتبقاش تنصب على عباد الله (تميت خارجة وهو يجرني من دراعي)
- راه أنا لي غاتنصبو عليا ياولاد الحرام .. رجعولي فلوسي
- تا اينا فلوس ؟؟ راه ماعطاتني تا ريال المجوعفة لوخرا
- واخا ها نا نعيط لجدها
- (شفتو جبد تيليفون عرفتها كحالت) لا جدها مات شحال هادي فلاندوشين الله يرحمو ويوسع عليه كان راجل مزيان .. وعلى وجهو زيدني 50 درهم نرد ليك دار كاتشعل
- والله ما نزيدك ريال
تفو على جلدة .. من عروسة لتراسة .. أش هاد نحس ياربي ..
- منين نبدا ؟
- بداي منين بغيتي غير ماتورينيش وجهك
- واخا تسنى نمشي نجيب جيكس باش نغسل المواعن من الحانوت
- سيري
خخخخ الدكاء ياربي ولمن عطيتيه .. ومن الحانوت لدارنا وندير ليه مرت من هنا .. وانا غادة عطاني 100 درهم نجيب داكشي لي ناقص .. الله ياسيدي ربي مكانش فراسي طحت فهاد الوحلة باش نربح قرفية ..صراحة نستاهل دازت عليا
البارت 3
ايوا مع جيت بغيت نخرج وانا نسمع صوت سيدة لي غاتكون عكوزتي ( الى كتاب ) برا .. ناري الى خرجت غاتولي سمعتي فالحضيض لداكشي رجعت ماخرجتش وقلت ليه تا نشوف شنو ناقصني عاد نخرج نجيب كلشي فمرة المهم 100 درهم مايكحلش بيها عويناتو .. ايوا بديت نغسل المواعن حتى طابت يدي .. وماقدوه فيل زادوه فيلة
- هو : أش بان ليك تخدمي عندي لشهر ؟
- نخدم عندك لزمر .. عنداك يسحابك أنا فقيرة .. أنا راه غير حْزني الزمان .. وبغيت باش نديباني .. شوف يدي ملمس الحرير يزلق فيهم الجمل .. عاد لبارح مشيت نقاد ظفيراتي عند الكوافورة لي فشوكة .. وشوف سبحان مبدل الأحوال فين أنا دابا .. الدنيا عمرك تيق فيها
- وكي طرا ليك ؟
- أودي قصتي طوييييلة بدات من الطواليط ..احم صافي هانا ساليت المواعن نمشي بحالي الله يعاونك
- وتخمال وتسياق وتصبين لي تافقت عليهم مع الحاجة
- أه هادوك غاتصيفطليهم السعدية هي لي مختصة بداكشي ..أما أنا مختصة غير بالمواعن .. فين عمرك شفتي شي ماكينة ديال التصبين كاتعجن الخبز .. مشااااااا داك زمان ديال تجيب مرأة من الموقف لحم وتصيفطها عظم .. دير الميزاجور أسي محمد راحنا ف 2020 .. وأجي مالك ماتزوجش و تحيد عليك هاد العيشة ديال الزوافرية .. راه زواج زين تولي تاكل الماكلة سخونة وتلبس حويجات نقيين تنعس مرتاح وتولد وليدات يعمرو عليك القنات .. شي نهار تموت كارم مايعرفوك حتى وقتاش متي .. أنا راه غير بقيتي فيا وقلت نصحك لوجه الله أما انا ماعندي لا ناقة لا جمل فهادشي
- (باستغراب ) متأكدة صيفطاتك الحاجة ؟؟
البنات تال غدا ونكمل ليكم عييت وتبلوكيت وحاسة براسي غاكانخربق هه
البارت 4
- هو : (باستغراب ) متأكدة صيفطاتك الحاجة ؟؟
ناري بديت ندور فعويناتي خفت نكون قلت شي حاجة ماهياش .. أصلا أنا فمي ديما خارج عليا هادي ماشي جديدة ولكن جديدة هي لوحلة لي أنا فيها
- أنا : احم شوف انا راه امرأة محترمة ماعزيزش عليا نبقى نهضر مع الرجال فالخوا الخاوي ... شغلي هانا درتو والله يعاون العاونات
وانا خارجة بانو ليا شي تصاور فوسط الدار فيهم هو وواحد المرأة وجوج بنات صغارات
- هانا على الخوينز قوليا مزوج .. مراتك غضبانة خخخخخ قولها من الصباح وسير أصكع صالحها كاين شي واحد كايدابز مع هاد البلارة .. شوف دي ليها شي مشموم ديال الورد ودير ليها شي إهداء فالراديو واعتذر ليها على الهواء مباشرة هاانت هانا الى ماسمحاتش ليك .. حنا أصلا العيالات حوايج بسااااط كايفرحونا
خرجت ومشيت لدارنا و انا كل خطوة كانحمد فيها الله ونشكرو حيت خرجني من هاد المصيبة .. ايوا وصلت لدار لقيت ماما محيحة
- ماما : فين كنتي أبنت الحرام من فعايلك ؟؟
- اينا فعايل أماما يهديك الله )درت مافراسي مايتعاود)
- أش هاديك الحالة لي خليتي فيها طواليط ديال ناس جاب الله دخلت من موراك فكيت جرة .. أما كن فضيحتنا تنشر فجورنال
- حلفي بالله حتى فكيتيها الله ياربي شحال كنت خايفة .. أجي بعدا .. عجبتهم ؟
- عجبتيهم غير هو بقا فيهم الحال مشيتي بلا ماتسلمي عليهم .. منين خرجتي بعدا ؟؟ تاحد ماشافك
- ههه خلي داك جمل راكد خرجت من سرجم لي فطواليط
- اويلي هاداك سرجم مايخرج حتى المشة هه
- والله الى خرجت منو ونقزت فالبالكون ديال دار لي تحت منهم (وبديت كانعاود ليها على نيتي)
- واااا نوضي تشللي ههه هاداك سرجم راه يدك الى خرجتيها منو توحل .. وهاديك دار لي قلتي دخلتي ليها خاوية هادي عامين على ماقالو ليا ..وهداك راجل لي شفتي مات هادي 3 سنين ومراتو وبناتو مشاو لمدينة واخرى وبقات دار خاوية
- هههههههههه (جاني الهيستيرية ديال الضحك واخا الموضوع مكايضحكش) لا واقلة غير مفهمتينيش .. هانتي ها 100 درهم عطاها ليا ( درت يدي فجيبي باش نجبدها نوريها ليها لقيت غير ريح بحال ملي كاتحلم بلي الفلوس فيدك وكاتفيق كاتلقى غير ضباب .. هنا مانعاودش ليكم طلعات معايا تبوريشة لراس )
- ناري يابنتي (جات كاتقيس ليا جبهتي) ياكما تخطيتي شي حاجة باش ماتزوجيش .. ولا ياكما يكونو هما لي دارو ليك شي حاجة باش يديروك تحت صباط نوضي ألكبيدة نبخرك بالعرعار لي مايخلي تا عار
البارت 5
وصل ليل وانا باقا مبلوكية بحالا مشييرة .. زعمة يكونو هادو أعراض ديال الفصام ولا دهان لا لا يكونو أعراض الاكتئاب أصلا انا مؤخرا حسيت براسي مابقيتش كاناكل مزيان الله يسمح ليا على هاد الكدبة .. تفو بقات فيا غير داك مائة درهم كنت بغيت نشري بها شحااال من حاجة .. مايكونش زعمة هاداك لي شفت جن أصلا الدار غير كاتخوى 40 يوم كايقولك كايسكنوها جنون بسم الله رحمان الرحيم ..وتكون زعمة داك الحاجة لي كايظل يهضر عليها هي العفريتة ديالهم كاتخدم جنون فديور .. نااااري دابا يسمعني شي جن يصرفقني على هاد الهضرة مهم نقلبو الموضوع .. بقيت جالسة حتى صونا عليا تيليفون برقم مامسجلش عندي جاوبت وأنا كانقفقف
- أنا : ألو .. شكون معايا؟؟
- هو : بلا شك هضرو لك عليا
- أ .. أ .. اه قالو ليا متي هادي 3 سنين
- أشنو ؟؟؟ بسم الله عليا راني مزال ندك وندردك .. حرام عليك .. انا هو سيد لي باغيك يخطبك .. عاد كنتو عندنا ليوم فدااار
- أأأأه (أففف رتاحيت)
- كنت بغيت نشوفك ولكن مشيتي بلا ماتعلمينا .. ياكما قلقناك فشي حاجة ؟؟؟
- لا ماشي هكاك .. راه خليت ليكم سبيرديلتي باش تقلبو عليا مال ساندريلا باش حسن مني هه
- ههههههه لا هادي استراتجية ماطاحتش ليا على البال
- وهاهيا طاحت ليك هزها هههه
- لا داق منها شيطان ههههه ... ما علينا ندخلو فصلب الموضوع
- لا غير دخل انت انا نتسناك على برا كنحشم هه
- لا والله تا تزيدي الموضوع موضوعكم .. غير هو حيدي صباطك قبل مادخلي
- عندي سبرديلة وحدة خليتها عندكم ههه
- نتمناو المرة جايا تخلي عندنا قلبك
- أنا : (فهمت قصدو ولكن درت راسي مافهمتش) أويلي على مالكم وليتو كاتاجرو فالأعضاء ؟؟
- لا كانتاجرو فالغبرة ههه دابا واش ندخلو فالموضوع ولا نبقاو على برا عاصرين .. مهم الدار كلهم عجبتيهم وحتى انا عجبتيني كنتمنى تا حنا نعجبوكم ويالخصوص أنا .. ماعرفتش شنو هو رأيك فزواج تقليدي
- هو بحال القُمر ياربحة يادبحة .. بحال علبة المفاجئات الى عرفتيها .. اصلا زواج بنظري كلو هكاك كاتحاول تكمل حياتك مع شخص انت ماعرفتيه سوى لحظات معدودة .. وهو كذلك ماعارفكش بزاف .. كاتحاولو تعيشو وتعايشو مع بعضياتكم .. بصراحة هو كايبان بحال التضحية لي ماعندها حتى معنى تضحية بحياتك الهنيئة مع عائلتك باش تعيش مع شخص غريب .. ولكن كاينين شي حوايج زوينين ماغاتحس بيهم الا فالزواج كايستاحقو هاد التضحية متلا انك تكوْن أسرة صغيرة تكون ام ولا تكون أب .. وتكون نصف انسان آخر وتكون كل اهتماماتو ... إلخ
- بصح وهادشي خصو الانسان صح ولا غاياخدك فمنزلق لا يحمد عقباه .. لداكشي كاينة واحد الفترة سميتها الخطوبة تقدري تعرفي الى حد ما من خلالها واش شخص مزيان ولا غير غايزيدك عداب .. لذلك واش تقبلي تكوني خطيبتي ؟؟؟
- امممم خليني نفكر (واخا انا موافقة ولكن شوية ديال تقالة مع رزانة خخخ)
- فكري وأ أنا كنتسنى جوابك
مهم بقينا كانهضرو عادي بضع دقائق وسالينا الاتصال مهم رتاحيت ليه شوية والأهم خلاني نسا الموضوع الأخر
#بس البنات هادو هما الأجزاء ديال اليوم كنت بغيت نساليها ولكن قلت نزيد نطولها غير شوية مع توحشتكم وتوحشت أرائكم لي كانتمنى ماتبخلوش عليا بهم
البارت 6
ايوا من بعد اخر مرة بدينا كانهضرو كل مرة .. انا وخطيبي طبعا أو خطيبي المستقبلي حيت مزال ماجاوش يتقدمو ليا رسميا واخا أنا قبلت ^^ صراحة بدا كايعجبني حيت مختلف واخا هاد الاختلاف خلاني نشك واحد شوية ولكن نعلت شيطان ,, حيت جاني ماشي بحال كاع رجال او نقدرو نقولو هو لي راجل زعمة خخخخ كنحشم .. حيت بصراحة ماعمرو قاليا صيفطي ليا تصويرتك ؟ ولا نديرو أبيل فيديو ؟ ولا شنو لابسة؟ ولا شنو نسميوا ولادنا ؟ولا نتلاقاو بتخبية على داركم ؟ ولا حتى عمرو قاليا زين لفنون عمري حبي مهم راكم عارفين .. وليت كانقول غير ياربي مايقولش ليا ختي هه ... غالبا مكانهضرو غير فمواضيع عامة بحال الأصدقاء وصاف .. نقدرو نقولو نسيت داك نهار المعلوم وعتابرتو كحلم فقط .. والفيقة ضرباتني من نهار قالت ليا ماما بلي داك الناس لي كانو غايخطبوني مابقاوش باغيني
- اويلي أماما انا كانهضر مع ولدهم كل ليلة .. كن بصح ماعجبتوش كن قالها ليا ولا عمرو يهضر معايا
- منين غايهضر معاك وهو كاع ماعندو نمرتك
- يكونو عطاوها ليه .. تكوني .. انت عطيتيها ونسيتي
- انا ماعطيت لتاحد نمرتك
- مالنا على القرع نمشطولو راسو .. انا نعيط ليه دابا ونسولو .. تسناي
هزيت تيليفون وانا كنترعد .. كانقول ياربي غير يكون هو ويكون بصح ماعجبتوش ولا يكون داكشي لي مابغيتش نفكر فيه .. هزيت تيليفون بديت كنقلب على سميتو فلكوناكط مالقيتهاش دزت ليزابيل مالقيت حتى شي ابيل بسميتو ولا شي حاجة كادل على انني فايت هضرت معاه .. لوني تخطف ريقي نشف ماحسيت براسي حتى لقيت البصلة على نيفي وماما كاتحركني
- ماما : الله ياربي الله قالوها ليا وقلت غير عديان باغين يوقفو لبنتي فالسعد .. حمقو عروستهم لولى وباغين يحمقو ليا حتى بنتي .. طاسيلت السحارة الله يعطيهم العداب هنا ولهيه ياربي
- أنا : فيا .. العـ طـ ش
- العطش فيهم وجوع فيهم وجمع ياربي المصايب ديال عاد وتمود وعطيهم .. هانا نمشي نجيب لبنتي تشرب
ناضت للكوزينة وانا نضت للباب الى زدت دقيقة وحدة فالدار غانتخنق .. بقيت غادة بحال المسحورة حتى وصلت لباب داك ناس دقيت خرجات عندي امهم .. ماقالت ليا لا سلام لا زيدي مرحبا .. نيشان فالباب شنو بغيتي ؟ .. مالقيت مانقول قلت ليها بغيت غير سبرديلتي .. حيت بانت ليا فداك لحظة سبرديلتي غاليه عليهم .. نكراتني نكير جمل لحدبتو .. وهي مزال كاتنكر طلعات بنتها من دروج لابساها .. بديت كانشوف فبنتها .. وهي تنقز قالت ليا عنداك يسحابك سربديلتك هادي راها سبرديلتي .. فرشات راسها براسها .. قلت ليها عارفة سبيرديلتي بعدا وعارفاها كاتشبه لسبرديتك .. قيستيها ؟ جات قدك ؟ ايوا بالصحة تلبسيها فلخلا وجلا .. وخليتهم وهبطت بحالي فدروج يخخخ على عائلة حمد لله لي ربي فكني منهم .. وانا باقة هابطة فدروج وصلت حدا الباب ديال الدار المسكونة بسم الله الرحمان الرحيم .. دزت من حداها بزربة ومع درجة لولة من داك طاج سمعت شي حد كايعيط ليا بسميتي جاتني القشعريرة
- أمنية.. حشومة دوزي من حدا الدار بحال الغريبة
- أنا : (ضرت لقيت داكشي لي كنت خايفة منو هو بشحمو ولحمو) شـ نـو بـ غـ يـ تي مني
- بغيت نقدك وتنقديني
- تنقدني بنت ليك غارقة فالمحيط الهندي .. و أش غانقد فواحد ميت ياكما جاك انجراف التربة ولا غطستي فالمياه الجوفية متلا .. واش حماقيتي ؟؟ لا أنا صراحة لي حماقيت شوية نبدا نلوح فحوايجي ياربي
- ها انت براسك قلتيها غاتبداي تلوحي فحوايجك الى ماشي دابا فاكانأكد ليك أنه قريب
- وشنو المطلوب مني .. فروج كحل ؟ زغب الفار ؟
- لا
- أنا ماعرفتش شنو هادشي لي كايطرا ولا شكون انت ولا شنو باغي مني .. ولكن مستحيل نزيد نتورط واخا نعرف نحماق
هبطت مع دروج ومشيت لدارنا
البارت 7
من مورها دازو عليا أيام كحلة أستغفر الله على هاد الكلمة ولكن راه بصح دازت عليا .. وليت مكانحملش الدار والى خرجت مكانحملش الزنقة.. وليت دايرة كيف الحمقة .. بليل كايجيوني أحلام خايبة ديما فايقة فنص ليل كانغوت .. ضعافيت وولا تحت عيني كحل بحال دب الباندا .. مهم ولات حالتي حالة لدرجة انني وليت مكانحملش راسي بحالا أنا هي عدوتي .. بعد المرات أو أغلب المرات كنتمنى ماتغربش عليا الشمس والى غربات ماتشرقت .. ديما مع 9 ديال ليل كايصوني عليا تيلفون بنفس النمرة هو مكايصونيش ولكن انا كانشوفو كايصوني ... اصعب حاجة هي تولي ماتيقش فراسك وتولي ديما شاك .. شاك فناس لي حداك ..وحتى فالحيط لي موراك .. واحد نهار قررت نوضع حد لهاد الحالة لي أنا فيها .. بما أن الإنتحار حرام ... فقررت أنني نعيش وماكايهمنيش نكون حمقة ولا بعقلي مدام أن الحماق كايعيشو مامسوقين لتاحد .. فمانخسرش ليهم السمعة ..و ماغانبقاش نقاوم نطلقها تسرح .. مهم دازو يام مابقيتش كانحسب ، حتى لقيتهم جاريني لواحد المصحة ديال الحماق حيت بصح والديا عياو معايا .. مالقاو ليا تاحل .. دوزت شي أيام زوينين فالمصحة ولاو كايسميوا عليا زملائي تما « شيخة لوپيز» مع عزيز عليا شطيح لدرجة ولا كلشي كايعلق ليا الكواغط .. الله يمسخهم راني حمقة ولكن مزال نفرق بين القرفيات والقوقيات وحتى الزرقات .. واحد النهار جالسة كاتمشط ليا الحاجة شعري (مقطعة تاهي الوراق بحالي) ..وهو يجي عندي هداك لي على بالي وبالكم سبابي فعدابي ...
- هو : شفتك عاجبك الحال ؟
- أنا : من الحامدين الشاكرين مابقيت نهز لهم لا لزواج ولا لولاد .. لا لخدمة ولا حتى حد ... هازة لهم غير لسهرة ديال غدا .. أش بان ليكم ألحاجة نوع ليكم غدا ونشطح ليكم حتى شرقي .. ولايني الى تعطيوني الغرامة بزاف
- هو : دابا شنو ؟ غاتبقاي على هاد الحال ؟
- ههه اه حتى نلحقك الى كتاب
- مزيان انت هنا كاضحكي وماماك مانشفوش عينيها من دموع عليك خسارة وكاع لحمل والوجع والعداب عليك خسارة وحياتك لي داز منها وحتى لي جاي خسارة
- شنو بغيتي مني ؟
- تعاونيني
- نعاونك ؟ هدا راه الحماق براسو
- على الاقل حسن من هاد الحماق لي ماغايدي بيك فين .. على الأقل حاولي
- واخا ولكن بشرط مايكونش فيه شرك ولا شي حاجة ضر بشي حد .. ومايكونش منافي للنظام العام والأخلاق الحميدة .. وحتى دوز سهرة ديال غدا حيت مهمة فمشواري الفني
البارت 8
ودازت السهرة نايضة .. حتى ولا طايح كتر من نايض ونايض دايخ .. وأنا براسي دابا راكبة فالكار ودايخة
- أنا : (بجهد) شنو قلتي دابا أنا نرجع مراتك وبناتك لداركم .. وانت تحيد سحور لي دفنوه ليا عند راسك
- هو : شششش ناس كايسمعوك
- انا : (بتوشويش) سمحليا ولفت نهضر فسبيطار الحماق بجهد وتاحد مامسوق ليا .. بعدا الحماق لي كايعجبني فيهم كايخليوك تهضر على راحتك داخلين سوق راسهم
واهاكدا تافقنا أنا والسيد الميت ... كانتمنى يكون اتفاقنا حقيقي ومانكونش كانتخايل حيت غانولي «مجنونة رسميا مبحوث عني دوليا »
وصلت للمدينة أو نقدرو نقولو عروبية .. كانت حتى حاجة ماميزة فيها من غير واحد الخزانة باينة تما عرس .. اححح ليوم نبرد غدايدي فشطيح والماكلة والبياتة فابور هدا هو السعد المسكد .. مشيت كانسول شي دراري كانو كايلعبو .. على شكون العريس وشكون العروسة باش نعرف راسي من عائلة من ؟.. ولكن الصدمة هي ملي قالو سميت العروسة هي المحروسة لي جيت على ودها ... عمري شفت شي ميت وجهو صفر حتى شفتو ليوم ههههه
- أنا : (جاتني الهيستيرية ديال الضحك) هههههه دابا بغيتيني نديها بوحدها هي وبناتك ولا نديها هي وراجلها وولادهم أجمعين ههههه
- مستحيل تكون باغا تزوج
- شوف انت راك متي وهي مزالا حية من حقها تزوج وتكمل حياتها .. كن كنتي بلاصتها كن جبتيها من العزايات ..
- مايمكنش
- شوف فرق عليك السيدة ولا راه غاترجع روح شريرة أصكع.. وزايدون واش بصح ماكنتيش عارفها غاتزوج وبغيتي تستاغلني ؟؟؟
- انا راه ميت ماشي جن
- اه نسيت .. ماعلينا انا باغا نحضر للعرس شحااال هادي مانشطت .. ولكن الى كانو غايتجرحو مشاعرك ودخليا فاكتئاب يااالاه نحسبو لخطوات
- نشوفها بعدا
البارت 9
هو مشا وانا جلست كنسرح رجليا فالخزانة .. شمش قربات تغرب والعرس قرب يبدا .. والسيد الميت عاد جا .. قاليا تبعيني .. تفكرت غير الكاهن سيباستيان فمسلسل المرأة المجرمة هههه .. تا انا تبعتو على سعدي وعدي وأش عند الميت يدير قدام غسالو .. بقيت تابعاه حتى وصلت لواحد البيت دخلت لقيت مراتو جالسة بوحدها
- صيفطاتني فاطمة (ماعرفتش شكون فاطمة ولكن ضروري ماغاتكون شي وحدة فالعرس عندها هاد سمية ) قالت ليا خبي دهبك فبيت العروسة حيت هو البلاصة الوحيدة لي فيها لامان
مارداتش عليا وحطيت صاكي فالأرض أصلا عامر غير حجر .. حمقة باش كاتسناوه يكون عامر
- أنا : انت هي العروسة ؟ مبارك ومسعود برفاه والبنين ان شاء الله
- هي :شكرا
- وتولدي شي بنيتة ولا وليد يشبه لك ..(ولامجيب) عرفتي تا أنا كنت غانتزوج كن ماسحروش ليا الكفارة الله يعطيهم العداب .. خلاتها ماما .. خطيبي مات بكسيدة الله يرحمو .. وانا خرج ليا العقل .. ماتصوريش شحال كنت كانبغيه .. الله ينجيك من هاد الاحساس لي كانحس به دابا نار شاعلة فقلبي
- حسيت بها ومزال
- كيفاش ؟؟؟
- والو
- شوفي الى ماكنتيش باغا تزوجي أنا غانعاونك
- فات لوقت
- غايفوت الى ماستغلتيش هاد الفرصة .. كانواعدك انك فعينين كلشي غاتبقاي مظلومة
- كيفاش ؟
شرحت ليها الخطة بالحرف .. وحيت كانت بحال شي غريق قررات انها تشبت بالقشة لي عطيتها .. انا حمقة وكن تعرضات عليا هاد الخطة كن رفضت بكل تواضع .. ولكن كايقولو الحب هو أكبر أحمق وهي باينة باقا وفية لراجلها أو بناتها وهاد زواج مجبرة عليه .. مافهتش علاش المرأة الأرملة والمطلقة مكايتهناو ويقيلهم حتى كايزوجهم وكأن الأمان فهاد الدنيا غير مع الراجل .. والغريب انهم خايفين عليهم من راجل ومزوجينهم براجل .. بحال هداك لي كايغتاصب بنت مرة وكايزوجوها ليه باش يغتاصبها ديما .. شوفو أنا غير حمقة يمكن ملي نولي بعقلي نفهم هاد المعادلة الصعبة
البارت 10
بدا العرس .. واشتعلت الأضواء وبدات الموسيقى .. ودخل العريس و العروسة .. وانا وسيد الميت واقفين بعيد كانتسناو اللحظة المناسبة ..
- أنا : بدا كايتنادم معايا الحال .. ماتعرف يكون هو كايبغيها وحتى هي تولي تبغيه مع الوقت ؟
- يسحابك ماغانفرحش الى شفتها فرحانا .. يسحابك أنا أناني تالهاد درجة .. يقدر انا مع الوقت تنساني .. حيت عارفاني تحت التراب وجمرة لي فقلبها تدفى .. ولكن بناتنا ..بناتنا لي باغين يفرقوها عليهم ويحرموها من ريحتهم عمر حرقتهم تبرى .. المرأة تقدر تنسى الراجل لي كاتبغي .. ولكن ولادها عمرها تنساهم
- صافي ياتربح انت يانتدبح أنا .. الى كان شي قبر حداك خاوي قولهم يوجدوه
هزيت جلايل جلابتي وكفظت على يدي .. ومشيت عند الكوامانجي يقول رباعتو يحبسو راني غاندير واحد الاهداء للعروسين .. وملي نبدا نهضر يدير شي موسيقى حزينة .. بلا شك عرفتو الإهداء كي غايكون نقلت الفكرة غير من واحد الفلم هندي .. راه قلتليكم عقلي محدود الدكاء وزدتو بهاد الحماق صافي كمالت .. مشيت قدام العريس قاديت الوقفة وستعملت مهارات الإلقاء لي علموني زملائي فالمصحة
- أنا : عطاك خاطرك تزوج .. ضحك وتنشط وتفوج .. وأنا وحدي ندب ونتعوج .. (الله على القافيه هه بداية موفقة ) .. أنا غلطت بصح وراضية بالجزاء .. ولكن شنو دنب ولدنا .. ولدنا لي هازاه فكرشي بين مسراني ومعدتي .. (بغاوني نحبس ولكن العروسة حبساتهم باش نكمل من حقها تعرف زعمة هه )
- العريس : شكون هاد الهبيلة ؟؟؟
- أنا : بصح عندك صح ديما كنتي كاتقول ليا انت مراتي يالهبيلة ... غير تيقي فيا هاد ليلة ... وها نتيجة .. انت كاتزوج وانا وليت قدام الناس كانبان حمقة وهبيلة .. شنو دنبي حيت أنا يتيمة درت لك القيمة ... حيت ماعندي لي يبغيني أنا بغيتك .. وحيت ماعندي لي يخاف عليا أنا خفت على مشاعرك .. عقلتي ملي قلتي ليا أول مرة كانبغيك أنا تيقتك وقلبي عطيتك .. باش مراتك جديدة حسن مني ؟ .. حيت هي بنت دارهم وكاتعرف الحلال من الحرام .. وأنا بنت الحرام كي مشيت معاك نمشي مع عرام .. هادشي لي كاتقول فخاطرك ياك .. كانحلف ليك وكانحلف لكاع الحاضرين عمرني ماعرفت شي حد غيرك ولا شفت فعينين من غير عينك .. بغيتك وكن طلبتي ليا الروح كن عطيتك .. و حيت كانبغيك عمرني نوقف فطريقك الله يكمل عليكم بالخير وكانواعدك ولدي نسميه على سميت باك حيت أنا ماعنديش با .. كنتمنى لكم السعادة وياخد من عمري ويعطيكم .. (تاجهت جهة العروسة) أنا ختي حلمت وانت حققتي
كلشي تأتر بكلامي أنا براسي أترت فيا نهضر ونتمخصص تا بصح تيقت ..والله يسمح ليا كانحلف على الكدوب ولكن راني حمقة ومرفوع عليا القلم .. والأهم من هادشي أن العروسة رفضات تكمل الزواج .. اصلا كاع ناس ولاو مستنكرين هاد العرس وكايشوفو فالعريس شوفة ناقصة .. لدلك اب العريس قرر يتدخل وياريتو ماتدخل وياريتني أنا براسي ماتدخلت .. ملي اجبرني نحل محل العروسة .. الحضور عجبو الحال كايشجع على الفساد و حيت أصلا ماشي من مصلحتهم يتلغى العرس وهما مزال ماتعشاو
- أنا : عمي الله يطول فعمرك ويكتر من متالك ولكن أنا مزال قاصر ماعنديش لاكارط .. راه واخا كانبان ليك كبيبرة راه غير الهم والغم الله يبعدو عليك هو لي كبرني
- أب العريس: ماتحتاجيش أصلا حنا كانتزوجو غير بالفاتحة .. تا تولدو ونديرو ليكم العقد
البارت 11
بغيت نحتج ولكن خفت على عمري وانا مزالا في ريعان شبابي .. مهم داز عرسي زوين الماكلة كانت بنينة ناس فرحانة ودنيا ماشية زي الفل .. الى ان مشا كلشي بحالو وبقينا انا وعريسي في غرفة واحدة ليوم يقتل جدي ... ومن شدة لي شد ليا فعنقي باينة ناوي يقتلني خنقا ...
- العريس : (بغضب) شكون انت ؟
- أول حاجة خصك تعرفها عليا هي أنني كايعجبني الراجل الحرش .. وانت تبارك الله ماشاء الله اللهم زد وبارك بتاخد العقل خلاوها خوتنا لوبنانين
- شكون صيفطك عندي ؟؟؟؟
- ربي قالك ادا أحب عبدا ابتلاه .. وانت ربي بغاك وبيني وبينك حتى انا بديتي كاتحرك شي حاجة فداخل ديالي
- واش زينب لي مابغاتش تزوج بيا وصيفطاتك .. دابا عاد بديت نفهم .. كن قالت ليا مابغاتش تزوج بيا وماديرش هاد الحالة
- ماشي هي لي صيفطاتني .. مهم هي أصلا كن كانت كاتبغيك كاع ماتيق فوحدة غريبة فنهار عرسها .. درت فيك خير .. واصلا كن مكاتبين لبعضياتكم مكاينش فدنيا لي غايفرقكم .. واللهم نفرقكم أنا ولا تفرقكم الموت .. مهم دوز بخير نمشي راه قالبين عليا دنيا
- قلبتي لنا حياتنا وبغيتي تمشي تقادي حياتك
- راه غانولي نبغيك انت .. وجا مايفكك مني أصكع راني دايرة كي تابعة
- مستحيل نخليك تعتبي لباب
- ماتقولش ليا غانولي مراتك ديال بصح .. اخخخخ هادشي كنشوفوه غير فالقصص .. دبا عاد فهمت علاش تحصرات ليا طواليط نهار لول .. كن تعرف أعمري قداش تعدبت باش وصلت عندك ربي عوضني ولله الحمد
- أش كاتخرفي ؟؟؟
- ماعلينا الماضي نساه .. والحاضر ليوم معاك غانبداه .. أحبي
خرج وزدح عليا الباب ... ههه كنت عارفاه من النوع لي ماعزيزش عليه الضحك وواخا يكون عزيز عليه .. مستحيل يقدر يضحك اليوم .. مهم فكرت نهرب ولكن والله اما عندي جهد حتال غدا
البارت 12
صبح صباح وأنا كلي نشاط وحيوية .. خرجت من البيت كنتجبد وانا نلقى شي عيالات حدا الباب بداو كايشوفو فيا
- أنا : ماتشوفو فيا مانشوف فيكم ماعندي سروال .. قضينا الغرض فسونيما الأطلس
دزت وخليتهم كايضحكو ودخلت للكوزينة لقيت عكوزتي كاتوجد .. كفضت على يدي وبديت كانعاوها .. بدات كتحتج
- لا ابنتي انت مزالا عروسة
- ما عندي حنة فيدي نخافها الطير .. شوفي أخالتي واخا نبدا نقولك ميمتي حبيبتي .. خالتي كاتجيني تقيلة .. من ليوم حسبيني بنتك لي تقالت عليك خفافت عليا .. شغل ديال الدار كلو عليا .. باركة علينا غير ديها لنا فصيححتك الله يطول لينا فعمرك وفراحة بالك ... شوفي بيني وبينك كنا متافقين انا سيمو زعمة محمد (راجلي المفترض) أنا بنص صداقي (زعمة عطيوني رزقي) وهو بداكشي لي قسم الله والى ماصيفطناك العام جاي عمرة نصيفطوك العام لي موراه حج .. ودعي معانا تم ألحاجة (فهاد لحظة دخل راجلي وغوت عليا ودافعات عليا عكوزتي الله يخليها ليا حسن من داك العقروشة لولى ربي ماكيسد باب حتى كايحل بيبان .. جلست حدا جوجي )
- انا : حبي خرج الدلاح ؟؟؟
- هو : (بلحس) غانهرس ليك وجهك الى مابعدتيش مني
- مالك كاتهضر غير على ضرب واش كنتي معنف فصغرك .. ماتخافش أحبي غانتجاوزو هاد المرحلة من بعد ما نمشيوا نزورو واحد طبيب نفساني ضربة بطلة .. انا براسي تعالجت عندو .. والمرض ماشي عيب .. العيب هو ماتعتارفش بمرضك (شفتو كايزير على يدو وانا نسكت أو بدلت الموضوع حيت انا ملي كانبدا مكانسكتش) فين بتي لبارح .. لعيالات لقيتهم حدا الباب كايتسناو سروال حشمت كاع
- انت كاتحشمي ؟؟؟؟
- اه وكانتزنڭ الى بغيتي .. راني باقا نعجبك غير تسنى
هنا ناض وخلاني صراحة جننتو .. المهم خليتو يحس بشي حاجة .. مانمشيش خالية الوفاض ههه .. ماعرفت علاش فواحد اللحظة جاني البكا .. خفت غير نكون كنهلوس وتاحاجة من هادشي ما بصح .. خفت نبقى حمقة حياتي كلها نخسر عائلتي ونخسر عقلي ونخسر راسي ونبقا تايهة فهاد دنيا
البارت 13
مشيت عند زينب لقيتها هي وبناتها فرحانة بحال شي حمل تحيد من على رقبتها
- انا : بناتك زوينات بحال ماماهم وباباهم .. شفت تصويرتكم قداش كنتو كاتبانو فرحانين .. موت راجلك مكاتعنيش بلي انت ضعيفة ..بالعكس ربي بغا يختابر قوتك .. وانت قوى من هاكا .. ماتخليش شي حد يفرقك عليهم ولا يقلل من شانك وقيمتهم ... تفكري بلي انت الى مابغيتيش تاحد مايقدر يبززك على شي حاجة .. ربي فرق ريوس باش مايفكر بلاصتنا تاحد ..رجعي لدارك خلي بناتك يقراو وحتى انت قراي وخدمي وعيشي حياتك بما يرضي الله .. بصح زمان قاسح ولكن الله معانا والله حسن كلشي ونهار تبغي تزوجي تزوجي براجل كاتبغيه وكايبغيك ماشي باش يبعد عليك هضرت الناس
ماكنتش كانقوليها هاد الهضرة بقدر ماكنت كانقولها لراسي .. أنا لي وليت كانشك فراسي بلي حمقة علاش مانشكش بلي أنا قوية وبعقلي .. مهم الهضرة بزااااف والتطبيق حسن .. خرجت من عندها ومشيت للمحطة باش نرجع بحالي ولصدفة الأقدار طلعت فالكار وانا نلقى راجلي سيمو هارب .. جلست حداه
- حصلتك ألعفيريت هارب مني .. ولا دايرها ليا مفاجئة باش نمشيوا لشهر العسل .. أري ليا داك دماغ نبوسو ونرجعو ليك بلاصتو .. نمشيوا لشفشاون وندوزو لإفران نطلعو لشمال ومن بعدها نمشيوا لزاكورة نكمدو عظيماتنا
- واش انت جنية ؟
- عرفتي كن كنت جنية كن برعتك فلوس وكن دوزنا شهر العسل فالمالديف .. ولكن خسارة أنا غير من الإنس ولكن كانبغيك
- بناقص أنا غانهبط من هاد الكار
- اجي بعدا عطيني غير ورقتك راه ماعندي باش نخلص
سمع شيفور تصريحي الأخير وهو يتبعني ليه .. ايوا شوووفو لزهر المعكس
البارت 14 والأخير
ورجعت لداري ودار فاميلت راجلي وجلست معاهم شي ايامات سمينة على عسيلة .. ولكن مع راجلي زفيتة على لفيتة .. باقي ماولفنيش واخا أنا كاندخل للخاطر بلا خاطر ..واخا بدا شوية كايلين من جهتي .. ماعلينا وأنا راسي على كتفو وهو كل مرة كايقول تفو .. ولكن مع عمي لي ولا كايحسبني بنتو يخاف يهز راس يضربو ضو .. ايوا كاتفرجو فتلفازة بحال أي عائلة سعيدة ..حتى تجي داك الفقرة ديال نداء ولوليدة والواليد دايرين تصويرتي ديال لاكارط وكايقولو بلي بنتنا حمقة وهاربة من سبيطار الحماق .. ويلي تشوهت كلشي دار عندي
- أنا : الله شحال كاتشبه ليا داك البنت ماتكونش زعمة توأمتي ويكونو هادوك با ومي لي حطوني فالخيرية من نهار تزاديت .. أنا مسامحة ليهم شوف مساكن شحال زوينين باينة عليهم حنان ياك أحبي قيد قيد نمرة نعيطو ليهم .
- عمي : واش هادي ماشي انت ابنتي
- أنا : لا ويلي أعمي أنا خارجة من سبيطار الحماق راه غير مصحة هاديك أأأأ زعمة انا ملي عرفت سيمو غايتزوج حماقيت ولكن شربت دوايا والحمد لله دابا لباس .. عمركم سمعتو مني كلمة العيب .. أنا راه سمحت فعائلتي وقبيلتي غير باش نعيش مع سيمو .. انا اعمي هي نسخة الحقيقية ديال فيلم البرتقالة المرة عمرك تفرجتي فيه ؟
- عمي : (مع سيمو) هزها دابا ورجعها لدارهم
- أنا : لا نقدر نمشي أعمي على رجلي بلا مايهزني
ههه مهم ماطلع نهار حتى داني لدارنا .. احححح شحال توحشت دارنا بزااااف مانقدرش نوصف ليكم فرحتي بشوفتهم.. الوالدين عمر شي حد يعمر بلاصتهم وعمر شي عقل يقدر ينساهم .. شكرو بزاف محمد حيت رجعني لدار أما أنا فكان كايدين ليا بالإعتدار قبل من الشكر وهو لي بادرت به ملي كان باغي يمشي من بعد ما بقينا بوحدنا
- ما عرفتش شنو غانقول ليك باش تيقني وتسمح ليا .. وانا براسي ماعارفاش شنو لي بصح وشنو لي كان غير كايتخايل ليا .. دمرت ليك عرسك وطيحت عليك الباطل و رديتك الظالم .. لأسباب تقدر تكون مجرد هلوسات .. دزت من ظروف صعيبة بزاف وهدا ماشي مبرر .. كانت كاتبان ليا دنيا بحال شي بيت حيوطو مزاحمين وانت هو الباب لبرا .. عشت معاكم ايام زوينة و كنت كانتمنى ماتكونش مجرد تخيلات
- هو : كنت كانبغي زينب وكان بصح يسحابني حتى هي كاتبغيني ولكن تبتي ليا العكس كان يسحابني غانعيش معها مزيان ولكن ملي عشت معاك بان ليا كان غايكون من المحال .. هي براسها قالتها ليا .. كنت كانظن انني عارف الواقع مزيان ولكن بان ليا أنا لي كنت كاتخايل .. ملي كانبغيوا، عينينا كايتعماو وكانوليوا نشوفو غير لي بغينا ... سمحي ليا كنت كانتعامل معاك بطريقة خايبة حيت خليتيني نشوف داكشي لي كنت كانخاف منو ولكن كان لازم منو .. ماشي غير بوحدك لي كايتخلط ليك الواقع مع الخيال .. كلنا كانهربو للخيال ملي كايصدمنا الواقع
وهادي كانت أخر مرة نشوفو ولكن بقينا على تواصل وبالخصوص مع ماماه حيت بصح عزيزة عليا .. اما بالنسبة لحياتي فوليت نرجع لطبيعتي لقديمة خجولة وكانفكر بعقلي ونقدرو نقولو بلي بديت كانرفع من مستوى دكائي .. رجعت نكمل قرايتي وخدمت فنفس الوقت غاضحكو عليا الى قلت ليهم فين فالمصحة حيت كاع زملائي سابقين كايحتارموني وكايسمعو كلامي هه وكايعلقو ليا مرة مرة ..و مرة مرة كنتلاقى انا وزينب كنمشي نضورو أنا وياها وبناتها رجعنا صحابات كلنا هه .. وليوم مشينا لروضة نزورو راجلها .. لي مزال ماعرفتش واش كان حلم ولا حقيقة ولكن اتفاقنا تنفد على أكمل وجه هه .. مراتو رجعات وانا عقلي رجع .. كانت فترة صعيبة والضربة لي ماتقتل تقوي والحمدلله من بعد الشدة يأتي الفرج .
تمت بحمد الله.
ما رأيكوم في القصة.
تعليقات
إرسال تعليق